السلام عليكم اولا
ارجو الناس الأخوه اللي عندهم ريجاتا يفيدوني هل هيه سياره كويسه و ايه اخبار قطع الغيار بتاعتها خصوصا الاكصدامات و الصاج بتاعها و بيتحطلها بنزين كام يا تره؟
ارجو الرد السريع
اشكركم كتيييييير
اخوكم سعيد
السلام عليكم اولا
ارجو الناس الأخوه اللي عندهم ريجاتا يفيدوني هل هيه سياره كويسه و ايه اخبار قطع الغيار بتاعتها خصوصا الاكصدامات و الصاج بتاعها و بيتحطلها بنزين كام يا تره؟
ارجو الرد السريع
اشكركم كتيييييير
اخوكم سعيد
عربية ممتازة جداً.. شرط الحالة
وممكن تحط بنزين 90 بيبقى كويس اوى معاها
ربنا يوفقك
الف شكر على الرد السريع يا باشا
طيب وهل ممكن احطلها بنزين 80 ولا حيبوظها و شكرا
بصفتى من ملاك الريجاتا اسمح لى ان اتطوع بالرد
السياره ممتازه جدا عن تجربه مع سيارتين مختلفتين
كانت معى واحده من سنه 1996 و بعتها سنه 2003 و اشتريت هيونداى فى تجربه فاشله تخلصت منها بسرعه لارتفاع سعر قطع الغيار و ضعف الصاج و البودى او الهيكل الخارجى و رجعت مره اخرى و اشتريت ريجاتا اخرى سنه 2005 و هى معى الى الان و لم اشتكى منها شكوى جامده للامانه
عموما مميزات الريجاتا معروفه
- صاج جامد (بشرط الا يكون فيه بارومه )
- موتور ايطالى 1500 سى سى بقدره 82 حصان (بالنسبه للموديل 85s)
- معدل تسارع و سحب ممتازين
- اى موديل ريجاتا فيه اساسا من المصنع سنترلوك و زجاج كهربا امامى و الاختلاف بين الموديلات فى التكييف و الباور (سيارتى بها تكييف و باور و سنترلوك و زجاج كهربا امامى و انا ركبت فيها انذار و زجاج كهربا خلفى ووحده رفع مع الريموت)
- قطع غيار متوفره و رخيصه جدا بالقياس لقطع غيار الكورى و اليابانى و حتى الصبنى الجديد (كمثال الفانوس الامامى مغيره من اسبوعين 90 ج كامل و فانوس اللانسر 800 و الاسبيرانزا 500 حسب ما قرات بالموقع)
- لا تقبل نظريا بنزين 80 و لكن ممكن ان تحطلها بشرط الاهتمام بتنظيف الكاربيراتير لكن انا عن نفسى اشتريت السياره و هى مركب فيها غاز طبيعى من كارجاس و هو اختراع موفر جدا لكن يقلل السحب شويه و يهلك الموتور بعد فتره حسب ما سمعت (لكن على اقصى تقدير تكلفه عمره الموتور اقل بمراحل من تكلفه البنزين بعد ارتفاع سعره)
- صالون واسع جدا و شنطه كبيره
- سهل جدا تصليحها عند اى ميكانيكى فيات لان اغلب الصنايعيه يعرفوا فيها
- سهوله التحكم فيها كقياده حتى من غير وجود باور فالدركسيون خفيف جدا (سيارتى الاولى كانت هاف باور و الثانيه باور و لم الاحظ فارق كبير بينهم الا فى الركن فى مساحه ضيقة)
- سعر اعاده بيع مضمون لانها مطلوبه شويه فى السوق
و عيوبها من وجهه نظرى اربعه عيوب :
- الصاج ممكن جدا يصيبه البارومه بسهوله و يؤثر عليه (لازم ان تكشف على صاج العربيه قبل ما تشتريها كويس جدا بمعرفه سمكرى امين)
- السخونه فى الصيف عند التشغيل لفتره طويله او فى السفر (يمكن التغلب عليها بتغيير ترموستات و مروحه الراداتير )
- شكل كلاسيكى جدا يختلف عن الشكل الديناميكى للسيارات الحديثه
- ازرار الكونسول و كمبيوتر الاعطال سهل جدا يبوظوا (سوء الاستخدام او قدم السياره مثلا)
الخلاصه انها عربيه ممتازه جدا و اقتصاديه كتشغيل و قطع غيار و لكن بعده شروط اهمها حاله السياره وقت الشراء لانها لازم تكون سليمه كصاج (من غير بارومه) و عفشه (لانها جر امامى و روحها فى العفشه الاماميه)
و الخلاصه ايضا انك لو فكرت تجيبها افضل موديلاتها هى 1988-1989-1990 و لكن لو وجد موديل اقدم بحاله ممتازه فلا بأس
و على العموم اللى يقدر يفيدك و يفيدنا كلنا فى موضوع الريجاتا هو المهندس سبعاوى مشرفنا و خبيرنا القدير لانه من ملاك الريجاتا و له معها خبره كبيره جدا و انصحك بالاستماع لكلامه لو شاهد الموضوع و رد عليه
مع خالص دعائى لك بالتوفيق فى مسعاك و صدقنى لن تندم فى قرار شراء الريجاتا
اية الحلاوة دية يا راجل. انت اثبت فعلا انك راكب ريجاتا
انا معايا ريجاتا موديل 1989 ....
