تحديد حارات كورنيش اسكندرية رديء جدا
اليومين دول تتجهز العروس لاستقبال الزوار
من ضمن تجهيز العروس هو تحديد حارات طريق الكورنيش و لكن بكل اسف الدهان يتم عن طريق مقاول نص كم و امكانياته محدوده جدا بدلا من ان يسند هذا الموضوع الي شركة متخصصة
فاثناء ذهابي للعمل في الصباح الباكر تجدهم يلمون شغلهم بشكل بدائي جدا معرضين حياتهم للخطر يعني تلاقيهم يجروا وسط العربيات و طبعا حضراتكوا عارفين السرعة علي الكورنيش بقت شكلها ازاي
الدهان سيء جدا و مبرطش و يتم يدويا بدلا من السيارة الاتوماتيكية المخصصة لذلك
كل الناس ستلاحظ عدم استواء علامات تحديد الحارات يعني مش حتشوفهم علي استقامة واحدة و خصوصا في المنحنيات زي المنحني اللي في سيدي جابر امام مستشفي القوات المسلحة و انت رايح علي محطة الرمل
بعيدا عن عبارات الضمير و ان كل واحد لازم يراعيه نفسي افهم ليه ما يبقاش فيه رقابة من اجهزة المحافظة علي الحاجات دي .. هي دي برضه مش فلوسنا و فلوس 20% ضرايب و لا لازم نستني لغاية ما الموضوع ينتهي و الصحافة تنتقده و ييجي المسئول يصرح انه تمت معاقبة المقصرين طيب ما نلحق المصيبة و هي حاصلة قدامنا كلنا
يعني مثلا الكورنيش ده من الشوارع الخلفية ما فيش مسئولين بيعدوا فيه عشان يلاحظوا التهريج اللي حاصل ده
ربنا يستر علي البلد و علينا
محمد فهمي