تقرير عن الساجا 2012 بعد حوالي 3500 كيلو
السلام عليكم
أنا الحمد لله ربنا رزقني بعربية ساجا 2012 ... كنت جيبتها على آخر 12 السنة إللي فاتت ...
أخش على المميزات ( على سبيل المثال وليس الحصر ) :
1- الماتور قوي فعلا ... أنا كنت أول 1000 كيلو مش بكسر ال90 ولا 3000 آر بي إم .... فكنت مش حاسس إنه قوي ولا حاجة ... بس بعد لما عملت الصيانة وبقيت بقى باخد راحتي ... فعلا إكتشفت إن العربية فعلا تستحق كل المدح إللي فيها ( ما شاء الله طبعا )
2- ثبات رائع ... أنا جيبت بيها على الصحراوي أكتر من 170 ... وكنت حاسس إني أقدر أجيب أكتر من كدة بس كنت داخل على وصلة فهديت .... وبرضه على منزل المقطم بحس فعلا إن العربية ماسكة نفسها الحمد لله
3- شكل العربية لطيف جدا ... والشنطة واسعة فعلا على غير إللي كنت متوقعه
4- فيه كماليات ظريفة زي السنسور باركينج وبرضه الفوجات نورها فعلا كويس جدا على غير المتوقع من حجمها
5- إضاءة العدادات وشكلها جميل أوي فعلا
6- طبعا العربية نازلة بجنوط سبور شكلها جميل فعلا
العيوب ( على سبيل الحصر وليس المثال )
قبل ما أقول العيوب ... إحنا الأسرة عندنا معاها عربية لانسر فول أوبشن أوتوماتيك خليجي ... فطبعا ممكن المقارنة بتبقى نوعا ما غريبة ... بس ده الواحد بيحسه بعد مثلا لما بقاله 5 سنين سايق لانسر وبعد كدة يركب عربية مختلفة
1- صوت الماتور عالي شوية ... بس ده حصل بعد لما عملت صيانة 1000 كيلو ... حطيت زيت موبيل 1 ... وصراحة ندمان جدا إني حطيته ... بس الصيانة القادمة ححول للكوي مولي ( لو حد عنده زيت أفضل ويقعد 10000 ياريت ينصحني بس موبيل فعلا مش ححطه تاني لا في اللانسر ولا في الساجا ) ... حسيت فعلا إن صوت الماتور علي عن الأول
2- إستهلاك البنزين مش كبير بس مش إللي أنا كنت متوقعه يعني اللانسر بتاكل بنزين ... فقلت بقى عربية 1300 سي سي أكيد حتبقى بتشم بنزين مثلا ... بس العربية فعلا بتاكل بنزين ... وتقريبا كدة التانك ( لحد آول لما اللمبة تنور ) عملت معايا حوالي 360 كيلو على الصحراوي متوسط سرعة 130 كيلو في الساعة .... وحسبت قبل كدة أول شرطتين على الصحراوي على نفس السرعة ... لقيت الشرطة الواحدة تقريبا بتقعد حوالي 65 كيلو .... والتانية بتختفي عند 132 كيلو ... وطبعا على نفس السرعة ... طبعا أكيد لو على سرعة أقل ممكن يدي أكتر .... وبرضه الإستهلاك ده أنا لاحظته بعد تغيير الزيت ... يمكن أنا موسوس بس فعلا قافل جدا من موبيل 1
3- صوت العزل ( وده موبيل 1 بريء منه ههههههه ) ... مش قوي وبحس على السرعات العالية بصوت الطريق وصوت الماتور .... اللانسر برضه معروفة بالعيب ده بس أقل بكتير من الساجا ( والصوت في اللانسر قل كتير لما غيرنا الكاوتش فأتمنى إن برضه يكون عيب كاوتش في الساجا ) ... بس العيب ده أنا لاحظته .... وعلى السرعات العالية فقط
