مش عارف اجيب ايه ولا اعمل ايه ؟!!!

السلام عليكم يا جماعه انا هبيع عربيتي النيسان قريب يعني هيبقي معايا في حدود ٥٠ الف و كنت عايز اجيب لانس كرستاله او كولت او ميراج بس سمعت ان الكولت قطع غيارها نادره و مش حلوه كعربيه و الميراج معتقدش هلاقي حاجه مش اقل من موديل ٢٠٠٠ ب ٥٠ الف
ف مفضلش غير الكرستاله موديل ٢٠٠٠ ..
فكنت عايز استفس عن شويه حاجات بعد اذنكوا ؟

١- ايه اخبار ثبات العربيه بعد ال ١٤٠ علما باني يوميا بمشي ١٥٠ و ١٦٠ و عايز حاجه ثابته نوعا ما ؟؟
٢- اخبار الصالون يعني واسع ولا ضيق و هل يشيل عائله من ٥ افراد مستريح بالسواق طبعا ؟!
٢ - هل موديل ٢٠٠٠ انجكشن ولا كاربيراتير ؟!!
٣- انا ناوي اجيب اوتوماتيك فهل الاوتوماتيك تجميعه كويس ولا اخليني في المانيوال ؟! لاني مبحبش العربيه تبقي زي البطه يعني يوم ما احتاج اشد بيها تبقي فله معايا متكسفنيش ؟!!
٤- ايه اخبار قطع الغيار و هل سعرها في المعقول ؟!!!
٥- ايه هي مشاكل العربيه بوجه عام يعني الي هيعيبه لان اكيد كل عربيه ليها عيوب بس انا متاكد ان مميزتها هتغطي علي عيوبها بس للعلم برضوا ؟
٦- ايه اخبار الكماليات ؟! وهل فيها اير باج ولا لا ؟
٧- موديل ٢٠٠٠ بالتحديد ايه الاختلاف بينه وبين الموديلات الي قبليه ؟!
٨ - هل فعلا العربيه تستحق اني انزل من نيسان صني ٩٨ و اركبها ؟!!!

معلش اسئلتي كتيير بس بجد محتاج مساعدتكوا
و يهمني جدا راي ملاك العربيه ؟!!

الكريستالة اعتقد انها كلها كربيراتير ... و5 افراد فيها هتخلي العربية قريبة جدا من الارض اكتر ما هي واطية.

حاول تفكر في حاجة تانية.

اقتباس:

---

المشاركة الأصلية كتبت بواسطة Ramyhamdy

السلام عليكم يا جماعه انا هبيع عربيتي النيسان قريب يعني هيبقي معايا في حدود ٥٠ الف و كنت عايز اجيب لانس كرستاله او كولت او ميراج بس سمعت ان الكولت قطع غيارها نادره و مش حلوه كعربيه و الميراج معتقدش هلاقي حاجه مش اقل من موديل ٢٠٠٠ ب ٥٠ الف
ف مفضلش غير الكرستاله موديل ٢٠٠٠ ..
معايا الموديل ده واسمحلي ارد علي استفسارات حضرتك لحد ما الحبايب تيجي :)
فكنت عايز استفس عن شويه حاجات بعد اذنكوا ؟

