تجربتان سيئتان مع صيانة الغد فى المنصورة

**ghoneim** · 09-02-2012 02:17 PM

كنت عملت حادثة بعربيتى البيرسونا الشهر اللى فات وكانت محتاجه تغيير وسمكرة للبابين اليمين ولما رحت للتوكيل اسعارهم معجبتنيش وكنت همشى فقالوا لى انه ممكن يدينى الفاتورة علشان التأمين واعمل الشغل بره بالاسعار المناسبة لى وياخدوا 15% على الفاتورة + 200 جنيه ثمن للمقايسه فقلت ممكن استفيد من فرق الاسعار واعمل كام حاجه فى العربيه كانت موجوده قبل التأمين (غيرت اكصدام امامى على كام خربوش على خبطه فى الشنطه) حاولت افاوضهم فى موضوع الـ 200 جنيه وكان لى عشم مع الاستاذ مصطفى صاحب التوكيل لانى ساعدته فى كام موضوع وكان الرد بالرفض فبصراحه زعلت لانه ادانى ورقه مطبوعه بـ 200 جنيه
الموقف التانى رحت النهارده علشان سمعت صوت وونه فى الماتور زى ما يكون بليه خشنه وطلبت منهم يسمعوا الصوت ويقولوا لى ايه المشكله فكان الرد ادفع 150 جنيه لمجرد انه المهندس يسمع الصوت وكان الاسلوب مش ظريف فى الحديث معى فبرده زعلت على الاسلوب ده فى المعاملة
فهل انا عندى حق ازعل ولا ده المتبع من مراكز الصيانه؟؟

**zego** · 09-02-2012 07:36 PM

يا باشا انا جايب العربية من شهر 6 ولغاية الشهر اللى فات انا معاهم كل شهر ونص او شهرين بيطلع لى مشكلة او حاجة كدا فلازم كل مرة اتخانق معاهم بصراحة هم ناس مستفزين جدا لأبعد ما يمكن من أول مصطفى صاحبهم لغاية الصنايعية وسمعت ان توكيل الخدمة اتاخد منهم من شهر كدا يعنى عز العرب سحب منهم الصيانة فسيبك منهم دول اشتغلوا فى سكة النصب والسرقة بس عايز الحق من حقهم يعملوا كدا اذا كان (( ذل القرف )) يعنى عز العرب مالهوش حل بصراحة خلى الشعب المصرى كله يكره بروتون عشان التوكيل فمن رأى اى حاجة خفيفة ممكن تتعمل من غيرهم وبعيدة عن الضمان فكك منهم وفى كذا واحد دلوقتى فى الحسينية بيبيعوا قطع غيار لبروتون و فى واحد اسمه ماجد فاتح محل اسمه اوتو هاشم محترم جدا عنده قطع الغيار وبيعملها بنفسه انسان كويس ومحترم جدا فحرام نضيع العربية من ايدينا عشان توكيل زبالة والمراكز المعتمدة زبالة اكتر منه

**ghoneim** · 09-02-2012 08:20 PM

المشاركة الأصلية كتبت بواسطة zego

يا باشا انا جايب العربية من شهر 6 ولغاية الشهر اللى فات انا معاهم كل شهر ونص او شهرين بيطلع لى مشكلة او حاجة كدا فلازم كل مرة اتخانق معاهم بصراحة هم ناس مستفزين جدا لأبعد ما يمكن من أول مصطفى صاحبهم لغاية الصنايعية وسمعت ان توكيل الخدمة اتاخد منهم من شهر كدا يعنى عز العرب سحب منهم الصيانة فسيبك منهم دول اشتغلوا فى سكة النصب والسرقة بس عايز الحق من حقهم يعملوا كدا اذا كان (( ذل القرف )) يعنى عز العرب مالهوش حل بصراحة خلى الشعب المصرى كله يكره بروتون عشان التوكيل فمن رأى اى حاجة خفيفة ممكن تتعمل من غيرهم وبعيدة عن الضمان فكك منهم وفى كذا واحد دلوقتى فى الحسينية بيبيعوا قطع غيار لبروتون و فى واحد اسمه ماجد فاتح محل اسمه اوتو هاشم محترم جدا عنده قطع الغيار وبيعملها بنفسه انسان كويس ومحترم جدا فحرام نضيع العربية من ايدينا عشان توكيل زبالة والمراكز المعتمدة زبالة اكتر منه

انت متأكد من معلومة سحب اعتماد الصيانه منهم؟؟
انا اعرف ماجد وبتعامل معاه وهو فعلا انسان كويس ويستاهل كل خير بس هو فى الاصل متخصص فى قطع الغيار وبيقدر يحل المشاكل البسيطه والمتوسطه
بس احيانا بتكون المشكله محتاجه حد خبره فى الميكانيكا
متعرفش حد فى المنصورة يكون بيفهم فى ميكانيكا البروتون ويكون عنده جهاز كمبيوتر لكشف الاعطال

