مشكلة فى فتيس الالنترا 2012

**aatif** · 04-02-2012 01:06 PM

سلام عليكم جميعا
انا كان عندى مشكلة كده ممكن تكون بسيطة او لأ الله اعلم لأنى اول مرة اسوق اوتوماتك
انا معايا الانترا 2012 وعامله حوالى 12000 كلم
وبقالى فترة حاسس ان فيها مشكلة هقولكم الأعراض يمكن حد يقدر يفيدنى بحاجه
اولا فى اى وقت العربية لما تكون باردة او مسخنتهاش كويس وانا ماشى بحس ان فى صوت كركرة من الموتور كل ما اجى اطلع مطلع او اتقل رجلى على البنزين شوية وبيختفى بمجرد العربية ما تسخن والكركرة دى صوتها بسيط مش عالى
ثانيا لما باجى اجبها على r او p كنت احيانا بسمع صوت تكه او اتنين بس واحد صاحبى قالى ان ده عادى واتمنى اتأكد من النقطة دى منكم برضه
ثالثا بقى وده اللى خلانى اقلق بقالى يومين كده بقيت بسمع صوت اللوك بتاع الفتيس لما ادوس بنزين او فرامل وانا ماشى يعنى على سبيل المثال انا ماشى على 30 وشيلت رجلى من على البنزين اسمع صوت تكة والعربية زى ما تكون اتهزت كده حاجه بسيطة ونفس الكلام لما اجى ادوس بنزين تانى اسمع تكة

انا ناوى اروح التوكيل بس انا نفسى ااقولهم المشكلة ايه بالظبط لأن فى صيانة العشرة قولتله على الصوت بتاع الكركرة ده وقالى احنا ربطنا عفشة وطلعنا جربناها ومفيش صوت لحد ما اكتشفت انه بيطلع لما تكون بارده بس

انا اسف للأطالة واتمنى ان لو حد يعرف حاجه عن الموضوع ده يفيدنى وشكرا مقدما

**HOSSAM99** · 04-02-2012 04:18 PM

و عليكم السلام و رحمة الله و بركاته
أولا ألف مبروك علي العربيه و ربنا يكتب لك فيها الخير
ثانيا كل اللي حضرتك ذكرته ده نابع من الخوف علي العربيه و كمان علشان أول مره تركب أوتوماتيك
فابالنسبه للكركره (دي مستحيله) لأسباب خاصه بتقنية العربيات الحديثه بتمنع التسقيف و الكركره و خلافه ... لكن تفسيرها إن إستجابة الأوتوماتيك مختلفه شويتين عن المانيوال و كل عربيه ليها طلعتها
نيجي للأصوات أثناء النقل من r_p و العكس دا عادي نتيجة تحرك الأجزاء الميكانيكيه (لكن حضرتك مركز جدا مع العربيه)
أما موضوع اللوك بتاع الفتيس ده أنا مش فاهم حضرتك تقصد أيه باللوك ... لكن لو حضرتك مثلا كنت ماشي علي 30 و شيلت رجلك من علي الأكسراتير و حسيت إن العربيه بتهدي سرعتها فده طبعا طبيعي و هاتبقي زي ما تكون بتهدي بالفرامل
لكن لزيادة الإطمئنان حضرتك في الصيانة الجايه تقدر تدردش مع المهندس في الكلام ده كله و وضح له الأعراض كلها و بلغنا برده

و غير الزيت لليكوي مولي أشتريه معاك و أنت رايح و أديه للمهندس بدل الشيل

بالتوفيق

**aatif** · 04-02-2012 08:48 PM

انا متشكر جدا لردك
بس فعلا صوت الكركرة ده موجود ممكن ميكونش من الفتيس او الموتور بس انا بفكر ابيت العربية قدام مودرن سيرفيس عشان المهندس يسمع الصوت ده بنفسه
وبخصوص التكه اللى بسمعها وانا ماشى دى صوت تكة بتخلى العربية تنطر حاجة بسيطة جدا وده بيحصل لما اشيل رجلى من على البنزين واحطها على الفرامل ومتهيألى انا كنت قريت قبل كده ان الأوتوماتك لما تدوس فرامل فيه لوك بيرفع الترس او يفصل البنزين حاجه كده مش متذكر بالظبط

**CryptonX** · 05-02-2012 10:16 AM

كل الاصوات دي طيبعية و حسيت بيها برده .. بالذات موضوع الكركرة ده الصبح علشان دياما ببقى مستعجل على الشغل و صاحي متاخر مش بلحق اسيبها تهدى ... بنط من البيت على العربية في الشارع :) و بيختفي تدريجي بعدها بدقائق لحد ماتسخن.

**aatif** · 05-02-2012 06:28 PM

معلش ممكن حد يتكرم ويشرحلى يعنى ايه تسقيف -- اصل الصراحه انا اول مرة اسمع الكلمة نظرا لخبرتى القليلة

**freeman207** · 05-02-2012 08:29 PM

متقلقش دى عادى خالص كنت زيك كده بالظبط اول ماجبت العربية لان اول مرة اسوق اوتوماتك بالتوفيق

**el_nahal2004** · 05-02-2012 10:20 PM

زى راى الاعضاء بالضبط
وحاول لو تعرف تركب اتوماتيك عربية تانية نفس الموديل هتلاقى نفس الكلام

حاجة عادية جدا

حسام باشا حضرتك جربت زيت ليوكى مولى بنفسك ؟
انا قريب ان شاء الله هغير زيت وبفكر فيه ايه تجربتك ليه ياريت تقولنا

**HOSSAM99** · 06-02-2012 02:00 AM

بالنسبه لأستاذ عاطف صدقني اللي حضرتك حاسس بيه ده إحساس طبيعي و مفيش أي إشاره لوجود مشاكل
كل ما في الأمر إحساس زياده بأجزاء العربيه في أول كيلومترات لها
مع التليين و الشغل و التعود علي العربيه كل شئ بيبقي طبيعي جدا
(كلنا كنا كده)

المشاركة الأصلية كتبت بواسطة el_nahal2004

زى راى الاعضاء بالضبط
وحاول لو تعرف تركب اتوماتيك عربية تانية نفس الموديل هتلاقى نفس الكلام

حاجة عادية جدا

حسام باشا حضرتك جربت زيت ليوكى مولى بنفسك ؟
انا قريب ان شاء الله هغير زيت وبفكر فيه ايه تجربتك ليه ياريت تقولنا

أيوه يا فاندم جربت ليكوي مولي في إلنترا 2005 بتاعت صديق لي و هو زميل لنا في المنتدي و متابع العربيه معه بصفه دوريه علي مدار أكثر من أسبوعين و مبدأيا (عقبال ما نعمل تقرير عن الصيانه و الزيت و خلافه) إن الزيت ده فيه حاجه مش موجوده في باقي الزيوت (لكن مش لدرجة السحر ) لكنه ممتاز ... حسن صوت الموتور بنسبه جيده جدا و الأهم و العهده علي الراوي إستهلاك البنزين
الزيت ده جيد جدا و هايبقي الزيت رقم واحد في مصر
علي فكره في ناس كتير في يونداي جربته و منهم الباشمهندس أحمد كفراوي و بيشكر فيه جدا