قانون العمل !!!! ما فائدته ومن يطبقه ؟؟؟؟
عايز احكيلكم تجربتي مع شركتي ومع فصلي التعسفي ومحاولاتي الفاشلة أخد حقي بالقانون
اولا انا شغال في الشركة دي بقالي اكتر من 4 سنين ويعتبر اقدم موظف عندهم
مش هحكي عن طريقة إدارة الشركة دي وصاحبها لان باختصار محدش في موقفي هيمدحهم
المهم اني كنت مستني دوري على مدار مدة خدمتي لمشكلة وانهاء عملي في اي لحظة وحاولت جاهدا البحث عن عمل آخر لكن لم أوفق
بعد الثورة وبالتحديد في مرتبات شهر فبراير تم تخفيض مرتباتنا ل 30% يعني بدل راتب 3000 تقبض 1000
وشوية وراح مصفي نص الشركة
على فكرة انا من الناس اللي اتصفت بس رجعت تاني
وشوية وراح مصفي موقع الشركة نفسه وانضمينا لشركة شقيقة في مقرها
من ساعتها والمعاملة بقت زي الزفت واسوء مما تتخيلوا كنوع من التلكيك لتقليل عدد الموظفين
وبدأت الناس اللي مشاهم يرفعوا قضايا على الشركة ومنهم اللي كبر دماغه ومنهم اللي كمل
وكل ده وانا مستحمل لحد شهر 6/ 2011 وبعد كتب كتابي بالظبط ب 10 ايام حصل اختلاف عادي ولقيته فجاة واحدة راح شاتمني (اول مرة تحصل مع اي موظف رغم حدة الخلافات اللي كانت بتوصل سابقا للطرد الفوري من الشركة)
انا مستحملتش خدت بعضي وسبت الشركة ومشيت تجنبا اني اعمل اي مشكلة خصوصا ان احنا مش في مقر شركتنا واني بحترم صاحب الشركة التاني
مفيش نص ساعة ولقيت المدير الاداري بيكلمني ويبلغني رسميا اني ممنوع من دخول الشركة نهائيا
تاني يوم الصبح روحت طلعت على قسم مصر الجديدة وعملت محضر وقالولي تابعه في النيابة
وخدت رقم المحضر وبعد كده توجهت لمكتب العمل فورا وفت تحقيق معايا وفي الاخر قالي هنستدعي صاحب الشركة او من ينوب عنه لمحاولة الصلح
طبعا راحت الاستدعائات وهم ظبطوا الموظف وبعدها تقريبا ب 10 ايام كان ميعادي رحت ومحدش حضر من الشركة واعاجوا استعدائه وبعدها ب 10 أيام برضه محدش حضر
قالي تعالي ب 10 ايام خد راقم الصادر وتابع في محكمة العمال في العباسية
كل ده وانا مقتنع ان في قانون لازم ينفذ وانا لي حقوق والمحامي عملي البحر طحينة و اتفاقنا ان هو ليه 25% بعد استلام التعويضات والمستحقات وخد مني مبلغ صغير لزوم المصاريف وقالي يخصم وقت لما ييجي التعويض على فكرة المحامي ده مشهور في منطقتنا بانه حوت قضايا تعويضات
تعالى بقى للمحكمة خدت تأجيلات من نص شهر 7 الى الان بدون ان ينظر في القضية اصلا هو القاضي بيخش يأجل بال 6 شهور لكل القضايا
مستنداتي للقضية :
1 - محضر اثبات حالة
2- اثبات اني لي شهود على منعي دخول الشركة
3- مفردات مرتب من البنك
4- تأمينات اجتماعية
وبعتنا انذار على يد محضر للتأمينات الاجتماعية ومازال اسمي مسجل على زمة الشركة حتى الان والشركة ممتنعة عن دفع مديونياتها من فترة كبيرة
وبعتنا انذار لهيئة الاستثمار
طبعا إدارة الشركة خدت قرار بسيط خدا وهو تصفية الشركة نهائيا ولانها شركة مساهمة فلا يحق الرجوع على أصحاب رأس المال
ويتم قسمة الغرماء
وعلى اي شيء يتم القسمة ماهو مفيش اصول خالص
وراح هيئة الاستثمار وطلع سجل تجاري بان الشركة تحت التصفية واتعين مصفي قضائي
وانا عايش مع المحاكم ومتوقع بعد لما اخد الحكم تكون الشركة اصلا اتصفت
وهم الشركة دلوقتي فتحوا شركة جديدة وعايشين حياتهم عادي بدون اي تأثر مع تغيير بسيط لا يلاحظ في اسم الشركة
عملي ايه قانون العمل ؟
قانون العمل معرفش يحميني وانا في الشركة ومعرفش يحميني لما اتطردت منها وعندي كل الاثباتات والمستندات
معلش طولت عليكم بس حبيت اوضح تأثير قانون العمل في بلدنا علشان في ناس بتسخن زي حالاتي ويركبوا دماغهم مبيحاولوش يفكرو في اي حل سلمي حتى لو فيه بعض التنازل
