الموضوع: عاوز اطلع عمره بالسيارة حد يعرف إزاي؟؟

المشاركة الأصلية كتبت بواسطة michohat

كنت قرأت في في موضوع يتناول نفس الموضوع مشاركه ل سبعاوي كان كاتب فيه ان فى واحد يعرفه طلع الحج فى اواخر التسعينات بعربيته ال 127 ام اتنين باب وكان معاه زوجته وبنتينه و راح بالعربية ورجع بيها وفى الاخر العربيه اتعطلت اثناء العوده فى الهايكستب وكان العطل ان سلك الموبينيه الارضي كان واقع

انا كونت معلومات شوية عن التأشيرة واظن ان اسمها تأشيرة عمره حره و جاري الاستفسار من احد شركات السياحه عنها
ويا سلام لو شركه السياحه اللى فى المنتدي عرفت تنظم لينا الموضوع ده ونتطلع بنظام القافله مع بعض
و عرفت ان اسهل طريق ليها اننا نطلع عن طريق سفاجا ونركب العبارة وننزل فى تبوك اظن ومنها هنسوق مسافه 180 كليو علشان نوصل ونفس الطريقة فى العوده

ياريت ينفع وانا وعيالى معاكم يا ريت نفعل الموضوع ده ونجعله كمبادرة ونحاول نجيب الموافقات باى طريقة

المشاركة الأصلية كتبت بواسطة MASERATI

السلام عليكم و رحمة الله و بركاته

أنا متهيألى أن الموضوع معتمد على حاجتين :

1- أنك تقدر تاخد تأشيرة عمرة لوحدك مش ضمن فوج و دى أنا أعتقد أن السعودية ماعدتش بتعملها خوفا من هروب العمالة المصرية هناك و الاقامة الغير قانونية., بس الأفضل أنك تسأل فى مكان موثوق فيه عشان تاخد معلومات مؤكدة حقيقية.

2- أن يكون معاك عربية تستحمل المشوار ده و ده مش معناه أن يكون معاك موديل السنة و السلام, مع عظيييييييييييييييييييم احترامى لكل العربيات, لكن يكون معاك حاجة زى اللاندكروزر برادو و كده يعنى.

السواقة نفسها هناك مش مشكلة, الطرق واسعة و حلوة و المسافة من ضبا لمكة بتاع 980 كم و هتحرم فى ميقات الجحفة و تعمل عمرة و تطلع على المدينة, بتاع 460 كم من مكة و بعد كده ترجع من المدينة على تبوك على ضبا و طبعا خلال كووووووووووول الرحلة دى, اول ماتشعر بالارهاق و التعب, لازم تريح و ممكن تريح فى بلد قبل جدة اسمها (ينبع), ركوب العبارات و أنت رايح أو جاى مش هيكون منظم طبعا زى الطيارات, بس فى الآخر هتركب, بس أيام الأجازات بتاع شهر 7, كان بيبقى فيه مصريين كتير أوى -ياعينى- بيفضلوا مرميين فى المينا بتاع ضبا فى السعودية باليومين و التلاتة لحد مايركبوا, فأنت حاول تروح و تيجى بعيد عن نزول المصريين زى الأعياد و شهر 7 و أجازة نص السنة.

ان شاء الله الطرق أمان و العجل بيجرى عليها عالطول و الشرطة هناك ايجابية أكتر من الشرطة المصرية طبعا, هناك هتلاقى العسكرى بتاع الشرطة, غبى حبتبن تلاتة و بالذات لما يكون جديد لسه, بس الظابط اللى معاه هتلاقيه غالبا بيفهم, فلو لا قدر الله, حصل حاجة و لقيت العسكرى بيجحش, خلى كلامك دايما مع الظابط, مش العسكرى.

مش عارف بقه موضوع الرخصة المصرية أو الدولية ينفع تمشى بيها و لا لأ, بس اتأكد من الموضوع ده عشان المشاكل.

و ابقى طمننا و قولنا عملت ايه.

بالتوفيق ان شاء الله.

معلومات قيمه اشكرك