المياه الخضراء

**zego** · 09-02-2012 07:48 PM

لو سمحتم ممكن حد يفيدنى فى الاستفسار ده هو المياه الخضراء المفروض الواحد يزودها من اللى القربة اللى واصل منها خرطوم لى الردياتير والا من الردياتير ذات نفسه
وامتى الواحد يزودها هل لاما القربة اللى هى لونها ابيض تنقص والا امتى بالظبط
وهل فى انواع للمياه الخضراء معينة للبروتون والا كله زى بعضه وايه احسن وانضف الانواع
وهل بيتحط المياه الخضراء من غير اضافة عليها مياه عادية
وشكرا لكم لسعة صدركم

**a7mednour** · 10-02-2012 03:30 AM

والله يا باشا انت المفروض فترة والتانية تشيك على القربة وتشوف الخرطوم اللي ساقط فيها مبلول من اثار المياه ولا لا ...انا كان عندي الحرارة بتزيد على طوول لما بصيت لقيت الخرطووم ناشف ... واحد قاللي حرام عليك ممكن تضرب جوان معاك من الحرارة وتجيب وش سلندر ... من يومها دوريا ببص عليها كل يومين قبل ما ادور ابص على المياة والزيت وكدة يعني ...
عموما انا اللي اعرفه انك تزود في القربة البيضاء لغاية قبل ماتتملى بحاجة بسيطة ولو عاوز تحط تحت غطاء الرادياتير برده مفيش مشكلة ...
والمياة تقريبا كلها واحدة الجركن يعمله حوالي 15 جنيه مكتوب عليه سعودي وهوة صيني ...
اهم حاجة بس عينك على الخرطوم من اسبوع للتاني وربنا يباركلك فيها

**zego** · 11-02-2012 12:26 AM

متشكر يا باشا ربنا يخليك

**Al-Farooq** · 12-02-2012 03:03 AM

خلي بالك ياباشا تركيز مضاد الصدأ او التأكل بتاع الماية اللى هتزود بيه يكون بين 25 و 35% ، أكثر من كدة غلط واقل من كدة غلط.

**zego** · 13-02-2012 06:06 PM

المشاركة الأصلية كتبت بواسطة mount

خلي بالك ياباشا تركيز مضاد الصدأ او التأكل بتاع الماية اللى هتزود بيه يكون بين 25 و 35% ، أكثر من كدة غلط واقل من كدة غلط.

مش فاهم يا باشا النقطة دي ممكن بعد اذنك توضحها ليا اكتر واكتر
يعنى هو انا ياما اجيب الجركن بتاع المياه الخضرا ما احطهوش كله واحط عليه مضاد للصدأ والا مياه عادية

**Al-Farooq** · 13-02-2012 07:37 PM

المشاركة الأصلية كتبت بواسطة zego

مش فاهم يا باشا النقطة دي ممكن بعد اذنك توضحها ليا اكتر واكتر
يعنى هو انا ياما اجيب الجركن بتاع المياه الخضرا ما احطهوش كله واحط عليه مضاد للصدأ والا مياه عادية

لو رجعت للكتالوج هتلاقي النقطة دي ، شوف نسبة التركيز اللى مكتوبة على الجركن بتاع المياة اللى بتشتيرها لو كانت 5% متنفعش ، ولو كانت 95% متنفعش (التركيز ال95% دي هتلاقيها علبة صغيرة 200 ملي تقريبا او اقل فى حدود 20 جنية) - لازم تكون نسبة بين 25 و35% لأن زي ما الكتالوج بيقول إذا التركيز زادت عن كدة هيأثر تأثير عكسي على الموتور. ، ممكن ترجع لصفحة 127 - سائل تبريد المحرك / مضاد التآكل- مضاد التجمد.

**sabregas2010** · 13-02-2012 09:24 PM

المياه الخضراء بتتزود من القربة والمفروض ان القربة فيها علامتين اللى تحت حرف E والعلوى حرف F
والمفروض ان المياه فى القربة متعديش حرف F ولو بصيت على المياه ولقيتها اقل من حرف F ممكن تزودها بحد اقصى حرف F متضفش عليها مياه عادية

**zego** · 14-02-2012 11:47 AM

متشكر لكم جدا يا جماعة والله

**zego** · 14-02-2012 03:16 PM

انا لاقيت مياه خضرا نوع اسبانى لتر بس التركيز 20% ب20 جنيه لان كان فى الجركن الكبير 5% وب 30 ج و 40% ب15 جنيه و ده مصرى فأنا ما لاقيتش مناسب الا ال20%

**zego** · 14-02-2012 11:32 PM

المشاركة الأصلية كتبت بواسطة zego

انا لاقيت مياه خضرا نوع اسبانى لتر بس التركيز 20% ب20 جنيه لان كان فى الجركن الكبير 5% وب 30 ج و 40% ب15 جنيه و ده مصرى فأنا ما لاقيتش مناسب الا ال20%

ياريت حد يفيدنى فى النوع ده