الموضوع: العربيه غول بنزين ارجو المساعده

اولا ياريت تقوللنا العربية بتمشى بالـ 20 لتر كام كيلو بالظبط

وهل المشى ده جوة البلد ولا على الطريق وعلى سرعة كام ؟
ويستحسن تفول و تمشى مشوار محترم على سرعة لا تقل عن 50 ولا تزيد عن 80 وتحسب عملت معاك كام في المشوار ده


اما اسباب استهلاك البنزين نفسها فهى كتير جدا جدا

* هل اتأكدت ان مفيش اي تسريب ( خرم في التنك / تسريب في الخراطيم / تسريب من الرداخ (الطلمبة) / تسريب من ناحية العوامة / او تبخر من عند الغطاء )

*حالة الموتور ايه ؟ ( ضعيف / الزيت بينقص / زيت من الشكمان / زيت في الفايظ / زيت على البوجيهات كل فترة / تآكل في الصبابات ( تخلى الموتور ياكل بنزين بالهبل ) )

* ايه اخبار التاكيهات ؟

* ايه اخبار ضبط التقسيمة والكاتينة ( تخلى العربية تاكل بنزين جدا جدا برضه )

* عملت اي حاجة في وش السلندر قريب ؟

* اخبار الكربراتير ايه ( السحب والتسارع ، سهولة الدوراة صباحا ، بيهبب البوجيهات والشكمان ؟ ، مقاس بك السرعة كام ، السلانسيه عالى زيادة عن اللزوم ، رائحة عادم كريهة ؟ )

* البوجيهات وضبط الكهربا ( بتشم ريحة بنزين ني ؟ )

* هل العربية تقيلة ( فرامل قافشة ، بلي عجل خشن ) ( العجل بيسخن جامد من اقل مشوار ؟ ، العربية بتقف في مسافة قليلة جدا مجرد ما تمورها ؟ )

* السيطرة على الحرارة ( الموتور سخن على طول / الموتور بارد على طول / الحرارة مظبوطة ؟ )

* طقم الدبرياج اخباره ايه (هل الار بي ام ( صوت الموتور) بيعلى بسرعة مش مناسبة لسرعة العربية ؟ )


دى حاجات كدة على الماشى لحد ما نوصل للسبب او نشوف غيرها

طبيعى في اي عربية كربراتير انك لازم تكارك الصبح عشان تدور ، انما احيانا حتى لو كاركت ماتدورش الا من سابع مرة ولا حاجة ( حتى لو كانت العربية مابقالهاش 24 ساعة مركونة ) وده اللى مش طبيعى بس مش سبب رئيسى لزيادة الاستهلاك ( خلى بالك انا ماقلتش الموضوع ده اول حاجة )


موضوع الزغطة ده طبيعى فأي عربية قديمة لما تكون باردة ( عجبنى جدا تشبيه الزغطة ده على فكرة :d )
وبيكون اقل ما يمكن لما يكون مسمار الهوا مظبوط والعربية اتسخنت كويس



نسيت اسألك الموضوع ده حصل فجأة ولا معاك كدة من زمان ولا انت لسه شارى العربية ولا ايه ؟


اهم حاجة تمشى بالترتيب الصح في التتبع وتبدأ بالحاجات السهلة والظاهرة في الاول عشان توصل بسرعة وتصرف اقل مصاريف

يعنى اول حاجة خالص 1 - تتأكد ان مفيش تسريب ( ممكن يكون البنزين اصلا بيقع على الارض او بيتبخر )

2 - تظبط هوا العجل كويس

3 - لو في دخنة سودا واضحة من الشكمان يبقى ده كربراتير وش ..

4 - لو عديت رقم 3 ومفيش دخنة واضحة ولا حاجة يبقى تعمل صيانة لطقم الكهربا كله وتظبطها على الشعرة
وتجرب تانى وتبدأ تحسب للعربية بعد مشوار طويل وطريق طوالى

5 - لو لسة المشكلة موجودة ترجع للكربراتير تانى وتغير البيكات فقط بمقاسات مناسبة عند متخصص يكون بيفهم ( الكربراتير بالذات ما تخليش اي حد يلعب فيه ، وما تبدأش بيه )

اعتقد انت واقف في المرحلة دى دلوقتى لو كنت مشيت بنفس ترتيب الخطوات ( لأنك ذكرت تغيير البيكات واصلاح الكربراتير )


6 - المفروض بعد المرحلة دى يكون حرق البنزين نظيف والعربية فايقة وتجميعها كويس ومفيش في العادم لون او ريحة غريبة


7 - لو حصل اللى في نقطة 6 + الاستهلاك اتظبط يبقى خير وبركة

لو ما حصلش الكلام اللى في نقطة 6 ، يبقى احتمال ان الكربراتير لسة فيه مشكلة ( لو عرفت تجرب بكربراتير تانى معروف استهلاكه عشان تتأكد ان العيب في الكربراتير بتاعك يبقى افضل )





لو حصل اللى في نقطة 6 + برضه فيه مشكلة يبقى كدة الاشتباه في المكنة ( دقة ظبط التقسيمة او شد سير الكاتينة ، مشكلة في الصبابات ، خطأ في تركيب وش السلندر ، مكنة خفيفة ... )






وتسلم على الدعوات الجميلة :)

الزغوطه ؟؟؟؟؟؟ عيب كاربرتير او (اسبراتير محتاج يتنظف من جوا حلو + تغييرطقم كهربا لو قديم)