الموضوع: حدث فى ابورواش .... مع استفسار

انا عربيتي m11 معايا من 10 /2009 والعداد دلوقتي عامل اكتر من 55 الف كيلو واجهتني بعض المشاكل وكان الضمان محترم جدا في كل المواقف و الله ناس محترمه

ليا رأى متواضع فى الموضوع ده:

انا شايف العيب القاتل فى ابو الفتوح عدم توافر قطع الغيار بصفة دايمة فانت لو عندك قطعة محتاجة تتغير على الضمان ومش متوفرة هتدوخ وتتهرى اتصالات معاهم لحد ماتتوفر القطعة وتغيرها وطبعا طول الوقت ده انت متعصب ومضايق ولكن اللى لاحظته هو بصراحة لو القطعة موجودة مش بيتأخروا فى تغييرها على الضمان نهائيا

مثال على كلامى انى اول ما اشتريت العربية وفى صيانة الالف الاولى كنت بشتكى من صوت تزييق فى الطارة وكان السبب انها محتاجة بلية بطاحة امامى شمال وتخيلوا انها مكنتش متوفرة من وقتها فى شهر مايو 2011 وفضلت اتصل بيهم لحد شهر اكتوبر 2011 لحد ماتوفرت وتم تغيرها فورا!!!!

عامة مش قادر احكم على التوكيل حكم قاطع لان الحمد لله محصلتش مشكلة كبيرة معاهم ولكن اللى لاحظته ان معاملتهم بتكون كويسة اوى وبنظام ان كانت الدنيا مش زحمة فى اليوم اللى انت رايح فيه والعكس صحيح لو الدنيا زحمة بتلاقى هرج ومرج وعربيتك بتتأخر فى الورشة ولما تيجى تستلم تحس انك فى سويقة ولا حد بيراجع معاك ما تم اصلاحه واخر مسخرة بصراحة

تحياتى

شكرا على ردكم الجميل بس صيانة ال30000 تتكلف كام و بيتعمل فيها ايه

المشاركة الأصلية كتبت بواسطة tiggosaid

كلام حضرتك مظبوط 100%، الناس دى فعلاً محترمة، وفعلاً هما افضل ناس تصلح اسبيرنزا، انا معايا تيجو وحصل معايا فصل بايخ من اسبوعين وهو ان الفيشة البتوصل كابل الفتيس مع مجموعة الحركة اتكسرت،وانا على طريق، واتصلت بالخدمة السريعة وفى اقل من ساعة لقيتهم امامى وصلحوا الفيشة بشكل مؤقت لغاية مااروح اغيرها فى مركز الخدمة، وطبعاً انا استبعت مركز الخدمة وقعدت الف وادور على الورش ومحلات قطع الغيار الخارجية لمدة اسبوع، بدون جدوى وطبعاً كان العيب رجع تانى واتصلت بالخدمة السريعة تانى وعملوها برضة مؤقت، وتانى يوم من الفجر احترمت نفسى ورحت الصحراوى كنت عندهم الساعة 8 الصبح الساعة 10 كنت فى بيتنا والعيب اتصلح ودفعت 47 جم. فعلاً افضل مكان صيانة للاسبيرنزا هو ابو الفتوح

بالتأكيد افضل مكان لاصلاح وصيانة الاسبرنزات هو ابو الفتوح وخاصة مركز خدمة ابو رواش .. ببساطة هم اللى مجمعين العربية فهم اكتر ناس تفهم فيها

مازلت اؤكد ان لو حسيت ان فيه استهتار بملاحظاتك او مشاكلك فده سببه حاجة من اتنين يا اما قطعة الغيار مش متوفرة (متفقين ان ده عيب قاتل) يا اما فيه زحمة وهم مش مستوعبين كمية الشغل اللى عندهم (عيب قاتل تانى).

تحياتى