الموضوع: هو مش امبارح كان الجمعه ..... اجازة يعنى ؟؟؟؟

[justify] زى ما حضارتكم عارفين .......ان الوااااحد مننا بيحلم بيوم الخميس .....يسهر براحته مع اصحابة ولا قدام المخروب التليفزيون و يفضل يقلب القنوات و هو مش عارف اصلا هو عاوز يتفرج على ايه ... و ميهموش الوقت و لا اصلا بيبص فى وش الساعه الى متعلقه على الحيطه ..... علشان بكرا اجاااااااااااازه و هينام براحته ........
تدق الساعه الثامنه صباحا يوم الجمعه .... و اسمع حركه غير طبيعيه فى الشقه .... المفروض ان الهدوء يسود المكان ... لكن صوت اقدام صغيرة تقترب من الثلاجه ...... تفتح الباب لمدة قصيرة ثم ترزعه تانى ..... يقترب الصوت الى السرير الذى ارقد علية .... بحركه لا ارادية منى ادخل راسى تحت المخدة و اتكلفت بالبطانية لكى افصل نفسى عن الواقع الخارجى الذى ارفضه .... يقترب صوت الاقدام اكثر ... ثم اشعر بخمس اصابع من الثلج تتحسس قفايا ... فعلا تلج .... و ياتينى صوت الباشا الصغير .... بابا .... قووووووووووووم و عمال يشد البطانية .... ياله من احساس سخيف
الصوت الصغير : بابا ...شغلى الكمبيوتر علشان عاوز العب .... "
انا : روح يا بنى نام ... لسه بدرى ... يلالالالالالالالالالالالا ....
اعود لاستكمل الغفوة ... و اخلد الى النوم و تختفى اثار الاصابع الثلجية مع على قفايا .... و لثوانى معدودة ... اتفزع على صوت حرب اهلية فى حجرة الاطفال و صراخ و زعيق ... و ملوتوف بيحدف .... و كان الاشتباك صوتيا فى البداية ثم اخذ يتصاعد تدريجيا الى ان وصل الى حد عصابات الشوارع ....
قولت لا بقى مبدهاش .... لازم استنجد بقوات حفظ السلام عندنا .... بدل الخيار العسكرى و عمل حظر تجول ........
خبطت بهدوء على كتف المدام و لسه هتفتح بقى و اتكلم ........ قالتلى سيبهم هما هيسكتوا دلوقتى ..........!!!!!
فقولت لآلآلآلآلآلآلآلآلآ .... لازم العين الحمرا ... طيب و الله لاقوملكم يا ولاد التيت ....
قومت و انا بأترنح و لسه داخل من باب الحجرة ....لاقيت شظية من جراء الهجوم السافر من البيه الصغير على البية الكبير رزعت فى باب الاوضه و قامت خابطه فى دماغى ..... تقريبا كانت فردة عجل بتاعت عربية لعبة .....
بصراحه ... خفت و مرضيش ادخل ..... قمت مزعق من برة و قولت : اييي ................... ايييييييييييه ده ؟؟
لاقيت الصراخ و الجعير اتحول لصوت ضحك و كركرة و كلمات من عينه مش انا بابا ده عمرو و اتهامات متبادله بيهم و الاتنين طاروا تحت البطانية .... و نامواااااااااااااااااا
دخلت دماغى الاول من الباب ... و لما تأكدت من هدوء الاوضاع ... قمت مزعق تاني ... و قولت اه يا كلاب ... و الله اللى هسمع صوته تاني هقطعه ...... و على الله اسمع نفس بس ....
و دخلت على السرير تاني ... و اتلفحت بالبطانية ... و كلى امل انى انااااااااااااااااااام تاني و مفيش خمس دقايق ... و لاقيت صباع مبدبب و طويل بينخس فى جانبى و صوت يانى من خلفة يقول : هتفطر اية انهاردة ؟؟؟!!!!!!!!!!!!!!!!!!!
قومت قايم و مزعق و قولت : و الله لنزل انام عند امى تحت علشان تستريحوا .....
هو ده بيحصلى لوحدى .... محتاج خبراتكم .
[/justify]