الموضوع: تقرير عن استلام وصيانة نيسان تيدا 2012 هاتش باك

بسم الله الرحمن الرحيم.

الأخوة الأعضاء في قسم نيسان.. أحب أشكر - شكر خاص جدا جدا جدا - الأستاذ أحمد مصطفى بعد ما ساعدني في شراء نيسان تيدا من معرض أوتو ايجيبت.
و طبعاً نخص بالشكر الجزيل كل من.. بيشوي و المهندس حسين الأعضاء النشطين في قسم نيسان اللي ما بخلوش عليا بالنصيحة لوجه الله..
و الشكر مرة أخرى للأستاذ أحمد مصطفى اللي نسق مع أوتو ايجيبت و مسئول المبيعات الشاطر جدا و المحترم جدا جدا و الذي أعتز بمعرفته الأستاذ أحمد المقدم اللي سهلي كل إجراءات استلام السيارة و القسط و الأوراق في اقل وقت ممكن..

الحدوتة:
---------
كنت ناوي أشتري نيسان صني و بتقسيط اسلامي.. و احترت جدا لحد ما سألت أخونا المهندس حسين و قالي انه اتعامل مع البنك الوطني للتنمية بالتعاون مع مصرف أبو ظبي الإسلامي و ده بيبقى نظام مرابحة سيارة .. يعني ما فيهوش شبهة .. و اتفقت على كل حاجة مع المعرض بالتنسيق خطوة بخطوة مع الأستاذ أحمد مصطفى جزاه الله خيراً مع اني عارف انه كان مزنوق الأيام اللي انا باشتري فيها ...
روحت المعرض في شارع سوريا في المهندسين و اتكلمت على أساس اني هاشتري الصني و حسبنا القسط و التأمين و كله في التمام..
بعدها بيومين قابلت الأستاذ أحمد و اتكلمنا عن الفروق بين الصني و التيدا و عن مميزات التيدا و حلاوة التيدا يا خرابي عالتيدا :d يمكن علشان الأستاذ أحمد معاه تيدا فأقنعني بيها بسهولة.. روحت المعرض و غيرت كل الإتفاقات و خليتها تيدا هاتش باك أول فئة فيها ..الفرق في الفلوس كان يستاهل اني ادفعه..
أحمد المقدم من أوتو ايجيبت كان سلس جدا في التعامل معايا و ما طلبش ورق كتير و كمان استضحلي ان علاقاتهم بالبنك الوطني علاقة قوية جدا .. روحت البنك مرة واحدة في 5 دقايق كنت مخلص كل الأوراق و الإمضاءات و عرفت كل التفاصيل.
أحمد المقدم من أوتو ايجيبت لما عرف اني عضو من أعضاء منتدى نايل موتورز و طبعا الأستاذ أحمد مصطفى كلمه ..طبعلي ورقة فيها الهدايا اللي بياخدها أعضاء المنتدى(سنسور باركنج + دواسات نيسان الأصلية) ....

استلام السيارة:
----------------
روحت المعرض يوم الجمعة 20 يناير 2012 بعد مواعيد شغلي و لاقيت التيدا مغسولة و متلمعة و متروقة بره و جوة..
قعدت مع أحمد المقدم و سلمني كل حاجة في العربية و قالي على كل حاجة فيها و أماكن الصيانة و قالي بص عالعربية برة و جوة علشان تطمئن و لو فيها حاجة من حقك ما تستلمش و نغيرهالك.. بصراحة العربية كانت ما شاء الله ولا قوة الا بالله ما فيهاش هفوة..
و سلمني كل الأوراق و مضيت على محضر الإستلام و اتفقنا أني استلم العربية علشان أرخصها يوم الأحد...
استلمت العربية يوم الأحد فعلا الساعة 6 صباحا و روحت رخصتها في مرور الزقازيق و رجعت بيها 6 أكتوبر في نفس اليوم..
العربية سحبها ما شاء الله.. و جربت الأوفر درايف و انا على الطريق الصحراوي بلبيس - الزقازيق.. عربية ثابتة جدا على الطريق حتى على السرعات العالية.. و استهلاكها في البنزين مناسب بالنسبة لمشاويري..

صيانة الأف:
-------------
الصيانة تمت في اوتو ايجيبت ابو رواش يوم الأحد و العربية كانت عاملة 1112 كم.. غيرت الزيت (توتال) - مش عارف ليه ما حطوش موبيل - و الفلاتر و العربية كان فيها ملاحظة انها بتحدف يمين شوية و دي اتظبطت الحمد لله و المهندس طلع بيها بره الورشة مرتين على الطريق يجربها..
و تم تربيط و تشحيم العفشة و التشييك على كل سوائل السيارة و غسل العربية برة و من جوة بالبلاور ..و تم طبع تقرير عن سلامة السيارة أنا أخدت الأصل و التوكيل أحد صورة منه..
و تم تركيب السنسور بنجاح و تجربته.. الدواسات ما كانتش متوفرة في التوكيل يومها و قالولي انهم هايكلموني علشان يقولولي هي متوفرة فين و استلمها منين.. و دفعت 282 جنيه مصري فقط لا غير

بالإضافة للناس اللي انا شكرتها فوق دي.. انا باشكر المنتدى اللي عرفني حاجات انا عمري ما هاعرفها.. و باشكر كل عضو من الأعضاء قريتله موضوع و ساهم في تكوين فكرة معينة أدت إلى قرار الشراء.

جزاكم الله خيراً
محمود درويش