فجأة صوت ضرب نار كتير ولمدة نص ساعة تحت بيتنا
انا هنقل اللي كنت كاتبه علي الفيس
ده أول status كنت كاتبها
(
أسترها يا رب أسترها يا رب !
تحت البيت في فرقة 777 وشرطة وفي ضرب نار كتير قوي
)
ضرب النار قدامي كان زي الرز ومش فاهم في ايه
الضرب أستمر نص ساعة وبعدين نزلت أشوف ايه اللي حصل
وده ال Status التانية
(
واضح كدة أن الشرطة بدأت تشوف شغلها
انا هوضح كان في أيه
انا الصراحة دمي هرب
التحرير ومحمد محمود والكلام ده ببقي لوحدي
وأيام الأنفلات الأمني محدش يقدر يخش المنطقة عندنا ... لا حرامية ولا بوليس
اللي حصل ايه بقي
قدام البيت بتاعنا حتة أرض واسعة جدا ... انا بركن فيها العربية
ومؤخرا بعد الثورة المكان بقي مترشق عربيات
انا مالي .... الناس جابت عربيات وكدة
علي بعد 2 كم من بيتنا حتة فيها أكبر تجارة مخدرات في مصر كلها ... أسمها السليمانية
الحتة ده ممنوع أي حد يخش وفيها أسلحة أكتر من بتاعة الجيش
طلع فيها واحد أسمه عاطف وده حرامي عربيات .... من اللي بيثبتوا الناس علي الدائري
كان راكن 13 عربية تحت بيتنا.... وانا ولا أعرف
أكتشفت ان في ناس كتير كانت عارفة
جت فرقة 777 وكام عربية بوكس وبوليس كتير وهوب راحوا راكنين تحت في الجراج
وثاينة والاقي ضرب نار كتير قوي
والعربيات عمالة تتموطح في الشارع وفرق 777 علي أسطح العمارات
بتاع نص ساعة والضرب وقف
نزلت أشوف في ايه
أتاريهم جايين يقبضوا علي عاطف ويلموا العربيات المسروقة
بتوع المخدرات كانوا فاكرينهم جايين يقبضوا عليهم راحة مطلعين البلاوي اللي عندهم وقعدوا يضربوا .... ذكاء ذكاء يعني :)
مش عارف بقي هما عرفوا أزاي انهم مش عشانهم فوقفوا الضرب
البوليس لم العربيات من الجراج
بس هما واضح هما عارفين أنهي عربيات اللي مسروقة .... عشان ماخدوش عربيتي :)
الحمد لله عدت علي خير
لو كانوا جايين لبتوع المخدرات كانت هتبقي مجزرة
أه صحيح .... عاطف مازال حي يرزق :)
)
من الساعة 3:30 لغاية 6:30 كانوا بيشيلوا العربيات
من العربيات اللي كانت مسروقة
كان في سيفيك سودة موديل 93
أكسيل نبيتي فاضية
لانسر بومة 2006 دهبي
ليجانزا سودا
عربية كوبيه بيضه مش عارف نوعها الصراحة
131 لبني ميتالك
هوندا سيفيك حمرا سيدان موديل تمانينات
عربيتين تويوتا hilux 2006 لونهم أبيض
عربية داتسون نص نقل قديمة لونها أبيض
مش فاكر غير دول الصراحة
لو أفتكرت تاني هقول
انا مصور شوية فيديوهات وهحاول أجمعهم وأرفعهم
