أعادة كشف علي العربية في أوتو أيجيبت بعد صيانة الـ 80000 و تغيير التيل
السلام عليكم
أنا كنت عملت صيانة الـ80000 في أوتو أيجيبت بتاريخ 31/12/2011 يوم اللقاء الجماعي الجميل مع أخواني و احبائي بالمنتدي
بعد الصيانة دي المفروض العربية ترجع لأحسن حالاتها من حيث الأداء لأنها أكبر صينة للعربية زي صيانة ال40000 يعني بيتغير فيها كل زيوت العربية من موتور و فتيس و باور و فرامل إلي مياة الريدياتير مع كل فلاتر العربية مع تقرير شامل بحالة العربية بالكامل و اي قطع أضافية مطلوب تغييرها في المستقبل
بعد الصيانة بقيت بحس بالعربية مكتومة شوية أو مخنوقة في السحب و الفتيس نقلاته أبطأ من المعتاد مما يؤثر علي سحب العربية
و بعد مراجعة ضغط الكاوتش لقيت أنه فعلا مش مضبوط و دي كانت نصيحة الأخ الفاضل أحمد بك مصطفي و تحسن أداء العربية نسبيا
و بعد الأستعمال حوالي 2000 كم ولقيت الحال زي ماهو أتصلت بالمهندسة / أمينة اللي كانت في أستقبالي الصيانة السابقة و حكيت لها علي المشكلة و هي حجزتلي ميعاد للكشف علي العربية فعلا
و رحت أوتو أيجيبت السبت 11/2/2012 و دخلت العربية للكشف مع طلب تغيير تيل الفرامل المامي مع خراطة الطنابير و تغيير كاوتشات تراب المساعدين الأماميين ( كانو أصلا عايزين يتغيرو ) و لقيت عندهم عرض خصم 25% علي المصنعيات و 10% علي قطع الغيار
و فعلا
- تم الكشف علي الموتور و أعادة ضبطه بالكمبيوتر مع مراجعة كل الموديولز الخاصة بالموتور و الفتيس مجانا
- تم تغيير تيل الفرامل مع خراطة الطنابير بأستعمال الجهاز الجديد و تغيير كاوتشات تراب المساعدين الأماميين
- تم أعطائي تقرير شامل بحالة العربية مجانا و تبين أن قراءات الموتور ممتازة و لا يوجد به مشاكل
مع أضافة ملاحظات بالقطع المطلوب تغييرها بالعربية سواء في المدي القريب أو البعيد
و كان أهم ملاحظة ان قراءة البطارية سيئة للغاية و يجب تغيير البطارية في أقرب وقت و هنا تذكرت أستاذنا الكبير المهندس سبعاوي باشا و اول تقرير له عن اداء الفتيس الأتوماتيك للصني المرتبط بقوة البطارية و إن شاء الله حغير البطارية يوم الجمعة القادم
مع ملاحظة ان اداء العربية و انا راجع علي الطريق كان أفضل برضه نسبيا و صوت الموتور كان أهدا و اعتقد الأداء حيتحسن مع تغيير البطارية إن شاء الله
العربية دخلت الصيانة اول ما وصلت المركز بالرغم من أني تأخرت ساعة و مخدتش بالصيانة او الكشف وقت دخلت الساعة 10.30 تقريبا و خرجت للغسيل الساعة 12.00 تقريبا برضه
لكن الغسيل أخد ساعة وده كان ضايقني و لما كلمت المهندسة قالت حتستعجلهم بس المهم تاخد العربية نظيفة و المفاجاة لما أستلمت العربية الساعة 1.00 كأنها مغسولة في مركز متخصص و نظيفة صالون و جسم خارجي مع رش التابلوه بملمع التابلوه و دي كانت لمسة جميلة منهم
أحب أشكر مركز أوتو ايجيبت متمثل في المهندسة أمينة اللي أول ما قلتلها عن المشكلة لم تتردد أو تجادل بل أجابت فورا نحجز ميعاد للكشف علي العربية و برضه تعبتها بطلباتي الكتير و أنا هناك كتر خيرها
و كمان أشكر أخي و حبيبي أحمد بك مصطفي اللي نبهني أني أخد معايا البالطو عشان الهواء هناك جامد و تلج و برضه نشفت :)
