الموضوع: مشكله هتخلينى أسقط موتور لأبيزا 2001

أصدقائي الأعزاء
اتعرضت لمشكلتين ورا بعض خلال أسبوع واحد .. والنتيجة إن الميكانيكي بيقولى لازم اسقط موتور .. وانا عربيتى ابيزا 2001 وكان فيها موتور 1400 واحد كامة.
هحكيلكم حكايتي من البداية
كنت ماشي بالعربية وبدأت تظهر شوية أصوات كده على خفيف في الموتور وراحت وبعدين رجعت تاني .. المهم إني كنت مشغول شوية وعمال امشي بالعربية لغاية ما أفضى وأروح للميكانيكي
لغاية في يوم وانا ماشي راحت العربية مبطلة منى خالص .. واجى أدور يقوم المارش يدور بسرعة والعربية ماتدورش .. المهم انى نقلت العربية للورشة .. والميكانيكي بص عليها وقاللى كده سير الكاتينة اتقطع .. لكنه لما فك الوش اللى بيغطى السير لقى السير سليم .. ولقى رايش حوالين السير .. فقالي كده الموتور جاب صبابات وعمود الكامة فيه حتة اتاكلت فيه وفي الترس .. وكده يبقى لازم أجيب وش سلندر من الآخر بدل ماجيب الحاجات دي لوحدها وشغلانة كده وكمان هتبقى هيا هياها.
طبعا أنا ماكدبتش خبر وروحت نازل الحرفيين وجايب وش سلندر استيراد، وجبت واحد كشف عليه هناك وقاللى تمام، ووديته للميكانيكي وقاللى تمام وركبه.
وحط نفس الزيت اللى كان في الماتور القديم بعد ماصفاه.. لاني كنت جايب الزيت موبيل 1 ب 260 جند .. ويادوب كنت مشيت بيه 800 كيلو بس من أصل 10000كيلو
ولما روحت آخد العربية قاللى دي العربية متكتفة عشان طرمبة البنزين عندي بعافية شويه وقاللى ان البوجيهات هيا كمان ضايعة .. وقاللى نعمل بالمرة كمان طقم سيرفس
قومت مروح العربية على البيت عشان انا كنت رايح اخد العربية يوم (السبت) وطبعا هما يوم (الأحد) قافلين .. وقفت العربية عند البيت ومارضيتش أمشي بيها وقضيتها تكاسي عشان كنت مقلق .. ويوم (الاتنين) خدت العربية وجبت بوجيهات وفلتر بنزين والميكانيكي قاللى ان عنده طرمبة بنزين استيراد .. وروحت واخد بعضي ورايحله ركب البوجيهات وفلتر البنزين وطرمبة البنزين
ولما اتحركت بالعربية لقيتها فعلا فرقت جدا جدا .. وخدت بعضي وروحت بالليل.
تاني يوم (الثلاثاء) .. اتحركت مشوارين صغيرين ماكملوش 20 كيلو.
ثالث يوم بقى (الأربعاء) .. روحت مشوار لغاية أكتوبر .. وانا راجع بالليل عند الوصلة بتاعة الدائرى كنت ماشي على 120 و 130 كيلو .. والعربية زي الفل .. وبعدين لقيت العربية معايا عمالة تهدي تهدي وانا مش فاهم ايه اللى بيحصل .. لقيت واحد بموتسيكل هارلى جه جنبي وقاللى ده فيه صوت عالى طالع من العربية وكمان فيه دخان كتير طالع من الشكمان .. طبعا لما فتحت الإزاز بدئت اسمعه
روحت مهدي عشان اجي على جنب وقبل ما أقف خالص العربية راحت مبطلة منى ولمبة الزيت منورة .. ودورت مرتين ماداريتش .. وفي الثالثة دارت بس فيه صوت تخبيط جامد في الموتور ولما نزلت ابص عليه لقيته بيترج جامد.
روحت جايب عربية انقاذ ونقلت العربية عند الميكانيكي وكلمته .. وهو ماكنش في الورشة لكنه حصلنى على هناك
ولما بص قاللى كده العربية جابت بيل والموتور كده شكرا .. ولما سألته ايه اللى حصل .. قاللى انه طرمبة الزيت علقت أو وقفت .. وبالتالى ما بقتش بضخ زيت للموتور .. وكده يبقى باظ
طبعا أنا محتار في الكلام ده .. ومش عارف .. ناس يقولولي .. يبقى ده بسبب غلطة من الميكانيكي لما ركب وش السلندر .. وماخليهوش يعمللى حاجة تاني في العربية
وناس يقولولى لأ انها مش غلطته وانه الطرمبة ممكن توقف عادي يعنى وانه ده بيحصل كتير وخصوصا انه لما ركب الوش ما فكش الجزء السفلى من الموتور.
طبعا أنا مش عارف أحكم
وبرضه محتار في موضوع الموتور .. اسقط 1400 زي اللى كان فيها ممكن يبقى كامة أو 2 كامة .. ولا أسقط موتور جولف .. وبرضه أسقط عنده ولا ابعد عنه واسقط عند غيره .. واجيب الموتور من الحرفيين ولا من بورسعيد ولا منين
بجد محتار مش عارف آخد قرار.
وكنت كلمت الباشمهندس المحترم جدا جدا ايهاب منصور كتر خيره وأخدت رأيه .. بس انا قولت اطرح الموضوع على العام عشان استفيد وكمان الناس تستفيد من اللى حصل ومن اللى هيتقال