الموضوع: الى المدعو غبور وكل من يعمل فى هذة الوكالة حاسبوا انفسكم قبل ان تحاسبوا

المشاركة الأصلية كتبت بواسطة SEATLOVER

يا حاج سومعة ...
هو انت فاكر سيات لافر قاعد فى موضوعة و مش عارف كل كلمة بتتقال فى المنتدى ولا اية ؟ !!!
هو انا لازم يكون عندى عربية هيونداى عشان اقوم بدور ايجابى نحو زمايلى اعضاء المنتدى ولا اقف اتفرج عليهم و ادخل فى كل مشاركة اقول دة توكيل سيىء

وبتقول ماحدش عندة عربية هيونداى اشترك فى الموضوع
حضرتك الموضوع عدد مشاهدتة وصل عدد 3582 مشاهدة بأجمالى مشاراكات 145 مشاركة ... لو تحب اذكرلك اللى معاة عربية هيونداى و شارك اقولهوملك بالترتيب كمان

ولعلمك عشان انا عارف انك ماعندكش وقت تتابع القسم عندك
الاخ السائل و صاحب الموضوع (احمد باشا) كان فاتح موضوع قبل دة على طول بيسأل على النيو اكسنت
فى الموضوع دة ارجو المساعدة لانى محتار فى شراء اكسنت 2008

وهتلاقى ان انا اول واحد رديت علية
ولو مش قادر تروح الموضوع دة نص اللى قولتهولة هناك



يعنى قولتلة ما يرضى الله فى العربية ..
وهو اللى اعتبر نقطة التوكيل نقطة غاية فى الاهمية و تفرق معاة ... ودة حقة

ياريت منتكلمش على حد و هو مش موجود .... (وخصوصاً انا )

انا معايا ماتريكس جديدة و اوافقك تماما فى كل ما قلته و ما قمت به حتى الان و ما فعلته هو الصواب فيجب ان نحس جميعا ببعضنا و نتكاتف من اجل ان نصل الى حل فى هذا التوكيل المهمل النصاب حتى نردعه و يبدأ فى تغير سياسة الاهمال الواضحة فيه و بما انه يكسب مكاسب طائلة من الناس فليعطيهم حقهم فى المقابل
و لولا ستر ربنا و رحمته بى لكانت سيارتى اتدمرت بسبب توكيل غبور و اقسم بالله انى شاهدت حالة لسيارة امامى فى التوكيل قد تحتاج الى نصف عمرة موتور بعد صيانة الالف مباشرة بسبب اهمل التوكيل و سبحان من صبر صحاب السيارة عليهم و جعله يحتمل هذه المصيبة و اعتقد انى لو مكانه كنت ارتكبت جريمة فى هذا التوكيل بسبب هذا الاهمال و الاستهتار بالناس .
ان هؤلاء الناس و غيرهم ممن لا يصل صوتهم الى النت او اى وسائل اعلام ماذا يفعلون اذا لم يتحرك كل انسان مصرى مخلص للوقوف امام هذا التوكيل و ردعه حتى يحترم عملائة و يكف عن هذا الاهمال الواضح .
و انا ابصم بالعشرة ان توكيل غبور نصاب كبير و فى منتهى الاهمال و هذا كان واضح جدا من خلال تعاملى معه و اسعار قطع الغيار مش عادية يا جماعة شوفوا سعر الكوبلن الواحد للجيتس مثلا بكام عنده ستجدوا اسعار مش طبيعية و كأنى بأشترى كوبلن مرسيدس مش هيونداى بسكويت .

المشاركة الأصلية كتبت بواسطة eng / AhmeD

حضرتك راجل محترم و زي العسل
بس حاد شوية

ربنا يخليك يا عم احمد
لا حاد ولا حاجة والله

بس الموضوع حساس و عايز تفهم وواقعية فى التنفيذ
احنا بنقاطع منتج احنا محتاجين لية لفترة من الوقت

