تقرير صيانة الـ40000 كم في مركز أبو غالي بالزيتون
السلام عليكم
أنا حسام أول مرة أشارك معكم في قسم الدايو لكن مشارك دائم في قسم النيسان لأمتلاكي سيارة نيسان صني و والدي يمتلك نوبيرا sx موديل 2001
فيما يخص النوبيرا أشتريتها لوالدي سنة 2008 بديل لسيارته طيبة الذكر بيجو 505 كانت موديل 1981 و كانت معاه من الزيرو و بعناها عشان كانت عاوزة عمرة موتور و كان فيها صدأ كتير و اللي بيتفك في مصر عمره ما بيرجع لأصله
المهم أشترينا نوبيرا 2001 بعد بحث لمدة 3 شهور و بالصدفة ربنا وفقنا في عربية أول يد من الزيرو فابريكة بالكامل أستعمال خفيف جدا كانت عاملة 48 ألف كم و كمان وأحنا بنخلص فيها أتضح ان صاحبها أخو صديق والدي
و من ساعة ما أشترينها في 2008 بنغير زيت موتور و بس و العربية مركونة كتير لأن والدي حركته قليلة و المالك السابق كان عامل صيانة ال40 ألف و معاه ورق تغيير سير الكاتينة
العفشة بتاعة العربية كانت بتخبط و كشفت عليها عند أكتر من عفشجي و زوايا كله أجمع علي ضرورة تغيير المقصات و أن دي طبيعة النوبيرا بتاكل جلب المقصات الأمامية
و كمان صوت الموتور كان عالي و دوران الموتور عالي لكن السحب ممتاز و جبت بيها أكتر من مرة 170 كم و 180 كم مستريح علي الدائري
نهايته من أسبوع تحول موضوع ركنة العربية الشبه دائمة إلي بداية أعتماد عليها و هنا قررت أني أغير الكاتينة و أضبط الموتور بالكمبيوتر عشان دورات الموتور العالية و بعد بحث كتير تبين أن تكلفة تغيير الكاتينة عند ميكانيكي حتتكلف حوالي 600 ألي 700 جنيه حسب الخامة و المصنعية + العادي اني حغير زيت بحوالي 300 جنيه
فقررت أني أعمل الصيانة الكاملة في التوكيل و بعد البحث و السؤال توصلت لمركز أبو غالي في شارع طومان باي بالزيتون و حجزت و رحت بالفعل النهاردة
أستقبال المهندس هاني الحلواني ميتوصفش لأنه أنسان رائع في معاملته
دخلت المركز الساعة 8.30 صباحا و خرجت منه الساعة 2.30 مساءا
طبعا دي كانت أول مرة أروح للمركز ده و المهندس شرحلي صيانة ال40 ألف بالكامل و وضحلي أنهم لازم بيعملو كمان تقرير بحالة العربية بالكامل مع الصيانة
تكلفة الصيانة حوالي 1300 جنيه
تغيير زيت موبيل 1 - فلتر زيت - فلتر هواء - فلتر بنزين - بلية شداد كتينة - بلية شداد دينامو - سير كاتينة - سير دينامو - ضبط الموتور بالكمبيوتر - تنظيف مدخل الخانق ( الرشاشات ) - تربيط العفشة بالكامل - تغيير اماكن العجلات × - مراجعة تيل الفرامل أمامي و خلفي - رجلشة تيل الفرامل الخلفي - تغيير مياه الريدايتير و معلش لو كان فيه حاجة نسيتها
بالأضافة إلي تكلفة أضافية حوالي 700 جنيه
تغيير كوعة ثرموستات حرارة الريدياتير - تغيير كل وصلات المياه الفيبر لخراطيم مياه تبريد الموتور - أختبار دورة مياة التبريد بضغط المياه للتأكد من سلامتها - تغيير قاعدة موتور
مع ملاحظة ان أتنين وصلة المياة للخراطيم الساخن الخارج من الموتور الأصلي الفيبر مكنش موجود و أنا قلتلهم المرة الجاية و أنا بأستلم العربية واحد فيهم ضرب و المية الخضراء نزلت كلها و هنا زاد اعجابي بصراحة بكل المهندسين هناك لأن فورا المهندس هاني قالي معلش أتفضل تاني في الأستراحة و فكو الوصلة الفيبر و بعتو واحد خرط أتنين معدن بدل الفيبر و ده اللي أخرني لأن العربية كانت خلصت الساعة 12.00 ظهرا و كمان حطو جركن مياة خضراء جديدة من عندهم بديل اللي وقعت بدون أضافة أي تكلفة أضافية علي الفاتورة
النتيجة النهائية العربية أصبحت ممتازة في السحب و الأستجابة و صوت الموتور أصبح هاديء و العفشة بعد ما أتربطتت بقت حاجة تانية و أن كان لسة فيه خبط لعدم تغيير المقصات الأمامية و كمان التقرير بأحتياجات العربية فيه انها عاوزة بطاحات و بيض دريكسيون و أحتمال مساعدين و شوية حاجات كده
و هنا أذكر أن المهندس هاني كان من أول النهار طلع تقرير بأحتياجات العربية و قعد يناقشني فيه و كان رأيه نبدأ بالموتور و مستلزماته و بعدين في أي وقت ندخل علي العفشة علي مرات لأنها ممكن تخبط شوية بس مفيش منها خوف حاليا و ده اللي عملته النهاردة
في النهاية و بعد ما صدعت راسكم بالرغي ده كله أقول العربية النوبيرا معقولة من ناحية الحجم علي السعر في المستعمل بس يجب الكشف علي عفشتها كويس عشان طلباتها ممكن تكون كتير
و بشكر المهندسين في مركز أبو غالي دايو لأنهم محترمين فوق الوصف و حسيت أن العربية بتاعتهم مش بتاعتي
