الموضوع: تقرير تركيب فامية مقاوم للكسر لنيسان صنى سوبر صالون 2012

بسم الله الرحمن الرحيم

إخوانى الكرام اليكم تقرير عن تركيب
فامية مقاوم للكسر فى توكيل لومار LLUMAR
لعربيتى نيسان صنى سوبر صالون 2012

بداية أحب أعرفكم ان فيه أنواع مختلفة للفيلم دة
(الفامية بلغتنا إحنا )
نوع للحماية بس (مقاومة الكسر) و نوع يعمل كعازل حرارى
و نوع يحمل خواص النوعين السابقين دة غير ان فيه سمك مختلف لكل نوع و طبعا كلما زاد السمك زادت الحماية بس برضه السعر بيزيد

و الفيلم دة كنت نوهت عنه قبل كدة فى موضوع زميلنا اللى كانت عربيته هاتتسرق و الحرامى كسر زجاج العربية
http://www.nilemotors.net/Nile/270193-a.html

و كنت حطيت لينك الفيديو التالى

LLumar Window Film Smash & Grab Lab Test - YouTube

و بعد كدة فضلت أدور و را الموضوع دة لغاية لما عرفت أوصل للمكان و التليفون و كلمت صاحب التوكيل و هو راجل محترم و مهذب للغاية و اتفقت معاهم على ميعاد التركيب و الأسعار

الحكاية دى عملتها قبل ما أركب الفرش عند جينز كار و دة باين من الصور

نبتدى بقى التقرير

الموضوع طلع بياخد وقت طويل شويه أو قول شويتين
دة غير انه موضوع صعب و محتاج دقة

أولا بيتم غسل العربية بالكامل بالمياة فقط
و بعد كدة بتدخل فى مكان مقفل علشان الأتربة
(المكان محتاج يتقفل أكتر من كدة حاجة بسيطة و انا عرفت انهم ناوين على كدة فعلا)

ابتدو الأول فى الزجاج الخلفى و انا أخترت أركبله فيلم شفاف
و
بعد كدة بيترش مياة مخلوطة ببيبى جونسون على الزجاج

و دة علشان مايسبش أثر على الفيلم او الزجاج
و
بعد كدة بيقطعوا الفيلم على مقاس الزجاج

و بعدين بيرشوا الفيلم برضه بمياة مخلوطة ببيبى جونسون

و بعدين يبتدوا يفردوا الفيلم على الزجاج و يخلوه واخد نفس شكل الزجاج عن طريق التسخين بمسدس حرارة (Heater)

على فكرة كل دة كان تجهيز بس لأن بعد كدة اكتشفت ان فيه طبقة رقيقة على الفيلم بتتشال علشان يلزق على الزجاج

المهم بعد كدة بدؤا يلزقوه من جوة مع استعمال المياة و بيبى جونسون

بعد كدة انتقلوا للبرابريز (الزجاج الأمامى) و انا أخترت فيلم شفاف بس بيركب من برة علشان الحماية ضد الزلط و الطوب اللى بيطيروا من عربيات النقل و خلافه
و دة بيكون أكثر سمكا و طبعا أغلى سعرا

و بعد كدة بيتفرد باستخدام التسخين و بعد كدة بيتلزق

بعد كدة بدؤا فى زجاج الأبواب و انا اخترت الفيلم اللى بيجمع خواص الحماية و العزل الحرارى و هو مائل للون الأخضر و شفاف بدرجة 65%
بس سعره تقريبا مرة و نص من سعر الشفاف لو هيتركب

هو يبان غامق فى الصورة بس دة علشان ملفوف على بعضه
و
جابوا الأول فامية عادى ياخدوا عليه رسمة زجاج الأبواب و الهوايات

و بعد كدة قصوا الفيلم اللى هايركب بالكتر على الرسمة بتاعت الأبواب

و بعد كدة بدء التركيب بنفس الخطوات بس الفيلم دة ماكنش محتاج تسخين زى الأفلام التانية
بس هم استخدموا التسخين برضه على خفيف

و دى صورة للفيلم بعد ما ركب قدام بس و الفرق مش كبير فى الغمقان بينه و بين الزجاج الخلفى اللى لسه مركبلوش الفيلم

و دى صورة تركيب الزجاج الخلفى

و دى الصورة النهائية للعربية بعد ما خلص التركيب

و بعد كدة قالولى انى مش لازم افتح الزجاج لمدة 48 ساعة و دة علشان لزق الفيلم يثبت و علشان احنا فى الشتاء لو فى الصيف الموضوع بياخد 24 ساعة بس

دلوقتى أنا لما بقفل زجاج السيارة بكون مستريح نفسيا
ان صعب حد يكسره
طبعا أنا مش جايلى قلب أجرب و أخبط الزجاج
بس عموما أنا خدت ضمان من الشركة على الفيلم 3 سنوات ماعدا الزجاج الأمامى سنة واحدة لأنه معرض أكتر للصدمات

الموضوع خد تقريبا 6 ساعات كاملة لأنه فعلا مش سهل و محتاج دقة زى ماقولت فى الأول

فى النهاية اتمنى يكون التقرير عجبكم

و السلام عليكم و رحمته و بركاته

ما شاء الله الف مبروك