الموضوع: المختصر المفيد لشراء اوتومبيل مستعمل بحالة الجديد

بسم الله الرحمن الرحيم

دي روشتة شراء السياره مستعمله ازاي تقدر تفحصها بعين خبيره..لاكتشاف اي عيوب فيها اتمنى يكون الشرح بسيط ومفهوم و..وندخل في الموضوع



أولا: فحص البودي الخارجي:


1-بالنسبه للبودي..ابدأ بالنظر للهيكل الخارجي ككل (قالب العربيه) الفروقات بين الابواب..وبين الرفرف والكبوت ..وبين باب الشنطه والرفرف الخلفي-وفروقات الاكصدامات مع الفوانيس..مع ملاحظة طلاء السياره اذا كان في اختلافات واضحه في اللون بين منطقه واخرى..او وجود تموجات وتعريجات تتدل على وجد اثار سمكره ..
وبكده لو مبدأيا هيكل العربيه او القالب بتاعها الخارجي يفتح النفس ..ابدأ اتفرج بنظره اكثر تدقيقا..كما يلي..

2-أكتر الاماكن اللي تقدر من فحصك ليها تعرف اذا كانت العربيه قد تم ليها عملية دهان(رشه) هي المناطق اللي فيها منحنيات وعلى الاطراف اللي غالبا بيكون صعب فيها مداراة عيوب عملية الطلاء..زي الجرايد بتاع الابواب أو الشرائط..لأن لو كانت خبطه بسيطه وتم دهانها غالبا لايتم فك كل الشرايط او الجرايد بل يتم تغطيتها وعمل الطلاء وبيكون في اثار للرش او مكان قطع البويه وهو الحد الفاصل بين منطقة الدهان والمنطقه ذات الطلاء الاصلي..كما هوا الحال بالنسبه للمناطق اللي فيها بومبيه بشكل حاد (السوكه)...

3-النظر لأطراف القطع(الحواف) بشكل فردي لو شاكك فيها بمعنى لو شاكك ان الباب ده او الرفرف تم له الطلاء بيظهر عند الاطراف في الغالب ارتفاع طفيف جدا في مستوى الطلاء عن نفس المنطقه في القطعه ذات الطلاء الاصلي..وتدقيق النظر في السوكه او منطقة الباكته بتاعت الباب لاحتمال ظهور اثار تسييل للبويه او الورنيش..
طبعا في شغل عالي بيعملوه الفنيه بتوع الطلاء واللي مش هتلاقي الشغل ده وراهم

4-قد تبدو عملية نقر اجزاء الصاج في السياره غير ذات اهمية بالنسبه للبعض..اما بالنسبه للخبراء بيقدر يحدد عن طريق الصوت الناتج من النقر اذا كان مكتوم من عدمه لانه مؤشر فعال لمعرفة اذا كان قد تم وضع طبقة معجون الاساس اللازم لعملية الدهان
(بعض الفنيين يقومون بوضع طبقه خفيفه جدا جدا من المعجون وبالتالي لا يتم ملاحظتها وذالك يدل ان المنطقه رشه للنظافه او خدوش بسيطه)


ثانيا: دواخل السياره

:
1-مقدمة السياره..بعد فتح غطاء المحرك(الكبوت) النظر بدقه على الشنب وصدر السياره.وملاحظة اي تعرجات تدل على حدوث خبطاط في مقدمة السياره..
ستوكات المصنع(الزنب)وهي الدوائر الغائره قليلا على الشنب والصدر وحوض السياره وحول فجوة المساعدين الامامين والظاهره عند فتح الغطاء..لان هذه المناطق عند اعادة طلائها تصبح مستويه مع باقي السطح وذالك بسبب وضع طبقة معجون الاساس...
ملاحظة ان الشنب او الصدر في اغلب السيارات يكون في نهايته طبقة فلتو(طبقه تشبه المطاط وتكون على مناطق اللحام بلون السياره)عند وجودها ملتئمه يدل على عدم تغيير القطعه كامله)
النظر جيدا على الشاسيه ايضا هو طريقه لمعرفة حدوث خبطاط اماميه من عدمه
النظر ايضا من بين الفوانيس على شاسيه الاكصدام او الدعامه اللتي يركب عليها الاكصدام الفايبر

