الموضوع: الفانوس الخلفي اتكسر...و رجع زي الاول

قدر الله و ما شاء فعل
للاسف كنت في ميدان فيكتور عمانويل في سموحة متجها لجرين بلازا و الميدان واقف خالص و مدي اشارة يمين ومن ورايا عربية بونتو سايقها بنت المهم...مش عارف ايه اللي خلاها مرة واحدة تحاول تتخطاني بالرغم من ان السكة واقفة و فجأة سمعت صوت تكسير و نزلت من العربية ومن المرات القليلة اللي اتعصب فيها بالشكل ده لاني اول مرة حاجة تتكسر في العربية و لقيت البنت قاعدة تعتذر و تعترف انها الغلطانة و مؤمنة تماما بأن من اتلف شيء فعليه اصلاحه
و لسوء حظها ان كان فيه شلة رتب واقفة و بصراحة و موقف قدير يحسب للمرور الناس تتدخلت و كأن عربية شرطة هي اللي اتخبطت و قام رائد شخط في البنت و سحب منها الرخص و امرها انها تركن علي جنب و قام بطمأنتي ان حقي حاخده كاملا
و طلبت مني البنت اني اجنب الشرطة و هي ستقوم بعمل اللازم من تغيير الفانوس او اصلاحه حسب ما احدد انا فقلت لها اننا نروح عند حمدي داوود في سموحة برضه و هو اللي حيقيم المشكله و طلبت مني اني اخد الرخص بتاعتها من الظابط عشان ما تدوخش عليها و طلبت من الرائد المحترم ذلك و الراجل بصراحة ما كانش عايز يديني الرخص علي اساس انه بيحميني من اي الاعيب و بيحتفظلي بحقي في عمل محضر الا اني توسمت الصدق من البنت و انها مش عايزة شوشرة و محاضر و بالفعل اخدت الرخص علي اساس انها تكون معايا و عرضت علي البنت استلامها و هي و ضميرها الا انها رفضت بشدة و جت معايا لحمدي داوود اللي قرروا هناك ان الكسر في الباغة بس و الفانوس ما حصلهوش اي حاجة لكن للاسف الباغة بتاعة اللانسر 2007 لسه ما نزلتش و فيه فانوس كوري بسعر 225 و الاصلي بسعر 970 ده عشان خاطري و البنت اقسمتلي انها معهاش الا 450 جنيه فقلت لها خلاص نركب الكوري خصوصا اني لم الاحظ اي فرق بينه و بين الاصلي لغاية ما الباغة تنزل و اركبها علي الفانوس الاصلي الفابريكة بتاع العربية
و بالفعل تم التركيب و كأن شيئا لم يكن و الحمد لله
ربنا يحرس الجميع يا رب من كل سوء

محمد فهمي

محمد باشا .... قدر الله وما شاء فعل!
الحمد لله على كل حال ... بس يا محمد لو كانوا الظباط أخدوا الرخص بتاعة البنت كانت حتتبهدل وإنت لا كان حينوبك لا حق ولا باطل....... محاضر الشرطة كلام فارغ وأكبر تعويض 50 جنية!!!!!!!!!!!

الحمد لله إن ربنا هداك للصواب .... وطالما البنت عندها ذوق وبتفهم يبقى إلتمسلها العذر وكلنا معرضين للخطأ ... كمان الحمد لله إنها جت في فانوس يعني حاجة بتتشال وتتركب تاني زي ماهي وزي الأول.

ربنا يباركلك