وللاسف الاستاذ مواطن مصرى ماسبش حاجة اقولها غير ان العربية رائعة .
و فى انتظار سبعاوى
بصراحة اخونا مواطن مصر مسبش حاجة عشان نقولها
بس احب ازودعلى المميزات ان
1- الثبات بتاع العربية اكثر من رائع
2-عفشة قوية بتستحمل شوارعنا المكسرة
3-استهلاك البنزين معقول
4-ارتفاع العربية عن الارض جيد جدا انتوا عارفين طبعا المطبات العمولة اللى عندنا عاملة ازاى حتى لو مركب 3 ورا العربية مش بتحك فى المطبات
5-رخص قطع الغيار و توافرها
العيوب
1-التابلوه ضعيف بتاع الريجاتا فاتكد منه و انت تشترى من حالة التابلوه لو لقيت شكل تعريج فى الجلد يتاع التابوله اعرف ان ده كسر
2-كمبيوتر الاعطال غالبا هتلاقية مش شغال و محدش بيعرف يعملة صيانة
3-تكييف ضعيف مقارنة بالجديد
فى المجمل العربية تحفة و اكثر من رائعة
و فى انتظاررد استاذ سبعاوى
بصراحه الف الف شكر يا جماعه و الله طمنتوني بجد انا فعلا نويت اشتري عربيه ريجاتا بس ادعولي ربنا يوفقني في عربيه كويسه و ميضحكش عليا فيها
يا رب امين
و شكركم جزيلا
اخوكم سعيد
طبعا الناس ردت عليك وقالت كل حاجة بس فى نقطة واحدة محدش اتكلم عنها!
وهى ان مفيش منها حالتة كويسة الا قليل انا لسة شارى واحدة عايز اقولك انى شفت 8 قبلها كلهم حالتهم سيئة جدا فخلى بالك من النقطة دة وربنا يوفقك.
معلش ياجماعة تقصدوا بإيه حالتها كويسه يعني الأساسيات الحوض والشنطه والقوايم ولا ما يكونش فيها بارومه ولا حالة الموتور ولا العفشه ايه المقياس اللي اقدر احكم على الريجاتا تحديدا ان حالتها كويسه
العربية الريجاتا انا كنت شاريها لوزوجتى لكن مع الوقت والاستعمال اصبحت انا اللى بركبها معظم الوقت وسايب عربيتى
وده لأنها:
1- محصلة قدرة المحرك مع منحنى العزم مع نسب التخفيض بتاعتها مع مع وزن السيارة مع قيمة المعامل الإيروديناميكى بتاعها محصلة اكثر من ممتازة، وده مخليها سيارة لا تضاهى فى سرعة الإنطلاق والتسارع واتساع مشاوير الغيارات، يكفى ان تعرف ان هذة السيارات وبعد 22 سنة خدمة تصل لسرعة 160 بسهولة شديدة جدا
2- الهيكل بتعاها متين جدا (بشرط انه يكون مافيهوش بارومة) ومع العفشة الجيدة تقد تتعامل بيها مع المدقات والمطبات بدون ادنى مشكلة
3- صالونها واسع بشكل غير عادى سواء فى الامام او فى الخلف وشنطتها كبيرة ايضا بشكل غير عادى
4- ثابتة جدا على الأرض فى السرعات العالية
5- قطع غيارها المكيانيكية معظمها رخيص جدا وتشترك في قطع الغيار مع معظم سيارات فيات الشعبية (128-شاهين 1400 و 1600-ريتمو-تمبرا) ، (يوجد موضوع عن اسعار قطع غيارها فى ساحة الفيات للمراجعة)
6- منظرها المربع بيخوف الناس منك فى الطريق وبيتعمل لك حساب
عيوبها:
1-بعض قطع غيارها غالية بالنسبة للفيات القديم: علبة الديريكسيون مثلا فى حدود 600 جنيه ، والكاربراتير المستعمل 500
2- تابلوهاتها ضعيفة جدا وسهلة الكسر
3- صعوبة العثور على واحدة بحالة جيدة
4- المحرك ككل محركات فيات القديمة بيكون غير متجاوب لما يكون على Rpm قليلة