طلب نصيحة ومساعدة من الاخوة الافاضل

**gym1974** · 19-02-2012 12:07 PM

السلام عليكم ورحمة الله انا معايا رينو كليو موديل 2003/1200cc وان شاء الله اغير عن قريب المبلغ اللى هيكون معايا فى حدود 95 الف جنيه وبصراحة كنت ناوى على رينو فلوانس او ميجان لأنى خلاص اتعودت على الرينو وعلى قطع الغيار الغالية وبصراحة انا متابع قسم البروتون هنا ومغرم جدا بالبيرسونا واصبحت فى حيرة شديدة ما بين البيرسونا والميجان والفلوانس انا مركبتش اى عربية فيهم بصراحة ومش عارف اختار وانا مش فارق معايا موضوع قطع الغيار وكل الصيانة لازم اعملها فى التوكيل وطبعا توكيل رينو لا غبار عليه وتوكيل عز العرب عرفت عنه كل شر منكم قصدى خير انا يهمنى فى العربية الثبات ومتعة القيادة لأنى بسافر كتير شرم الشيخ وطبعا الكليو فى السفر وحشة جدا وخفيفة قوى ومش فارق معايا برده استهلاك البنزين لآن معدل استهلاكى السنوى للعربية حوالى 10000 كيلو فارجو الافادة والمساعدة ويا ريت لو حد جرب العربيتين اكون شاكر جدا

**sabregas2010** · 19-02-2012 02:34 PM

انا جربت البرسونا بتاعة واحد صاحبى الثبات ملوش حل يكاد يكون زى الالمانى والتسارع بتاع الموتور فى التجميع تحفة رغم انها اوتوماتيك لكن التوكيل مقدرش افيدك

**sabregas2010** · 19-02-2012 02:39 PM

نسيت اقولك على حاجة مهمة قالوهالى فى التوكيل ولتنى رجعت عن شراء الجين 2
انا من الناس اللى بتحب تلعب فى العربية يعنى انا مركب وحدة رفع ومركب زينون فى الكشافات والفوجات ومركب جنوط 16 وناوى اهبط العربية .... الخ
وسألت فى التوكيل على انى هعمل كده فى الجين قالولى متلعبش فى كهرباء العربية خالص ومتركبش جنوط اكبر من مقاسها لان كل ده غلط على العربية وهيخرجك بره الضمان
لو الحاجات ما تفرقش معاك وهتسيب العربية على حالتها توكل على الله واشتريها

**saint2011** · 19-02-2012 02:41 PM

توكل على الله البرسونا مافيش كلام اوبشنز وثبات وشياكة ولا مقارنة فى السعر بينها وبين الرينو الفلونس130 الف والميجان اعتقد مش اقل من 125000جنية

**gym1974** · 20-02-2012 09:24 AM

الف شكر لكل من الاخوة sabregas2010/ saint2011 على الرد والله يا جماعة انا فى حيرة شديدة جدا وبقالى فوق من 4 شهور على كده الميجان والفلوانس وكلين دماغى ومغرم جدا بالبيرسونا وناس تقولى الفرنساوى افضل من الماليزى والميجان والفلوانس ركوبة تانية خلاص عن البيرسونا ماشى ننتظر راى باقى الاعضاء لعل وعسى يكون فى حد كان معاه الاثنين يفيدنا اكتر

**sabregas2010** · 20-02-2012 10:09 AM

ربنا يوفقك فى اختيار الانسب

**elmahdy** · 20-02-2012 10:59 AM

اعمل اللي نفسك فيه ايا كان
اهم حاجه في الحياة انك تنول شيء كنت بتتمناه... سواء بعد كده طلع عشمك في محله او لا... لكن تبقى وصلت لشيء
انت عارف لو ركبت مرسيدس... هاتفضل برضه عينك على البيرسونا.. لانك بتحبها
انا كنت بجري امبارح بالليل في صلاح سالم... وكان فيه واحد جايبها لسه زيرو... ولونها احمر... بصراحه ماشاء الله عليها... بجد زي ما الاخ صابر قال... حتة الماني
انا بقولك كده وانا راكب رينو... بس تحقيق امنيه ده شيء جميل جدا... خصوصا في العربيات

**gym1974** · 20-02-2012 12:40 PM

المشاركة الأصلية كتبت بواسطة elmahdy

اعمل اللي نفسك فيه ايا كان
اهم حاجه في الحياة انك تنول شيء كنت بتتمناه... سواء بعد كده طلع عشمك في محله او لا... لكن تبقى وصلت لشيء
انت عارف لو ركبت مرسيدس... هاتفضل برضه عينك على البيرسونا.. لانك بتحبها
انا كنت بجري امبارح بالليل في صلاح سالم... وكان فيه واحد جايبها لسه زيرو... ولونها احمر... بصراحه ماشاء الله عليها... بجد زي ما الاخ صابر قال... حتة الماني
انا بقولك كده وانا راكب رينو... بس تحقيق امنيه ده شيء جميل جدا... خصوصا في العربيات

كلامك جميل والله يا اخى مهدى ربنا يكرمك ويزيدك من فضله

**zego** · 20-02-2012 03:45 PM

بص يا باشا للأمانة انا والله كنت في نفس حيرتك محتار ما بين الفلوانس والبيرسونا ولكن الحمد لله ربنا وفقنى في الاختيار وجبت البيرسونا ويمكن ياما ظروف الواحد تتحسن شوية نجيب الفلوانس جمبها بص بصراحة العربية جميلة وممتازة وبالنسبة للتوكيل لو لا قدر الله حصل حاجة الواحد طالما له حق هياخده حتى لو بالزعيق وكدا ولسه فى أمل فى مصر بالنسبة لجهاز حماية المستهلك وبعدين قطع غيارها متوفرة بره التوكيل وفى استيراد كمان على ما بأسمع

**gym1974** · 21-02-2012 08:31 AM

المشاركة الأصلية كتبت بواسطة zego

بص يا باشا للأمانة انا والله كنت في نفس حيرتك محتار ما بين الفلوانس والبيرسونا ولكن الحمد لله ربنا وفقنى في الاختيار وجبت البيرسونا ويمكن ياما ظروف الواحد تتحسن شوية نجيب الفلوانس جمبها بص بصراحة العربية جميلة وممتازة وبالنسبة للتوكيل لو لا قدر الله حصل حاجة الواحد طالما له حق هياخده حتى لو بالزعيق وكدا ولسه فى أمل فى مصر بالنسبة لجهاز حماية المستهلك وبعدين قطع غيارها متوفرة بره التوكيل وفى استيراد كمان على ما بأسمع

الف مبروك اخى زيجو على العربية وربنا يديك خيرها ويكفيك شرها انا موضوع التوكيل ده مهم جدا بالنسبة لى لآنى مش بتاع اشترى قطع غيار من بره وروح لميكانيكى والكلام ده مش تكبر والله ولا حاجة بس بحب اريح دماغى ولو هادفع قرشين زيادة ومن الواضح كده انا مشكلة البروتون فى مصر مشكلة توكيل وده فى حد ذاته ممكن يكرهك فى العربية انما توكيل رينو بصراحة اكثر من ممتاز الناس هناك فاهمة جدا وعلى مستوى على من المهارة والذوق مرة تانية الف شكر على ردك ومبروك على العربية وتحياتى لك