١- ايه اخبار ثبات العربيه بعد ال ١٤٠ علما باني يوميا بمشي ١٥٠ و ١٦٠ و عايز حاجه ثابته نوعا ما ؟؟
ثبات العربيه معقول الا حد ما والعربيه تقيله علي الارض وكويس انك نازل من ياباني تركب ياباني فالمدرسه واحده بس لو عاوز ثبات فعلي يبقي عفشه سبور وجنوط اكبر
٢- اخبار الصالون يعني واسع ولا ضيق و هل يشيل عائله من ٥ افراد مستريح بالسواق طبعا ؟!
صالون واسع وبشيل فيه جنينه حيوانات مش عائله بس :) بس كل ما تشيل كل ما تقرب من الارض العربيه واطيه
٢ - هل موديل ٢٠٠٠ انجكشن ولا كاربيراتير ؟!!
كربراتير كل الكريستاله كربراتير 1300 والميراج 1500
٣- انا ناوي اجيب اوتوماتيك فهل الاوتوماتيك تجميعه كويس ولا اخليني في المانيوال ؟! لاني مبحبش العربيه تبقي زي البطه يعني يوم ما احتاج اشد بيها تبقي فله معايا متكسفنيش ؟!!
لو اوتو في ال1300 منصحكش بصراحه والعربيه سريعه وجميله وكل حاجه بس مش اللي في خيالك وياسلام بقي لو مشغل التكييف وعاوز تجري :)
متحاولش تشد غير مع عربيات حنطور وكارو وتكاتك عشان متتكسفش زي ما بتقول
واسيب اجابه السؤال ده بالكامل للناس اللي بتحب تجري لاني مبحبش اجري خالص انا كان تحت رجلي هوندا 2000 سي سي كنت بخاف اجري بيها :)
٤- ايه اخبار قطع الغيار و هل سعرها في المعقول ؟!!!
زي الرز الحاجه الوحيده اللي متقلقش منها خالص
٥- ايه هي مشاكل العربيه بوجه عام يعني الي هيعيبه لان اكيد كل عربيه ليها عيوب بس انا متاكد ان مميزتها هتغطي علي عيوبها بس للعلم برضوا ؟
العيوب من وجهه نظري
*انها واطيه وده عيب في الياباني بوجه عام
* موتورها كان لازم يبقي 1500 وفعلا اللي راكب كريستاله 1500 معتقدش انه ممكن يحلم بعربيه تانيه كاداء في فئه سعرها
* فيه بعض الحاجات فيها تافهه اوي وملهاش اي تلاته لازمه بس غاليه عالفاضي
زي مثلا فرش الشنطه تخيل اني جايب شنطه كامله ب500 جنيه وفرش الشنطه ب500 جنيه
فيه مزرابين بلاستيك كده في السقف ولا ليهم اي لازمه بس شكل للعربيه الاتنين ب250 جنيه في حين ان جوز الاكصدامات فيها جداد تيواني ب300 جنيه
:)
غير كده اضحك عليك لو شفتلها عيوب بس اهم حاجه اهم حاجه اهم حاجه وانتا بتشتري الحاله
العربيه احدث موديل فيها بقاله 12 سنه
واكيد فيه مصاريف
تاخدها من ايد حد صاينها حتاخد حلاوتها كلها
لو خدتها من تحت ايد زبال حتشيل قرفها كله وحتكرهك في اي حاجه باربع عجلات :)


٦- ايه اخبار الكماليات ؟! وهل فيها اير باج ولا لا ؟
اعتقد مفيش عربيات بتتوضب زي الكريستاله لو معاك 100 الف جنيه ممكن تصرفهم عليها ولو قصدك عالكماليات الاساسيه فيها كل حاجه تكييف سنتر ازاز كهرباء والميراج فيها اير باج انا شخصيا معنديش

٧- موديل ٢٠٠٠ بالتحديد ايه الاختلاف بينه وبين الموديلات الي قبليه ؟!
ولا اي حاجه اختلافات بسيطه انا عندي المرايات ظبط كهرباء مش عارف 99 فيها ولا لا والاكر بتاعت الباب جوه وبره نيكل والتابلوه قال ايه ابانوس وهوا اصلا حته بلاستيك شبه الابانوس وجراب نضاره
يعني شويه حاجات ممكن تتحاب من التوفيقيه ب30 جنيه
انما الاختلافات بين الموديلات وبعضها
من 97 - 98 الكبوت شكل مختلف الشبكه اصغر وفيه منها فاضيه وفيه منها كامله
من 99-2000 الكبوت والشبكه اكبر بس كده
الشنطه واحد وقطع الغيار واحده

٨ - هل فعلا العربيه تستحق اني انزل من نيسان صني ٩٨ و اركبها ؟!!!
احب اعرف وجهه نظرك انك اصلا تنزل من نيسان وتركب لانسر
موتورك اد ايه ؟ كماليات عربيتك ايه ؟
واعتقد انك ممكن من كلامي اللي فات كله تقدر تحدد هل تستاهل انك تنزل ولا لا


معلش اسئلتي كتيير بس بجد محتاج مساعدتكوا
و يهمني جدا راي ملاك العربيه ؟!!

اتمني اكون ساعدتك وانتظر رأي باقي الاعضاء واتمني تنضم لينا قريب ان شاء الله بس بعربيه كويسه

---

كريستالة

الله ينور عليك يا صبحى جبت من الاخر هوة ده الكلام المفيد بس احب اضيف للاخ الكريم ان الكولت هية هية الكريستالة مش نادرة والا حاجة وبعدين الكولت مش هاتكون عملية وانت بتقول عيلة 5 افراد هاتبقى صغيرة انما ثبات وجرى افضل من الكريستالة والباقى مفيش كلام يتقال على كلام صبوحة ملك الكريستالة تحياتى

فعلا اللة ينور كلام كلة صح وعندك حق فى كل حاجة