أخيراً اشتريت ساجا بفضل ساجاويه المنتدي. سؤالين علي الماشي كده

**minahot63** · 22-02-2012 12:18 AM

مساء الفل علي كل الساجاويه

أخيراً اشتريت ساجا بعد ما قرأت أرائكم انا كنت مقتنع بيها و انتوا اللي شجعتوني علي اتخاذ القرار في شرائها انا كان معايا نوبيرا اتوماتيك و الساجا بالنسبالي كانت احلي حاجة اتوماتيك في الفئة السعرية ديه

سؤال بقي للي جربوا في كام ملاحظة ياريت تجاوبوا عليا فيهم
1- ايه احسن زيت ممكن استعمله انا لسه مكملتش الالف كيلو فعايز نصيحة بنوع زيت معين استعمله علي طول
2- هي العفشه بتاعتها ناشفة شوية ولا ايه؟ اصلي بقارنها بالنوبيرا مع العلم انا نافخ الكاوتش نيتروجين مقاس 30 زي ما كنت في النوبيرا و الاتنين جنط 14
3- هي بتسحب بنزين جامد اوي كده يعني يعتبر 200 كيلو في الصفيحة ولا النوبيرا !! ده بجد ولا لسه الكلام ده هيتظبط في صيانة الالف؟ مع العلم انا المشي بتاعي كله طرق سريعة مش بقف كتير
4-هو صوت العربية عالي شوية ولا برضه هيهدي مع الصيانة؟
5- و اخيرا و انا اسف للإطاله هو في فرق من عند الكبوت ملاحظ ان الفرق (الكبوت مع الشبكة في الناحية اليمين اكبر من الفرق في الناحيه الشمال) بس المنظر العام يوحي انه مظبوط.

شكرا لاجمد ساجاوية

**mido_295** · 22-02-2012 10:09 AM

مبروك ياباشا على العربيه وربنا يباركلك فيها إن شاء الله ويرزقك خيرها ويكفيك شرها
انا مش هعرف أجاوب على كل أسئلته بحكم خبرتى اللى مش كبيره بس على قدر ما مريت هقولك
1. انا بستعمل توتال وشغال مش تاعبنى أوى رغم أنى أسمع عن أن موبيل أحسن منه بس مفكرتش أغير
2. العفشه فى كل بروتون ناشفه شويه علشان هيا عافشه رياضيه وده بيديها الثبات على السرعات العاليه
موضوع ظبط الكاوتش ده حقيقى مقدرش افيدك فيه
3. سحب البنزين هيفضل عالى لحد ماتعمل صيانه الألف كيلو لأن الزيت اللى بيبقى محطوط بيبقى كثيف جدا علشان تلين العربيه والمعدل هيقل كتير بعد صيانه الألف إن شاء الله ، مش هقدر أقولك كام المعدل تقريبا لأنى اللى معايا 1600 بس هتلاقى فرق كبير ان شاء الله
4. صوت الماتور هيهدى شويه بعد الصيانه بس مش هيبقى زى صوت النوبيرا هيبقى أعلى بس مش لدرجه إنه مزعج
5.انا كان عندى فى الواجا الفرق ده ولما روحت التوكيل ظبطوا مفصلات الكبوت وبقت تمام والفرق مابقاش باين
ومبروك عليك مره تانيه