**zego** · 09-02-2012 08:44 PM

المشاركة الأصلية كتبت بواسطة ghoneim

وبيقدر يحل المشاكل البسيطه والمتوسطه
بس احيانا بتكون المشكله محتاجه حد خبره فى الميكانيكا
متعرفش حد فى المنصورة يكون بيفهم فى ميكانيكا البروتون ويكون عنده جهاز كمبيوتر لكشف الاعطال

انا معاك فى النقطة دى بس لو فى حاجة صعبة ان رأى تطلع على ذل العرب وأمرك لله لأن الغد هنا مالهمش خبرة قد كدا لأنى مجربهم قبل كدا
بس حكاية جهاز الكشف ده ما أعرفش بصراحة

**a7mednour** · 10-02-2012 03:21 AM

سبحان الله ... انا من اول ما اشتريت العربية والناس كلها بتحذرني منهم ومن انهم نصابين بمعنى الكلمة وما

فيش عندهم ضمير علشان كدة اخدتها من قاصرها واتعاملت مع كم صنايعي برة كويسين ... بخصوص الكمبيوتر

في واحد في سامية الجمل كنت عنده اول امبارح وبيقوللي انه كان شغال في الغد وهوة اصلا صاحب الميكانيكي بتاعي ....هوة تقريبا اسمه controll unit

نصيحة شوف صنايعي ترتاح معاه افضل بكتيير من التوكيل ... على الاقل هتعرف تسلك معاه ... لكن للاسف

التوكيل لما يحرك صباع رجلة الصغير لازم تدفعله ... قمه في النصب والاستغلال
حسبي الله ونعم الوكيل

**eng.m7md.ali** · 10-02-2012 03:32 AM

اللي يخلي الفرع الرئيسي زفت اكيد الفروع اللي في المحافظات هيبقوا ازفت
حسبي الله ونعم الوكيل

**tutankhamoun** · 10-02-2012 07:25 AM

المشاركة الأصلية كتبت بواسطة ghoneim

كنت عملت حادثة بعربيتى البيرسونا الشهر اللى فات وكانت محتاجه تغيير وسمكرة للبابين اليمين ولما رحت للتوكيل اسعارهم معجبتنيش وكنت همشى فقالوا لى انه ممكن يدينى الفاتورة علشان التأمين واعمل الشغل بره بالاسعار المناسبة لى وياخدوا 15% على الفاتورة + 200 جنيه ثمن للمقايسه فقلت ممكن استفيد من فرق الاسعار واعمل كام حاجه فى العربيه كانت موجوده قبل التأمين (غيرت اكصدام امامى على كام خربوش على خبطه فى الشنطه) حاولت افاوضهم فى موضوع الـ 200 جنيه وكان لى عشم مع الاستاذ مصطفى صاحب التوكيل لانى ساعدته فى كام موضوع وكان الرد بالرفض فبصراحه زعلت لانه ادانى ورقه مطبوعه بـ 200 جنيه
الموقف التانى رحت النهارده علشان سمعت صوت وونه فى الماتور زى ما يكون بليه خشنه وطلبت منهم يسمعوا الصوت ويقولوا لى ايه المشكله فكان الرد ادفع 150 جنيه لمجرد انه المهندس يسمع الصوت وكان الاسلوب مش ظريف فى الحديث معى فبرده زعلت على الاسلوب ده فى المعاملة
فهل انا عندى حق ازعل ولا ده المتبع من مراكز الصيانه؟؟

يا باشا أنت لو عربيتك في الضمان و أنت رايح تسألهم على حاجة تبع الضمان يبقى الكشف مجاني أنا بتكلم على النقطة التانية بتاعة ونة الموتور .

و بعدين هو أنت جربت التوكيل عز العرب ؟
شوف خلص سمكرتك و ضبط الصاج عندك في المنصورة و بعدين أبقى تعالى القاهرة في التوكيل على الصحراوي
أو كمل لغاية مركز الصفا (أستاذ عصام صفا ) و الناس كلها بتشكر فيها و هو مركز معتمد من توكيل عز العرب و الناس كلها بتحبه للمعاملة الطيبة و الشطارة و المهارة العالية في الأصلاح .
بلاش موضوع الميكانيكية و أنت لسة في الضمان
لو بتعمل صيانتك بأنتظام مش هاتحتاج ميكانيكي.
مبدئيا أي حاجة محتاجة كمبيوتر يُفضل طبعا في مكان مُعتمد علشان أولا تحافظ على ضمانك و ثانيا علشان الناس بتبقى خبرة في بروتون علشان شغالين عليها ليل نهار .

أنا بعمل صيانتي في التوكيل على طول علشان قريب من بيتي و الحمد لله مش بروح هناك إلا كل صيانة أي كل 10 الاف كم و أعمل الصيانة و أروح بيتي و كله تمام
أتكل على الله و جرب مش كل الناس بتأخد نفس الأنطباع
فيه ناس مبسوطة معاهم و ناس مش مبسوطة و البديل متوفر و هو مركز عصام و صفا .

