وأخيراً إستريحت من بزابيز الـ 17
السلام عليكم ورحمة الله وبركاتة
أنا خلاص إستريحت .. بس حبيت أشارككم الراحة اللى أنا حسيت بيها
عربيتى كيا سيراتو جنط 17
وطبعاً واجهت نفس المشاكل .. العفشة الناشفة والبزاااااااااااااااااابي ز اللى بتطلع فى الكاوتش
العربية معايا بقالها سنتين وغيرت فيهم 4 فرد كاوتش
واحد منهم كومهو بـ 550 جنية
2 ميشلان بـ 1450 جنية الفرده
وبعديها 1 ميشلان وكانت رخصت شوية بـ 1250
بعديها لقيت عندى فرده بزبزت .. قلت أجرب البريدجستون
كنت ناوى أغير فردتين والفردة كانت 1155 .. بس مكنتش موجوده فى التوكيل وكنت هانتظر عليها أسبوع
لحد ماربنى كرمنى بمطب محترم على الدايرى أخد فى وشه فردتين مرة واحدة .. واحدة فرقعت والتانية بزبزت .. ( وكان فيه حوالى 20 عربية راكنين على جنب بيغيرو برده اكاوتش )
قلت مابدهاش وأخذت القرار
هاغير ال17 يعنى هاغير ال17
قعدت أسأل وألف وأدور فى النت وأسأل ناس وأدور فى المحلات على الجنوط ال 16
بس للأسف المحلات كلها أشكال الجنوط ال16 اللى فيها قليلة أوى .. وكمان كان عندى مشكلة .. إنى عايز أدخل الجنوط الجديدة فى القديمة وأدفع الفرق
رحت على مركز الفردوس اللى فى أحمد سعيد .. لقيت جنط بس مكنتش مقتنع بيه أوى .. قاللى صناعة تايوانى وكان عامل 2900 جنية .. وقاللى عندى بريدجستون أسبانى عامل 850 جنية وتثمنلى الجنوط القديمة بتاعتى ب 1500 جنية .. قلت مسكتش برده وألف وأدور ... ولقيتش أشكال عجبانى وفى ناس قالتلى هانشترى جنوطك ب 800 جنيه .. لحد ماربنا أكرمنى وواحد نصحنى بـ أشرفكو اللى فى السواح .. رحت هناك لقيت ناس أكثر من محترمة .. وأشكال كتير .. المهم عجبنى شكل منهم .. قاللى ده صناعة ماليزى .. بـ 2200 ( الناس نصحونى قبل ماروح إنى لازم أفاصل معاه أخدتهم بـ 2000 ) .. وقاللى على الجنوط بتاعتى بـ 1500 ( برده كان بيقولى فى الأول 1200 ) .. نيجى للنقطه المهمة اللى هيه الكاوتش ..
فى البداية سألته على البريدجستون أو الميشلان أو أى نوع معروف .. قاللى على الستار ماكس .. كاوتش تركى .. وقاللى كمان لو عايز تركبه على ال 17 ركبه ومش هايعمل معاك بزابيز لأنه الجوانب بتاعته ناشفة ... قلتله لأ خلاص .. أنا قررت التغيير وقلت مش فارق بقى الكاوتش .. جبت الستار ماكس الـ r16/55/205 الفرده بـ 550 جنية
يبقى المجموع 2200 جنوط + 2200 كاوتش - 1500 الجنوط القديمة = 1900
دفعت 1700 شاملة التركيب والوزن والترصيص ونفخ الكاوتش نيتروجين صافى ( بدون خلط ) ومشيت
بس ماقولكومش على الراحة النفسية اللى كنت فيها
بقيت أخد المطبات يمين وشمال وأنا مروح .. فرق السما من الأرض ... فرق رهيب فى الإحساس بالمطبات
اللى لسه مجربتوش الثبات .. انا عارف أكيد إنها هاتأثر على الثبات شوية .. بس كله يهون
إن شاء الله هاحاول أرفعلكو صور الجنوط الجديدة
أنا عارف إنى طولت عليكو بس حبيت أنقلكم تجرتى اللى عارف إن كتير من ملاك السيراتو الـ 17 بيعانو منها
شكراً