العربية بتطفى لوحدها اوقات و بتتعبنى فى الدوارة (فولكس بورا))

الحمد لله ربنا كرمنى بركوب البورا تانى ووقعت على واحدة أوتو ممتازة الحمد لله.

الموضوع ببساطة ان العربية كانت مخنوقة حبتين و بدأت افتح فى ماتورها شوية من حين لأخر عن طريق القرص على الماتور بس مش جامد و مش ورا بعض, و بالفعل سحب السيارة اتحسن, المهم فجأة و أنا ماشى مرة على الd و من غير ماكون ضاغط على ال بنزين عشان كان شارع مكسر بالعكس كنت مريح رجلى على الفرامل, العربية بطلت لوحدها, و جيت ادور مادرتش غير على ثالث أو رابع مرة و كمان كنت بضغط على البنزين, المهم مشيت شوية كده و كررتها تانى.

المهم رحت للميكانيكى بتاعى قالى غالبا البوابة هتحتاج تتنضف, و جيبنا السبراى و نضف البوابة مع ضغط البنزين و العربية طلعت شوية هباب من الشكمان و بالفعل مشيت على العربية طول اليوم امبارح الظهر ووقفت و مشيت كذا مرة و زى الفل, المهم بليل عملتها تانى وقفت لوحدها و مرديتش تدور بسهولة و مشيت شوية و عملتها تانى و بردو دارت من ثالث مرة, رحت مروح بالعربية, و النهارده رحت بيها الشغل على الدائرى زى الفل الحمد لله, و رحت مشوار و رجعت تانى للشغل مفيش مشكلة بردو.

طيب انا رايح بكرة للميكانيكى ان شاء الله, شكوكنا انها ممكن تكون طرمبة بنزين خصوصا لما عطلت امبارح بليل كان فيه زى ريحة بنزين كده, و العربية لما اتحطت على الجهازعند النيكانيكى مقرتش أعطال, فياريت لو حد مر بحاجة زى كده يقولنا و هل ممكن يكون فلتر البنزين مثلا تعبان و هو البيعمل كده ولا الطرمبة هيا البتهنج,مستنى اقتراحتكو, و يا ريت بردو اليعرف سعر الطرمبة استعمال يعمل كام عشان نعمل حسابنا.

شكرا

لا اله الا الله انت لحقت يأحمد
عمتا فى الغالب هو فلتر البنزين يأحمد وياريت تعمل السيرفس بتاعها بوجيهات وفلاتر وسيور وتنظيفه محترمه للبوابه بس فكها بره العربيه واغسلها ببنزين بلاش الأسبراى عشان هو اللى بيبوظ البوابه ونشفها كويس وركبها وتعملها بيزك سيتنج على الجهاز وان شاء الله متدخلش فى طلمبه
واللى يحسم الموضوع جرب تقف فى مكان هادى وتفتح كونتاكت واسمع صوتها او فك الخرطوم اللى داخل على مسطرة الرشاشات وخلى حد يفتح كونتاكت وشوف تدفق البنزين
الف مبروك عليك وربنا يستر طريقك واعمل حاجه لله عشان تشيل العين من عليها
انا صحيح نفسى فى بورا بس محسدتكش والله يأحمد

يا باشا تحسد ايه بس عيب, ديه العربية عربيتك, و عموما ان شاء الله انا رايح للميكانيكى النهارده و ربنا يقدم الفيه الخير. هتصل بيك بليل ان شاء الله.

هية اية فائدة البوابة دى ومتى يتم تغييرها هية بتتغير بعد عدد معين من الكيلو مترات ولاا مع الصيانة الدورية يتم تغييرها
وفى مشكلة حصلت مع واحد صاحبى انه لنا بيشغل التكييف العربية بتفصل منه ولما بيفصلة بتشتغل تانى هية عربية جولف 2002 من ية تكون المشكلة دى هوا راح بيها لمكانيكى قالة المفروض تغيير البوابة فهل هذا الكلام صحيح ولو حد عندة فكرة كم يكون ثمن هذه البوابة وهل بالفعل عند تغييرها حيتظبط الكلام دة ولاا حنلاقى الموضوع متحلش هوا بيمشى بيها دى لوقت من غير تكييف طبعا بس المشكلة دى اكيد حتوجة تانى فى الصيف

الحمد لله, اتبعت حدسى و ذهبت الى ورشة محمد سمير و هانى عصمت الورا حديقة بدر و السبب اعتقادى ان الراجل ده بيعدى عليه عربيات كتير جدا و غالبا أكيد عيب زى ده أكيد عدى عليه قبل كده, و بالفعل الصنايعية عندو فكوا و حلوا, و جيه هوا سالهم ايه الشكوى و ايه البيحصل حكولو, راح قايلهم على شوية حاجات عملوها و تمت بحمد الله وتم اكتشاف العيب و كان كالأتى:

1- حساس الأوكسجين, تم تغييره جديد ب 100 ج.
2-موبينة توزيع الكهرباء, تم تغييرها استيراد ب 300 و شوية هبص فى الفاتورة و أقولكو.

النتيجة: العربية لغاية دلوقتى مبطلتشى ولا مرة الحمد لله, تهييسة الRPM محصلتشى تانى, تحسن ملحوظ جدا فى السحب والنتش البسيط الكان بيظهر فى بعض النقلات.

شكرا لمقتراحتك جميعا.

عموما رأيى ان الميكانيكى بتاعى كويس و فاهم فى العربية لكن فى حالة المشاكل الغريبة لابد من الذهاب الى الأكثر خبرة و تجربة حتى لو كان غالى شوية (بصراحة بالنسبة ليه فالعمولة معقولة مش حراقة و عملوا تخفيض نظرا ان العربية اول مرة تخوشلهم) و هانى نفسو فعلا خبرة فى العربية ,و يكفى ان اقولكو ان كان فى فى حدود 30 عربية على الأقل عندو, تبتدى من بولو و فابيا و خش على البورا و الجولف 4 و من ثم الجيتا و أوكتافيا 5 و فولكس ايوس و باسات الجديدة, و انتهاءا ب باسات cc من ليبيا موتور 2000 سى سى تربو و بالطبع عدد مهول من الصنايعية المتدرجى الخبرة بدءا من العيال الصغيرين المساعدية و من ثم البيشتغلو بايدهم و من ثم الأكثر خبرة و البيلفوا على العربيات لابداء النصيحة و التأكد من جودة العمل و انتهاءا بهانى نفسو.

المشكلة فى العطلة و الوقفة الكتير و الزحمة خصوصا انه كان يوم جمعة. __________________