الموضوع: العربية بطلت مني امبارح و جابت جوان

امبارح الصبح و انا رايح الشغل لقيتها بدأت تتقل في المشي و تقطع كأنها فاصله بوجيه.
قلت مش مهم ابقى اغيره بس الحق اوصل الشغل.
شوية و بدأت تبطل مني و الماتور بيرجرج. بصيت على امبير الحرارة كويس و انا لسه مغير زيت.

المهم وصلت الشغل بالعافية و قولت اشوف فيها ايه و انا مروح.
خلصت و نزلت حاولت اعمل كل حاجه مفيش فايده بصيت على الكهرباء و البنزين و الزيت و الميه مخلتش حاجه. في مركز صيانة جمب الشغل رحتله بعت معايا واحد فضل يحاول معاها ساعتين و برضه مفيش فايده.
قالي لازم تروح المركز - زقناها على هناك و حطها على جهاز قياس ضغط البستم لقى التالت و الرابع مهربين على بعض (ده اللي قاله)
و قالي كده يبقى جوان وش سليندر. طبعا انا سمعت كده و اتدايقت جدا ده انا بعامل العربية احسن معامله ولا عمري بقرص عليها. و كمان لا سخنت ولا الميه قلت و لا الزيت نقص.

المهم قالي هتعملها؟ طبعا انا مش هعمل جوان وش سليندر عند حد معرفهوش. قولتله لأ قفل و حاسبته و طلعت وقفت عربية نص نقل سحبني من مدينة نصر لغاية المظلات و خد 150 ج بالعافية. بعد ما طلع عيني و كنا هنعمل حدثتين و الناس بتمشي بغشومية اللي عاوز يعدي بين العربيتين و اللي جاي عاكسي و عاوز يعدي مني و الراجل ماشي قدام ولا هو هنا ده غير انه عماني بدخان ماتوره المفوت.

لسه بقى النهارده هوديها للميكانيكي بتاعي يفتح و يقولي فيها ايه و نفسي لوحد يقولي ده جه من ايه الموضوع ده؟