2-جوانب السياره..فتح الابواب والتدقيق في حلق الباب والقوائم وفحص الفايبر للعتب والتأكد من عدم وجود طلاء بها ومتابعة اجزاء الفلتو(طبقه مطاطيه تحدد الجزء الداخلي من الابواب والتأكد من اكتمالها وعدم حدوث تغيير فيها)
قد تبدو ملاحظه غير ذات قيمه ولكن يجب الا نغفى ذكرها..النظر على بنوز الابواب وهيا مكان تعليق الباب في هيكل السياره اذا ظهرت عليها خدوش بسبب حل او فك الباب واعادة تركيبه
فتح غطاء التنك والتأكد من وجود استوكات المصنع ظاهره

3-مؤخرة السياره(الشنطه)..التأكد من استوكات الشنطه (الزنب اللي في حلق باب الشنطه) والتأكد من انها بوضع المصنع..ملاحظة شاسيه الاكصدام الخلفي..
رفع المفرش وفحص حوض الشنطه بدقه..وان امكن فتح اللباد او فرش الجنب في الشنطه للتأكد من سلامة الصاج
فحص باب الشنطه والتأكد من عدم وجود دهانات داخليه به..والتأكد من وجود الفلتو على وضع الخواجه..:)

كده تقريبا خلصنا الجزء الخاص بهيكل السياره والطلاء..وبقي ان تعلم ان في الغالب عند طلاء الكبوت او باب الشنطه من الداخل..غالبا ما تظهر عيوب في الفلتو..وبيكون ملمس الطلاء خشن في اسفل الكبوت من الداخل وكذالك اسفل باب الشنطه من الداخل..
وبالنسبه للسقف تقدر تتأكد من وجود طلاء من عدمه عن طريق فحص مناطق اللي راكب عليها جرايد او شرائط الزجاج الامامي والخلفي وتدقيق النظر للتأكد من عدم وجود خط فاصل (مكان قطع البويه) بين الدهان الاصلي والدهان الحديث..ونظرية النقر اوقات بتنفع مع الشخص اللي عنده خبره اكتر...


ثالثا: فحص موتور السياره:


طبعا في اغلب السيارات الحديثه وخاصة الالماني والامريكاني يفضل عمل تيست موتور على الكمبيوتر او احد اجهزة تحديد الاعطال الحديثه..ولكن بالنسبه للسيارات الحديثه المتوسطه والمتداوله..لديك بعض النصائح..
-وجود اثار تسريب للزيت من اسفل وجوانب الموتور هو مؤشر سيئ لحالة الموتور
-النظر بدقه للسيور ..وفحص اذا ماكانت قديمه او مستبدله..
-التأكد من عدم وجود اسلاك بالوان اخرى خارج الضفيره الاصليه مما يدل على وجود اعطال كهربيه سابقه
-عند ادارة الموتور..ملاحظة صوت عملية دوران الموتور يكشف لك حالة المارش وعملية لقط الكهرباء
-ملاحظة عداد ال rpm )عدد لفات الموتور)ان وجد ..على الوضع باردا ونلاحظ ارتفاعه النسبي قليلا لحين بدأ ارتفاع حرارة الموتور على المؤشر..يبدأ للنزول وملاحظة مدى استقراره بعد استقرار حرارة السياره على الوضع الطبيعي ..اذا كان بيطلع وينزل وغير مستقر قد يكون عيب في (حساس الهواء أو حساس البوابة ) او مشكلة في كهرباء السياره
-صوت المحرك اذا كان في اول دوران المحرك(والعربيه لسه بارده) فيه صوت تكتكه أو دقدقه ونقر ولو هادئ يدل على عدم ضبط التاكيهات.. ولو كان صوته عالي ومستمر ده دليل على تلف في الكامه والموضوع كبير
-بعد ما العربيه تاخد حرارتها الطبيعيه دوسة بنزين خاطفه ومش عاليه اوي والنظر ناحية شكمان السياره وملاحظة وجود دخان ابيض او اسود او مائل للزرقه يدل على وجود مشكلة في الاحتراق قد تكون سوائل تبريد ودي بتكون لون الدخانه غالبا ابيض وبتدل على وجود مشكلة في احد الجوانات غالبا وش السلندر..او دخان اسود وهو بسبب مشكلة في احتراق الوقود او الزيت ومشكلة عويصه تفضي لعمرة موتور غالبا
-ملاحظة وجود اهتزازات او رعشه على وضع السلانسيه يدل على عدم ضبط الكهرباء او وجود تاكل في قواعد الموتور
-قم بقيادة السياره وبفضل انك ماتجريش مبدأيا بل على السرعات المتوسطه ملاحظة ثبات السيارة على السرعه البطيئه وعدم وجود اهتزازات نتيجة اعوجاج الكاوتش او الايطار
- وفي اماكن النتوءات ملاحظة صوت اجزاء التعليق(العفشه) والتأكد من عدم وجود اصوات خبط قد تكون عيوب في المساعدين او جلب المقصات او في اي من اجزاء التعليق
-ملاحظة انحراف المقود في احد الاتجاهات قد يكون يحتاج لضبط زوايا الاطارات..لو في رعشه في الطاره قد يكون محتاجه ترصيص او هناك عيب في الكاوتش
-وجود رعشه في بدال الدبرياج او تقيل عند الضغط عليه تؤكد وجود خلل في الاسطوانه والديسك
-عند الضغط على الفرامل ضغط متوسط هل تلاحظ وجود رعشه في بدال الفرامل..؟ده دليل على مشاكل في الطنابير او البارات
-لف الطاره لاخرها مع زيادة نسبيه على السرعه وملاحظة وجود طقطقه تدل على عيوب في الكبالن
وصوت الخشانه عند لف المقود يدل على مشكلة في طرمبة الباور او على الاقل سير الباور

