المشاركة الأصلية كتبت بواسطة saddam
صديقي المواطن كل الكلام اللي إتقال في الموضوع أنا مريت بيه من زمان وأنا مسافر ولافف دول كتير وإكتشفت إن عشان فكرة صاحب الموضوع دي تنجح ميجيبش عربية زيرو ويضيع نفسو الصح إنو ينقي عربية عندها إمكانيات قديمة ثم يعدلها على مزاجه يعني يجيب عربية مثلا ب 25 ألف ويصرف عليها بتاع 40 ألف تعديلات والمحصلة حتكون عربية مميزة ليه هو لوحده وبسعر العربية الصغيرة سوزوكي حبك إنت لأن أنا جيت من سنتين أجيب عربية ستريتش من بره لينكولن رحت الجمارك قال لي الجمرك حيكون لوحده 850 ألف يعني بالعربية أكون عديت ال مليون وثلاثمائة ألف فقلت وعلى إيه أنا أجيب عربية على مزاجي وأعدلها براحتي وأحط فيها كل الحاجات أو قريبة ليها وحتطلع مميزة وملهاش حل بتكلفة من وجهة نظري وتطبيقي العملي على أرض الواقع بأقل من 75 ألف جنيه وفعلا من شهر إشتريت العربية و ضميتها لمجموعتي وهي عربية كلاسك مرسيدس موديل 1958 وفعلا قبل أحداث رابعة بكام يوم قصيتها أول قصة يعني قطعتها من أول حته ورسمت التصميم والميكانيكي حل والناس كل اللي معدي بيقول حرام عربية زي دي تتقطع حقهم طبعا لأنهم مش عارفين دي أما تخلص حتطلع إزاي بس حتاخد وقت في الشغل من سنة إلى سنتين لأنها حتقعد سمكرة بتاع 6 شهور وهكذا
بالنسبة للأخ اللي بيتكلم عن العربية اللي هي فان اللي فيها من جوه حمام وسرير وتلفزيون ودولاب وبوتجاز فطبعا دي لو دخلت مصر مش حيقل ثمنها عن ال 2 مليون بسبب جماركنا الوطنية طول الله عمرهم وتلاقي كل الفنانين عندنا بيستخدموها والصح وأنا بدور على وحدة فعلا بس الفلوس دلوأتي مش في أحسن حالاتها النفسية هو إنك تجيب ميكروباص مرسيدس بيسموه 18 راكب أو 23 راكب بيبتدي من موديلات السبعينات ولغاية أواخر الثمانينات تغيرلو مكنة وعفشة مرسيدس 560 بالفتيس وتغير عفشتو وتغير الوش والظهر وتركب وش حديث وليكن وش خليط من عربيتين فخمتين على زوقك بس حاسب على علامة النجمة وعيش الداخل بقه على مزاجك خش حط فيه اللي إنت عاوزه وفي شركة في كرداسة بتفصل العربيات من جوه زي عربيات الإسعاف وغيره ممكن يجهزولك نص الشغل اللي جوه وتعيش حياتك وتروح شرم وتعيش اللحظة ولا تقلي ميكروباص تويوتا ولا تقولي هيونداي إش ون ولا تقولي صيني ولا تقولي سوزوكي وكل ده أقل من 100 ألف جنيه بس حياخد وقت في التعديل
وفي طريقة تانية عندك الميكروباص الفلوكس معظمه دلوأتي نمر ملاكي خدلك واحد وقطع وطول وقصر براحتك وحط فيه اللي إنت عاوزه وغير مكنة وغير فتيس وغير شكل أما قصة وعلى فكرة كل العربيات دي تحط في بالك بقت جزء من حياتك محدش حيشتريها منك وربنا يوفقك ويبارك في الأخوة منورين المنتدى برضو مش حيقصروا معاك في النصيحة معلش سامحوني أنا أفكاري متطرفة بس أنا شخصية بجيب من الآخر ومبحبش أحرق بنزين عالفاضي ومشفتش حد أو بلد في الدنيا أهلها بيخسروا فيها في العربيات الزيرو قد الشعب الطيب بتاعنا وأنا خدت 3 عربيات بس زيرو في مصر وبعديها إكتشفت إن الزيرو أكبر خدعة في مصر لحد فاهم في تعديل العربيات وعنده علاقات ويعرف ألاعيب الأسطوات أما المواطن العادي فللأسف ملوش غير الزيرو وربنا يوفقه