الموضوع: "مشاهدات أشرف سرحان" برنامج روعة على قناة روسيا اليوم

البرنامج اسمه (مشاهدات) بيتذاع على قناة روسيا اليوم

بيقدمه مذيع مصرى دمه خفيف اسمه أشرف سرحان

وهو أصلاً ممثل ومخرج فى الأوبرا

البرنامج ثقافى سياحى بيلقى الضوء على أهم المزارات والأماكن داخل وخارج روسيا

لكنه بيركز على روسيا أكتر باعتبارها صاحبة القناة

عايز أقول إن البرنامج روعة ومفيد جداً ومسلى وقيم

وبيقدم معلومات جميلة عن أماكن وشوارع يمكن أول مرة نسمع عنها

تقنية التصوير أيضاً مميزة وممتعة إلى أقصى حد والزوايا عبقرية

وإخراج الحلقات لازم يتدرس فى معاهد فنون الإخراج

ونقاء الصورة بيفكرنى ببرامج ناشونال جيوجرافيك

مقدم البرنامج أشرف سرحان إنسان تلقائى ومثقف وتعليقاته مصرية
وتعبيراته تحسسك انه ابن بلد وبيلف ويروح فى كل حتة وفى أى مكان

أجمل ما فى البرنامج هو الإبتكار والدهشة اللى بتشدك طول فترة المشاهدة

وأشرف سرحان هو المصرى الوحيد فى كاست البرنامج وده واضح من التتر

ميعاد البرنامج كل جمعة الساعة 5 مساءً والإعادة طوال الأسبوع فى أوقات مختلفة
أنصحكم بمشاهدته برنامج هايل وأفضل من برامج ترفيهية كتير

ده لينك فيه بعض الحلقات من موقع روسيا اليوم
مشاهدات - روسيا اليوم

وده منتدى البرنامج فى نفس الموقع
�������

وده فيديو من حلقة كان بيتنبأ فيها بالثورات العربية، تقولش كان قلبه حاسس

[youtube]http://www.youtube.com/watch?v=aMxHL2uSAq8[/youtube]

المشاركة الأصلية كتبت بواسطة rockana9112007

اشرف سرحان دة شخصية جميلة جدااا جدااا وفعلااا انا كنت بتابع البرنامج بس معرفش انة مخرج وممثل فى الاوبرا

انا كنت مفكر انة عايش فى روسيا من زمن للدراسة او الزواج او اى شئ من هذا القبيل

بصراحة تلقائى وفية شقاوة المصريين

هى شقاوة المصريين دى اللى شادة ناس كتير للبرنامج
والتلقائية والقفشات بتخليك تضحك وتستمتع بدون ما تحس معاه بالوقت

المشاركة الأصلية كتبت بواسطة ghamrawy

تابعته مرتين بصيت لقيت نفسى عايز اروح اعيش فى روسيا
بطلت اتابعه هههه

هههههههه
انا كل ما اتفرج على حلقة واشوف تحضر الناس ونضافة شوارعهم وبساطتهم فى نفس الوقت اقول مفيش فايدة، بجد مفيش اى فايدة ولا حتى امل اننا نوصل لربع الناس دى فى اى شئ كويس، وده ملوش علاقة بالمستوى المادى او الاجتماعى اطلاقا لانه عمل كذا حلقة فى مناطق ريفية بسيطة جدا وبرغم ان الناس كانت بسيطة ورقيقة الحال لكن تحس فيهم بهدوء وكلاسيكية وذوق ونضافة كدة غريبة متلاقيهاش عندنا والاسم 7 الاف سنة تاريخ وحضارة! وربنا يصلح انفسنا حتى يغير ما بنا.