-لاحظ نقلات الفتيس (المانيوال) وهل تتم بسهول ام لا..ولاحظ اذا وجد صوت خشن او (زعقه) يدل على مشاكل في تروس او غوايش الفتيس
-يفضل انك تجرب كل الغيارات كمان في حالة التوقف

-بالنسبه للفتيس الاتوماتيك..لاحظ سرعة استجابة الفتيس للمؤشر D هل هيا استجابه سريعه ام يتأخر اكثر من ثانيتين لانها تدل على حالة الفتيس ..كذالك على الوضع R
-لاحظ نقلات الفتيس بتتأخر ولا بتستجيب سريعا..وذالك عن طريق متابعة عداد عدد لفات الموتور RPM
-زود السرعه وبعدين دوس فرامل لوضع الثبات وعاود الضغط..وحاول ملاحظة نقلات الفتيس العكسيه وبداية الانطلاق مره اخرى ..هتوضحلك حالة الفتيس


-أخيرا بالنسبه للصالون ..يجب ملاحظة فرش السياره وحالة المقود (كلما ذاد تاكله دل على حالة السياره)
وفرش الابواب واصطفة السقف..والطبلوه وخلوه من التشققات
-وفحص أنوار السياره والاشارات ولمبات البيان بالطبلوه..لمبات الايرباجات وال abs ان وجدت
_فحص كماليات السياره كالزجاج الكهربائي وفتحة السقف والتأكد من ان كل الكماليات تعمل بكفائه
-فحص التكييف والتأكد من حالة التبريد في السياره

-بالنسبه للاطارات والكاوتش يجب تدقيق النظر لملاحظة اذا كان جديد او قديم يحتاج للاستبدال ..وعند ملامسة الكاوتش باطراف الاصابع بحركه دائريه قد تشعر بوجود بروز او ارتفاع في احدى جوانب الاطار(بيضاوي) مما يدل على عيوب في الاطار

-ملاحظة عدد الكيلومترات المقطوعه قد يكون مؤشر جيد لمعرفة تاريخ السياره..ولكن دلوقتي في ناس معندهاش ضمير وممكن تلعب في العداد..ولكن بيظهر اذا كانت حالة العربيه فعليا تدل على الكيلومترات المقطوعه



وبكده تقدر تقيم السياره اللي بتتشتريها ..وفاضل ان السعر يعجبك و..بالتوفيق