الموضوع: للبعض ........ هذا لا يليق

المشاركة الأصلية كتبت بواسطة a.saad

طالعت فى الفترة الاخيرة عدة موضوعات تندرج كلها تحت بند واحد
تصفية خلافات وحسابات قديمة
والاسباب للاسف واهية
كان يمكن اجتنابها
الا ان الوضع تطور
وياريتها كانت عن احداث جسيمة
الا اننى اجدها احداث صغيرة
يترفع منا الكبير عنها
للاسف
ليس هذا ما كان متوقعاً من البعض
ليس هذا ما كانت عليه الاخلاق التى نعرفها عنهم
اكتب هذه الكلمات والحزن يملؤنى

لان الكلام دا يتعلق اساسا بموضوعي فا ياريت صدرك يتسع لردي كما اتسع للاستماع لاخرين لاني معنديش وسيلة للتواصل معاك غير صفحات المنتدى

مش عارفة بناء على ايه حضرتك اجزمت ان الموضوع تصفية خلافات و حسابات قديمة لانه لو كان كدا كان ابسط ما فيها اني اذكر اسماء الاعضاء اللي صدر منهم الافعال دي

و زي ما قلت سابقا ممكن حضرتك تكون شايف ان الاحداث لم تكن جسيمة و لكن من وجهة نظري انا ان الاحداث دي كانت جسيمة جدا و غير مقبولة على الاطلاق يمكن لاني ماصدفتهاش سابقا او مش متعودة ان التعامل بين الناس يكون اساسه الغيبة و النميمة و الإساءة و ان دا يكون عادي و متقبل

يعني مثلا لما عضو من اكتر الاعضاء المحترمين في المنتدى كله و شخص خدوم جدا لاقصى درجة و مفيش حد بيسأله عن استشارة في مجال العربيات و بيبخل عليه ابدا و لكن الشخص دا لانه محترم بيرفض ان زميل تاني ليه يغتاب في حضوره و لو دا حصل بيرد غيبته و بيرفض الاسأءة لزميله يقوم يكون جزاءه انه يطلق عليه كلب فلان !!!!!!!! لانه تحلى باجمل الصفات و اكثرها احتراما بانه يرد غيبة زميله او صديقه فايكون جزاءه ان يشبه بالكلب ..... لو حضرتك شايف ان دي صغيرة فانا مش شايفاها كدا


لما شخص اداري بالمنتدى يتم التشهير بيه على صفحات موقع تاني و يتشارك الناس بالتريقة عليه و الاستهزاء منه لمجرد اعتراضهم على طريقة ادارته او اختلافهم معاه في الرأي فا انا مش شايفها صغيرة لاني بقالي اكتر من 5 سنين بشتغل و ياما كان ليا مديرين بختلف معاهم و بيحصل بينا مشاكل و ممكن نشتكي بعض لكن عمري ما فكرت اعمل بوست على الفيس بوك ندخل نتريق انا و زمايلي على هذا المدير اطلاقا

لما شخصين في المنتدى يكون بينهم تنافس في مجال ما من مجالات العمل و الاقي واحد فيهم بيدعي ان التاني غشاش و نصاب و بضاعته معيبة و شغله كزا كزا كزا و يذم فيه و في ضميره و في اخلاقه و بيشترك هوا و مجموعة من المقربين ليه برضو في التريقة على الشخص الاخر و الاستهزاء منه يبقى دي منافسة غير شريفة و اكيد في نظري الشخص دا لا يحترم و الحدث دا مش صغير

لما شخصية مايكونش في بيني و بينها اي خلاف اصلا و واكلين مع بعض عيش و ملح و المفروض ان احنا اصدقاء و في بيننا حب و احترام و الاحظ انها اتغيرت معايا و اواجهها بالشعور دا و اقولها انتي في حاجة مضايقاكي مني او انا زعلتك في حاجة من غير قصد و تقولي لأ خااااااالص احنا صحاب و حبايب و ليه بتقولي كدا و اكتشف انها من ورايا بتغتابني و بتشارك مع اخرين في الاستهزاء مني يبقى دا موقف مش صغير

لما شخص بينك و بينه تعارف و احترام من خلال المنتدى و يعتبر دخل بيتك و اتعامل مع احد افراد اسرتك و ماشفش منك غير كل احترام و على صفحات المنتدى في بينكم ود و مشاركات ظريفة في مواضيع كتير و لما يحصل و تختلفوا مرة في موضوع و يحصل بينكم مشادة هل دا يديلوا الحق يروح يعمل بوست على الفيس بوك باسم شبيه لاسمك المستعار و يعمل عليك حفلة تريقة هوا و اصحابوا .... دي برضو انا مش شايفاها صغيرة

يمكن انا مش شايفة كل الحاجات دي ضغيرة لاني عمري ما فكرت اتعامل مع حد بالطريقة دي ولا تقبلت انا اتعامل من قبل حد بالطريقة دي

و اذا كانت المواقف دي يترفع عنها الكبير منكم فالحمد لله اني مش كبيرة للدرجة دي و ان اخلاقي مازلت لا تترفع عن مثل هذه الامور ولا تراها بسيطة او غير جسيمة على الاطلاق