مش هانعمل موضوع نقاطع فية واحد
ومانروحلوش البيت واخدين لة حاجة حلوة
عشان يعقل

ردا على seatlover
أنا مقلتش حاجة وحشة مثلا تستحق انك تكون موجود علشان ترد , لأ خالص , انا كل اللى قلته انك معندكش هيونداى و دى مش نميمة و لا حاجة خالص , دى حقيقة بس مش اكتر و متكلمتش بالاسم كمان قلت اللى عمل الموضوع و الى قالوا لا هيونداى هما اللى معندهمش الهيونداى.
تقريبا كل اللى عندهم هيونداى كتبوا لا غبور بعد اليوم او امتنعوا عن المشاركة لان كلمة لا هيونداى تتفهم غلط زى موضحتلك ووضحت ان مقاطعة غبور مش معناها شخص غبور لا معناها توكيلات غبور و منها هيونداى.
واضح ان الموضوع كله هيتفهم غلط و هيسبب زعل منغير اى سبب فانا منسحب من موضوع غبور دا نهائيا!
كله حر يقاطع او لأ انا مليش دعوة و شرحتلك موقفى و موقف الناس بس مش اكتر.
يعنى متزعلش خالص و انسى الموضوع دا خلى كل اللى بينا تقدير و احترام بس تانى و طلعنى خالص من مواضيع غبور دى.
على فكرة وجهة نظرى فى غبور انه توكيل وحش زى الباقى بالظبط يعنى مش زيادة عنهم و لا اى حاجة الفكرة بس انه عنده زحمة و نظمها بموضوع الحجز و طبعا علشان احنا فى مصر برده الناس بتروح منغير حجز.
كمان مشكلته ان الفرنا خامتها وحشة (الخامات اللى بيركبها فى مصر ) و التقفيل المصرى بتاع الفرنا مش كويس فبيسبب مشاكل و دا سبب الشكاوى الكتير منه و جت النتيجة ان الفرنا بقت زى البطيخة حلوة او ارعى و دا رايى كتبته 1000000 مرة يوقف بقا انتاج الفرنا دى و يجمع النيو اكسنت بامكانيات كويسة و خامات بتاعت كوريا و يبيعها بسعر كويس و يكسب اكتر بكتير.
كمان مشاكل هيونداى واضحة اوى هنا فى نايل موتورز بسبب كثرة ملاك الفرنا مش اكتر انما معظم العربيات و التوكيلات فيهم مشاكل محدش يسمع عنها اساسا و بعدين نصير اساسا مغلوانى جدا و عمل ال5 سنين الضمان دول غصب عنه يعنى مش بمزاجه لما التوكيل كان مقفول علشان محدش كان بيشترى و ميقدرش يسيبهم دلوقتى و الدليل انه اسوا من توكيل غبور كتر البلاوى اللى بانت فى الميجان و سابها لغاية الناس مبتدت تبطل تشتريها فرفع الضمان ل3سنين بس و الميجان صدقنى واحد يملكها قالى غير الفتيس كله و ناس كتير منهم واحد عنده الهاتش باك قالوا زفت و خسروا جامد فى اعادة البيع و حلفوا مبشتروا من رينو تانى.
كمان صدقنى غبور ملوش بديل بدليل الموضوع اللى كان بيتكلم على منصور و غبور واكلين السوق و محدش قادر ينزل عربية قدامهم تنافسهم ففكرة مقاطعة هيونداى لازم يكون فى بديل احسن مش اسوا (يعنى واحد يجيب الافيو ب 72 فاضية بالله عليك )و النيو اكسنت و الالنترا و السوناتا و الفرنا كلو ملوش بديل نهائيا و دا هيسبب ان دعوة المقاطعة تفشل , فلازم علشان نتفق هنعمل ايه نحدد كل السلبيات اللى مدايقانا و بعدين نشوف ايه احسن الحلول , يعنى لو كانت دعوة مقاطعة لميتسوبيشى بسبب اسعارها كنت اول واحد هيشارك لان لها بدل البديل 10 و كمان اسعارهم زودوها اوى بس غبور انا موافق على مقاطعته بس بعد دراسة الاسباب و تحديدها بدقة و البدائل لكل عربية.
مرة تانية انا مش قصدى اكتب من وراك و انا برده رايى انى كده مكتبتش حاجة وحشة و لا حاجة غلط لما قلت انك مش من ملاك الهيونداى.
فمتزعلش و بكرر انا منسحب من موضوع هيونداى دا و بوضح برده انت من اكتر الناس اللى بحترمهم هنا و بحترم موضوعاته و ردوده.

المشاركة الأصلية كتبت بواسطة som3aa

ردا على seatlover

مفيش حاجة يا سومعة باشا ..
واحنا اخوات
وكل واحد فينا واضح انة بيحب هيونداى وقلبة على اخواتة فى المنتدى وصعبان علية اللى بيحصل فى انسب العربيات للبلد .. بس كل واحد مننا بطريقة مختلفة
الف شكر على الرد الكريم

بصراحة انت جبت الاخر ياسمعة
وعلى فكرة ممكن الواحد يشترى هيونداى ومايتعملش مع غبور خالص ويتاعمل مع مراكز الخدمة المعتمدة من هيونداى
مثال مركز خدمة ابو غالى مركز خدمة معتمد لهيونداى
بالرغم انى كنت النهاردة فى التوكيل والحمد الله كان معايا مهندس كويس والمعاملة كويسة