حد صلح كمبروسر التكيف قبل كدة ؟

**moudy2002** · 02-06-2008 04:56 PM

عربيتى اكسنت 1500 الشكل القديم
كشفت مرتين على التكيف مرة عند ساندان الى المعادى وقلى انه الاحسن انى اشترى واحد استيراد واركبة وتمنه حوالى 900 جنية
او اجيب واحد جديد بحوالى 1900 جنية
المشكلة انى لسة طالع من عمرة العربية مفيش من شهر وطبعا اجرحت فيها جامد

المشكلة انه الكمبروسر فية اولسية شفط ودة على كلام ساندان وصنيعى تانة شافة . بس انا حاساس انها حاجة مش مستهلة انى اجيب واحد استيراد وبرضة هيطلع بطيخة .. وحرام اجيب واحد جديد وانا لسة طالع من العمرة

فى حد صلح الكمبروسر قبل كدة ونجح الموضوع وعاش معاه من غير ما يسرب تانى ؟؟
شكرا ومنتظر الرد

**banboty** · 02-06-2008 05:06 PM

مرة صلحنا كمبرسور بتاع عربية دايو سبيرو بتاعت واحد صاحبي و كان عنده نفس المشكلة الاولسيه الوسطاني كان بيسرب

الراجل جاب له طقم اصلاح و عمله كويس الصراحة و اشتغل زي الفل ..

اهم حاجة انك تلاقى طقم الاصلاح بتاع كمبرسور الهيونداي و تانى حاجة الصنايعي يكون شاطر ..

الورشة اللى روحنا لها بتاعت واحد اسمه على العفريت ورا محطة موبيل شارع الطيران ..

طقم الاصلاح و المصنعية اتكلف 350 جنيه و الكلام ده كان من سنتين !

**MMamdouh** · 02-06-2008 10:15 PM

او ممكن تروح للمراكبى فى جسر السويس امام بوابة نادى الشمس رقم خمسة

MMamdouh

**hazem_khidr** · 03-06-2008 04:33 PM

كان عندي نفس المشكله في كمبروسر السويفت
و الاخصائي فكه و غير جوان او اويل سيه جوه كده و حط زيت تاني و قفله و من يومها زي الفل الحمد لله.
لو عاوز تجيلي المحله لو حضرتك قريب اعملهولك مفيش مشاكل بس يبقي يوم من بدري.:)

**marsguy** · 03-06-2008 06:07 PM

المشاركة الأصلية كتبت بواسطة moudy2002

شكرا جزيلا اخى banboty على اهتمامك وجزالك الله خيرا اخى الكريم
وطبعا محمد بيك ممدوح مهما عملنا معاك مش هنكفيك حقك وخيرك على المنتدى كلة يا باشا .
انا هروح للمراكبى وربنا يسهل الحال..

إبقى قول لنا عملت إيه بقى، عشان أنا كمان الكومبريسور بتاعي بايظ وبيعمل صوت عالي لما اشغله وطبعاً ما بيسقعش خالص.