لو ناويت تيجي
يوم بدري تكون أجازة - و تتكل على الله و تنزل على عصام و صفا من أول اليوم و إن شاء الله كله يتحل و تروح المنصورة سالم غانم و كله تمام معاك .

**asser1** · 10-02-2012 11:41 AM

السلام عليكم ورحمة الله وبركاته
على فكرة يا باشا أنا كنت حاجز برسونا 2012 عند الغد ومعادى أستلمها الأسبوع الجاى وانا بصراحة كنت متردد جدا فى موضوع البرسونا دة بس بعد اللى سمعته دة انا هروح الغى الحجز لأنى معنديش أى أستعداد أخسر فلوسى اللى أنا تعبان فيها علشان توكيل سىء والعربية كمان ناس كتيرررررررر حذرتنى منها

**tutankhamoun** · 10-02-2012 11:53 AM

المشاركة الأصلية كتبت بواسطة asser1

السلام عليكم ورحمة الله وبركاته
على فكرة يا باشا أنا كنت حاجز برسونا 2012 عند الغد ومعادى أستلمها الأسبوع الجاى وانا بصراحة كنت متردد جدا فى موضوع البرسونا دة بس بعد اللى سمعته دة انا هروح الغى الحجز لأنى معنديش أى أستعداد أخسر فلوسى اللى أنا تعبان فيها علشان توكيل سىء والعربية كمان ناس كتيرررررررر حذرتنى منها

اللي حذرك من العربية مالك لها و لا واحد بيفتي و خلاص زي أغلبية الشعب المصري اللي ما بيعرفش يقول ما عرفش ؟

علشان العربية ما شاء الله عليها

بالنسبة للتوكيل ...... أنا معنديش مشكلة معاهم نهائيا و لم أواجه أي معاملة سلبية منهم نهائيا

مع العلم أن المعاملة عادي جدا لا هي فائقة (ما عدا المهندس آمر ) و لا هي سيئة

أنا بقولك تجرتبي أنا الشخصية اللي ممكن تختلف مع ناس تانية .

إنما العربية نفسها ......... أكثر من رائعة و أقرأ من مُلاكها و سيبك من اللي سمع من واحد صاحب أبن خالة أبن عم صاحب العربية الأصلي .

أفتح المواضيع المعمولة للبرسونا و أقرأها براحتك .

ولو عندك أسئلة عايز تعرف اجابتها مش لاقيها في المواضيع
أفتح موضوع و أسأل براحتك

و في الآخر لازم تكون مقتنع 100 % قبل الشراء

أنا بس بقولك ما تسمعش كلام اللي حافظ مش فاهم و اللي مجربش بنفسه

**asser1** · 10-02-2012 03:36 PM

يا كبير اللى حذرنى من العربية والله واحد شغال فى التوكيل تمام بس أنا وقفت ناس كتير راكبين العربية وسألتهم عنها قالولى العربية كويسة بس عيبها قطع غيارها غالية فقولت مش مشكلة موضوع غلاء قطع الغيار لأنى مش كل شوية هغير يعنى وأكيد الواحد بيبقى عامل حسابه لأن العربية زى ما أنت عارف بتبقى زى بيت تانى وبعدين انا من المنصورة ولما التوكيل عندنا يبقى بالمنظر دة يبقى حضرتك منتظر أنى أعمل أيه أروح مصر كل لما أكون عاوز أعمل حاجة فى العربية طبعا دة مش طبيعى ولا كل حاجة حاجة أروح للمهندس أمر علشان يحلها هوة مفيش غيرة اللى بيحل يبقى طبعا هناك تقصير جامد جدا فى موضوع التوكيل وأدارته بس انا هقولك الصراحة شخصيا العربية عجبانى جدا هية تقفيلها فيه بعض العيوب والخامات الداخليه بردوا مش كويسة أوى بس دة بيرجع للى راكب العربية فى استخدامة لكن موضوع التوكيل وقطع الغيار دة هوة اللى قالقنى وكمان كان فى دكتور زميلى شغال فى الغردقة بحلفلى بالله أنه العربية جابت وش سلندر منه فى الغردقة وعلشان يصلحها جاب ونش وشال العربية علشان يوديها التوكيل شوف بقة التكلفة سيبك من التكلفة لكن حلفانه أن العربية فضلت شهر لحد ما أتصلحت فأنا بصراحة متردد ومش عارف أعمل أيه وفى ناس قريبى معاهم لانسر سوبر أكشن وبيشكروا فيها جدا وكل المواضيع اللى متعلقة بالبرسونا هنا الناس بتشكر فيها بس تعبانة من موضوع قطع الغيار والتوكيل فأنت رأى حضرتك أيه فى الكلام دة لأنى فعلا بعد اللى سمعته دة انا بفكر جديا الغى الحجز ومعلش لو كنت طولت عليك بس دة عشمى بقى وشعب فستك ههههههههههههههههههههه