لا للكلاكسات.. ينفع تطبق في القاهرة؟

**OlaOsman** · 02-06-2008 07:22 AM

من كام سنة في اسكندرية بدأ تطبيق نظام منع استعمال الكلاكسات أيام المحافظ المحجوب .. النظام ده طبعا ليه فوايده و مساوؤه.. بس مش عارفة ليه حاسة انه محتاج يتطبق في القاهرة عشان يخرس عشاق استعمال الكلاكس على الفاضية و المليانة و اللي بيعلقوا الكلاكسات للناس بدون ضرورة و يربكوهم

يا ترى ينفع يتطبق في القاهرة؟ طيب هل الفكرة لاقية قبول عندكوا و لا مرفوضة تماما؟

انا مش عارفة لسه في اسكندرية متطبقة و لا خلاص. يا ريت اللي من اسكندرية يفيدونا في هذا الأمر و يحكوا التجربة السكندرية في الموضوع ده :)

**solycar** · 02-06-2008 08:04 AM

صعب جدا يطبق فى القاهرة

بل يكاد يكون مستحيل

تخيلى نفسك ماشية جنب واحد و من طريقة مشيته شكله كدة نايم.....فطبيعى انك تصحيه بكلاكس حلو كده

انا عن نفسى بعدى جنب على الاقل 15-20 سيارة نقل (من الكبار اوى اوى دول)يوميا فمقدرش امشى من جنبه من غير مافوقه او اتاكد انو فايق
عشان الناس دى ما شاء الله عليهم(يعزو النوم و هما سايقين)

غير كدة بقى احنا هنا كشعب مش مسئولين مش بنحب نبقى محكومين و نعشق اوى كسر اللوائح

يعنى مثلا عندك الصحراوى فيه سرعات محددة لكل حارة كل ما كان اسرع يمسك شمال اكتر
ممكن تلاقى واحد ماشى على 60 كم و ماسك الشمال او 120 و ماسك اخر اليمين و يستعجلاللى ماشى على مهله

و لو في يفطة عليها حظر استخدام الات التنبيه هتلاقى الناس تيجى جنبها و تديها كلاكسات بطريقة مستفزة

للاسف العيب مش بس فى المسئولين

احنا اللى معندناش استعداد للالتزام والدليل حال الاسكندرية بعد رحيل المحجوب

**محمد ابراهيم 1** · 02-06-2008 08:05 AM

الموضوع فى إسكندريه مش شغال حاليا
لكن الناس تعودت على عدم إستخدام الكلاكمس فى إسكندريه فأصبح إستخدامه محدود
وأنا كنت فاكر إن الناس مش حتستجيب له
لكن الحقيقه إن الناس كانت ملتزمه بشده بعدم إستخدامه إلا قليلا
وأنا أعتقد أن من الممكن النجاح لذلك فى القاهره على شرط أن تنشط الشرطه لضبط المخالفين وتوقيع غرامات فوريه عليهم مما سوف يدفع الناس الى الالتزام

**Islam_galal** · 02-06-2008 09:07 AM

المرور باظ خالص في اسكندرية
بس موضوع الكلاكسات لسة الناس متعودة علي عدم استخدامه
بس واحده واحده حنبقي زي القاهرة

أما إمكانية تطبيقه ، ممكن طبعا بس القانون يسري علي الكل و الدليل ما قد حصل و انتهي للأسف في اسكندرية

**solycar** · 02-06-2008 09:27 AM

المشاركة الأصلية كتبت بواسطة Islam_galal

المرور باظ خالص في اسكندرية

بس واحده واحده حنبقي زي القاهرة

ههههههههههههههههههههههههه ههههههههههههههههه
نحفة:)

**alaa_dash** · 02-06-2008 10:01 AM

هوه لو ممكن يلغوه خالص من الميكروباصات بالذات الموضوع يتحجم شوية ...
ده بيسلموا على بعض بكلاكس !
غير كده مفيش فايدة

**aif** · 02-06-2008 02:51 PM

كل شيء ممكن يتطبق ....
لكن لازم حد يطبقة ... ويتابع الالتزام بالتطبيق
والمرور هو اللي متكفل بتطبيق القوانين بتاعته
والمرور مش فاضي للكلام التافه ده ...
الظباط..... مشغولين بالعمل الادري ... مثل استقبال الناس اللي معاهم واسطة عشان يعملو رخص او ياخدو لوحات ..الخ .. الخ
اما الامناء والمندوبين ... طبعا مش فاضيين لأنهم اصلا بيشتغلو مناديين و ساسة لركن السيارات في الممنوع و خاصة عند البنوك والمصالح الحكومية ... والواحد من دول بيدفع كام الف جنية عشان يتحط في المكان ده ... فلازم يستفيد من كل دقيقة عشان يقدر يعوض اللي دفعه ويكسب ... بعد التقسيم مع الرؤساء طبعا
اما العساكر ... فهم اصلا طالع عينهم و مرزوعين في الشمس كل يوم عشان التشريفات والخدمات عند بيوت وطرق مرور السادة اللي مسؤلين عن البلد ... وفي الآخر الأكل التعبان اللي بيأكلهوله ( اللي هو اقل من اكل الحيوانات في الغرب ) بيتسرق ومايلاقيش ياكل ... ويضطر يشتغل منادي خلسة في الاوقات اللي الامين او المندوب يكون فيها مش موجود لأي سبب
عاوزة مين اللي يطبق الكلام ده بقي يا علا ؟؟؟؟؟؟؟
لو يرضيكي اسيب الشغل واطلع اولادي من المدرسة و المدام تيجي معانا وكل واحد ياخدله شارع ينظمه ويمنع الكلاكسات فيه .
انتي بس شوفي لكل واحد منا بيجامة يلبسها ... بس تكون صفرا ....وكرافاته وكل شيء ح يبقي تمام
..طبعا ... ما أنا ساكن في العباسية بقي
يا علا ...... اللي يعيش ياما يشوف ... واللي يسوق يشوف اكتر
انتي كل ما تسوقي اكتر في العاصمة .... ح تشوفي حاجات غريبة جدا ...
المدام عندي .. بتقوللي انا قبل ما اسوق كنت باركب العربيه وابص من الشباك وابقي مستمتعة ومش حاسة بحاجة .... دلوقتي بقيت اقعد جنبك وانا متعصبة وعمالة ادوس برجلي علي الارض كأني انا اللي سايقة ... وده كسر علينا ... ودة مش عاوز يعدينا ... وده ماشي بالعكس .. وده مش بيدي اشارة
......
يا علا انتي بتيجي علي الجروح اللي عند الناس كلها وتضغطي ...خلينا ساكتين ومستحملين
لو كانت الكلاكسات رجلا .... لخنقته وذبحته ورميته تحت كوبري الجيزة .... ثم أكلته