4- عزم العربية تقريبا لحد 60 كيلو في الساعة أقل بكتير من بعد كدة .... بعد كدة فعلا بحس إن العربية الماتور بيبقى مدي عزم قوي جدا ... وأعتقد الموضوع ليه علاقة بالكيرف بتاع عدد لفات الماتور - العزم
5- الكاسيت مش عاجبني وناوي أغيره ... عشان مفيهوش إم بي ثري ولا يو إس بي
6- عندي مشكلة في ظهر الكرسي روحت التوكيل قالوا حيغيروه بس متابعتش الموضوع ... هوا فيه هزة كدة ... وهما من نفسهم قالوا حيغيروه في الطلبية القادمة إن شاء الله
7- التكييف عندي مكانش شغال ... وغيرت الكومبريسور في التوكيل على حسابهم طبعا
8- التوكيل إكتشفت فعلا إن الموضوع ليه علاقة بالمهندس إللي بيستلم العربية ... أنا العربية إستلمها مني مهندس بجد فعلا بيفكرني بالموظفين بتوع الحكومة والله إستلم العربية وسابني كدة وقاعد في الأوضة ... وكل شوية أخش أكلمه وأقوله العربية واقفه محدش بيشتغل فيها ... يقول دول لسة مخلصين ... أقوله يافندم بقالها بتاع ساعة واقفة .... يقوم قايم بتثاقل كدة .... وشايف فعلا مهندسين تانين والله فعلا بسم الله ما شاء الله شغالين ومهتمين بالعملاء جدا ... فروحت متصل بواحد صاحبي يعرف حد في التوكيل وخلى مهندس تاني يستلم العربية وفعلا أنجزني جدا ... بس طبعا أنا والله بدون مبالغة أهدرت من وقتي 5 ساعات بسبب المهندس الأولاني .... والتاني زبطلي العربية بالصيانة بكله في ساعتين ... فالتوكيل بيبقى حظوظ مفيش مكان كله سيئ ولا مكان كله كويس ... الفكرة إن التقييم مش موجود عند عز العرب للمهندسين ومفيش ليهم كبير لما يلاقي عميل مثلا بيشتكي يشد المهندس ...
9- حاسس إن الدريكسيون خشن الملمس ... اللانسر ناعم كدة وإبن حلال ... بس إتعودت خلاص عليه
10 - الصالون والتابلوه جيدين بس حاسس إن العربية تنتمي لفئة 2005 مش 2012 ... والتقفيل جيد جدا ... بس طبعا الياباني في التقفيل لا يعلى عليه فعلا ... بس الحمد لله لغاية دلوقتي مفيش أي مشاكل فيه بس الجودة أكيد أقل من الياباني ... بس أحسن بكتير جدا من اللانوس واللوجان ( من وجهة نظري ) ... بس طبعا على قد فلوسك مد رجليك بقى هههههههههه
المهم كل إللي عايز أقوله فعلا إن العربية بتقيم كقيمة سعرية ... يعني البي إم دبليو إللي ب300 ألف فيه برضه عربية أحسن منها ... بس لا يقلل من البي إم في شيء ... العربية كسعر أقل من 80.000 فعلا أفضل عربية من وجهة نظري ووجهة نظر كثيرين خاصة لو أوتوماتيك .. قد يكون ليها منافس نوعا ما في المانيوال ( وأنا أعتبر الفيات بونتوا منافس قوي ) ... بس لو بتدور على عربية أوتوماتيك وسعر زي ده فأنصحك بشده بالساجا
وربنا يكفينا شر الطريق والعين ويكرمنا بالعربية ويحفظها لينا
وأنا أول مرة أعمل تقرير ... بس فعلا المنتدى ده فعلا فدني كتير أوي أوي في حاجات كتير في العربيات فده أقل ما يمكن عمله ... وأتمنى إني أكون أفدتكم
ولو حد عايز يسأل عن حاجة يتفضل
