هو احنا بقينا وحشيين اوى كدة لية ؟ مجموعة مواقف من الشارع وحياتنا
السلام عليكم ورحمة الله
بصراحة الواحد فى قمة النكد
أخلاق الناس بقت ببساطة واسف فى اللفظ زبالة ..
حبدأ بالشارع:
مش حتكلم على السواقة ... نتكلم على الركانات كمثال
كل واحد قدام دكانة فارش كراتين بعرض الشارع تكفى 4 عربيات صف اول وتانى كمان
تيجى تتكلم يرضيك يرضيك تقابل بوابل من السفالة وقلة الادب والشتائم و ياما ترد وتنزل للمستوى الوضيع ياتمشى
حتى الاماكن العادية ... انزل الاقى كيس زبالة مرمى على الازاز بكامل محتوياتة ...
ومرة الاقى ازاز اة والله ازاز واحدة رامية برطمانات على العربية متكسرة ؟ وتلاقى واحد قولك اصل الجيران وحشين ... طبعا الغرض معروف متركنش هنا
ومرة زيت مرمى و الكلام دة فى كل حتة بمعنى الكلمة
ومرة واحد طلعلى بشومة وبيقولى فى عربية عفش بتيجى تركن هنا ! و الشومة طبعا للتهديد
نيجى للشغل:
تلاقى بلاوى ... وقلة ضمير و شغل بيزنس المهم الفلوس وانة يعد فلوس اخر اليوم
ومهما تتكلم وتوعى تبقى ابن ....* وبتلسن على زميل مهنتك
والمرضى سذج ولا فاهمين و ولا مهتمين وبيفتكروا ان اللى بينصح دة بيشتم فى التانى عشان يكسب زبون الخ الخ لحد ما بقيت بسكت ويكش تولع
حتى فى الكلية حيث انى خلاص حناقش رسالة الماجيستير
تلاقى ورقك وقف وادفع للموظفين وتلاقى واحد خريج اول امبارح واخد مكانك فى المناقشة عشان ابوة فلان و قريب علان
لدرجة ان فى كتييير لا تنفذ عليهم لوائح و قوانين المجلس الاعلى للجامعات فقط عشان ابن فلان وقريب علان ولو اتكلمت واشتكيت البس ياعم ورقك ضاع مفيش ختم استنى و ابعت واشتكى
و ياتسكت وتبص فى الارض عشان تخلص بعد ال20 الللى اخدوا دورك بالظلم يأما انسى انك تخلص
حتى فى البيع و الشراء
تشترى حاجة تفاجأ انها مغشوشة ومضروبة تيجى تشتكى تترمى برة المحل و تلاقى 5 فوقك عايزين يخدموا المعلم صاحب الشغل
لدرجة ان بياع قاللى فية بعد العيد كحك ! بمعنى انا بعت وانت لبست وانسى ياعمرو
الحياة بقت زفت
حتى الكلام فى السياسة بقى كلة شتايم وتخوين وانت وانت الخ الخ
كل اللى بنشوفة
والواحد مطالب انة يكون ذوق و محترم ومروح اخر اليوم البيت سعيد ومبتسم فى وش مراتة (ماهى ملهاش ذنب الصراحة) وتكون ظريف ولطيف مع اهلك الخ الخ
طب اذاى
انا بجد نفسى اسيب البلد وامشى اسيب العرب كلهم وامشى الواحد متنكد اخر نكد والله العظيم
النهاردة واحد جاب عربية فاكهة و وقف يبيع وجة واحد تانى جمبة وتالت وبقى سوق وفين فى نص الشارع ولو اتكلمت ... انتوا عارفين
البلد كلها شتايم و نرفزة وقلة ادب وغش و ظلم فى كل حاجة
حسبى الله ونعم الوكيل