الموضوع: شرح مفصل عن نظام الفرامل المانعه للانزلاق وانظمة توزيع ضغط الفرامل

متابع

المشاركة الأصلية كتبت بواسطة expert

شرح مفصل عن نظام الفرامل المانعه للانزلاق وانظمة توزيع ضغط الفرامل

ABS-EBD


Anti-lock Breaking System أو نظام منع غلق العجلات ABS

ببساطه شديده وبدون تعقيد ..عند الضغط وبقوه على الفرامل في حالة السرعه ايه اللي بيحصل ..؟
العجل بيتوقف عن الدوران ومازالت السياره تنزلق نتيجة اندفاعها بقوه..صح؟
وفي حالة توقف العجل عن الدوران ومازالت السياره في حالة اندفاع هتنزلق (تزحف)
وبالتالي يصعب او يستحيل السيطره او التحكم في اتجاه السياره ومنعها من انها تعوم
صح..؟
فكر الخواجه ازاي يمنع انزلاق السياره اثناء الضغط الشديد على المكابح واللي بيؤدي الى توقف دوران العجلات وبالتالي
بتزحف العربيه وتعوم و.....
قام الخواجه اخترع جهاز ال ABS واللي هو مش نظام قائم بذاته او نظام جديد مستقل للفرامل..لأ
هو جهاز بيضيف ميزه جديده على نظام الفرامل العادي او القديم..هيا ايه؟
هيا انك وعند الضغط بقوه على دواسة الفرامل وقبل وصول عجلات السياره الى حالة التوقف اللي هيا (بداية زحف السياره)
بيقوم النظام بفتح واعادة الفرمله اوتوماتيكيا لعدد مرات قد يصل ل 20 مره في الثانيه الواحده بدون ما تغير من ضغطك على دواسة الفرامل
بمعنى ان الفرامل هتعمل بنظام متقطع بسرعه كبيره جدا للمحافظه على مقدار قوة الفرمله بدون زحف للسياره
وبالتالي هتقدر تتحكم في العربيه وفي اتجاه العجل في حالة الضغط المفاجئ بقوه على بدال الفرامل
وعشان كده اول مابتركب عربيه فيها ABS وانت مش متعود عليه..لما بتكبس فرامل بتلاحظ اهتزاز في دواسة الفرامل وصوت قرش
وبتفتكر ان فيها مشكله :)
وصلت كده؟
فكر الخواجه في انه يطور الموضوع ده أكتر بأنه اضاف ..(EBD)
Electronic Brake-force Distribution أونظام توزيع قوة الفرامل إليكترونياً
وكما هو واضح من اسمه هوا نظام بيعمل على توزيع قوة الفرمله اليكترونيا لكل اطار على حده..ازاي؟
عن طريق حساسات ..كل حساس قصاده ترس على الطنابير(على الصره الداخليه) بيعرف منه عدد اللفات للطمبوره
وفي حالة اختلاف اللفات عن باقي العجل في حالة الضغط المفاجئ على الفرامل بيقوم باعادة ضخ الزيت لبقية العجل لعمل التوازن في الفرمله
طيب وايه اللي هيخللي عدد اللفات بتاعة الاطار تختلف اساسا من فردة اطار للأخرى عند ضغط الفرامل ..؟
أقولك ده بيكون تبعا لكذا حاجه ..الطريق اللي انت عليه مبلل او عليه رمل..او نتيجة اختلاف وزن السياره نتيجة حمل اكثر
وبالتالي يعمل النظام علي تقليل قوة الفرملة عن العجلة دي ومعادلة الاندفاع مع باقي العجلات ..
السيارات بدون هذا النظام عند الضغط على بدال الفرامل تتوزع قوة الفرملة حسب أبعاد نظام أجزاء الفرامل ... ولكن في السيارات المجهزة بهذا النظام يتوزع ضغط الفرامل لكل عجلة حسب حالة الطريق (مقدار التلاصق) والحمل على العجلة. .وصلت؟
في حالة الفرملة القصوى في خط مستقيم تقوم الفرامل بزيادة ضغط الفرامل على العجلات الأمامية عن العجلات الخلفية
حتى لا يحدث غلق العجلات نتيجة انتقال جزء من الحمل من العجل الخلفي إلى العجل الأمامي بسبب الفرملة (الوزن المنقول أثناء الفرملة).
في حالة الفرملة خلال التوجيه في المنعطفات, فإن النظام يقوم بتغيير قوة الفرملة من العجل الأيسر للأيمن للمحافظة على الاتزان.
وكذلك يعمل في حالة وجود اختلاف في معامل التلاصق بالطريق تحت العجلات بتوزيع قوة الفرملة بما يتناسب مع مقدار التلاصق الموجود, للحصول على الفرملة المثالية.

كده عرفنا معنى فرامل ABS-EBD والفرق بينهم..وباقي انك تعرف ان اللمبه بتاعت ال ABS
لما بتنور ...غالبا بيكون بسبب ان حساس عليه تراب او وساخه تسبب في خطأ لقراءة العجله
او الترس(المشرشر) بتاع الطنبوره في مشكله وفي الحاله دي بتتغير الصره الداخليه
او ان فردة الكوتش فيها عوجه جامده ودي بردو هتسبب للحساس مشكلة في قرائتها
ونادرا جدا مايكون العطل في وحدة ABS نفسها

أرجو ان الشرح يكون سهل وبسيط

thanksssssssssssssssssssssssssssssss