الموضوع: العربية عليها عفريت

السلام عليكم
يا جماعه انا راجع من شغلى عادى جدا من اكتوبر لغاية البيت فى امبابه مفيش اى مشاكل نهائى ... ركنت و طلعت اجيب شويه حاجات و نزلت رايح مشوار - الفاصل الزمنى لا يتعدى نص ساعه يعنى العربية لسه سخنة مع انها و هى بارده مفيهاش مشكلة - بدور مش عايزة المارش شغال و البطاريه فله روحت فاكك سلوك البوجيهات لقيتها بتوصل شرارة كويس و كذلك البوبينة شرارتها كويسة و فكيت فلتر البنزين و اديت سنه مارش لقيت البنزين بيضرب يعنى الطلمبة و الفلتر مفيهومش مشاكل .... روحت جبت كهربائى بص و قعد عمل نفس الكلام و فى الاخر فك وش التاكيهات و خلانى دورت العربية دارت - كان فيها ايه يا ريس قالى كانت مخنوقه و فكينا الخنقه ..سالته يعنى ؟؟ فهمت فى الاخر انه مش عارف السبب الحقيقى - كل ده مكملتش ربع دقيقة و العربية بطلت تانى
قالى دور و بقى يزود بنزين بقت تدور و مخنوقه جدا و علبه الفلتر بتاع الهوا بقت تعمل فرقعات فقالى شوف ميكانيكى
روحت لميكانيكى تعالى يا عم شوف الملبوسة دى مالها حكيتله القصة كلها
قالى دى ممكن يكون سير الكتينة نط من مكانه او خلفت تقسيمه .. قولتله يا عم ازاى دا انا ماشى بعد ما غيرت سير الكتينة يجى 10000 كم و قالى ممكن تكون كسرت كامة .. فتحنا الوش بتاع التاكيهات تانى عشان يشوف الكامة قالى لا كويسه مفيهاش حاجة بس تعلالى بكرة عشان افك ال head اللى فيه الكامه عشان فى حاجة بتقفش جوه فهشوف فيها ايه يمكن الفتحات اللى بتطلعلها زيت اتسدت و انا مكنتش شايف فتحات انا شوفت العمود كله غرقان زيت

حد يفيدنى بالله عليكم منعا لتخاريف الصنايعيه و لخسارة الوقت و المال و الجهد
و جزاكم الله خيرا و اسف جدا على الاطاله

بلاش تحاول تدورها لأن ممكن تكسر شاكوش او تعوج صباب زى ما حصل معايا

فك الهيد و شوف ايه الموضوع

هيه العربيه عامله كام الف؟
و الزيت نوعه ايه ؟ و شغال بقاله كام الف؟