الياريس - طاسة إتكسرت .. جنط إتعوج ... إكصدام متخربش ... الحمد لله!
السلام عليكم
الحمد لله ولا حول ولا قوة إلا بالله وقدر الله وما شاء فعل!
النهارده الصبح في طريقى للشغل وواخد الطريق الصحراوي الجديد إللي بينزلني من العجمي لوسط البلد من ناحية الموقف الجديد .... الطريق متبهدل جدا جدا جدا وبقالي 3 أيام ما مشيتش فية بس قبل كدة كان إترصف وبقى كويس وأكاد أكون حفظته وحفظت حفرة ومطباطة.... النهاردة حاجة تانية ومنتهى الإهمال والإستهتار بأرواح الناس! حفر في كل مكان (بعد ما سفلتوا)... أعمدة إنارة مرمية في وسطالشارع .... والأدهى والأضل بلوكات خرسانية محطوطة علشان تنبة الناس من الحفر والأعمدة!!!!!!!!! الحمد لله
ظروف الواقعة.... عربية جرار ماشية وواخدة نص الطريق (إللي هوا أصلا بقى نص) والعربيات بتعدي منها بالعافية ... عربية بتعدي من جنبها ربع نقل وانا وراها بس في شاب حليوة ورايا بعربية صغيرة Oka وعاوز يعدي بأي طريقة من جنبي ... العربية إللي قدامي داس بنزين وأخد غرزة من قدام الجرار وانا وراه ببص ألاقي حفرة كبيرة بفاديها في بلوكة خرسانية ... أخد يمين ؟ لا لأن أخينا الفرحان بنفسة قافل عليا وعاوز يعدي وعربيات جاية ورايا.... الحمد لله ... تفاديت الحفرة وتفاديت البلوكة في أقل من الثانية بس مع سرعة العربية الإكصدام إتحك من تحت ناحية اليمين..... وسمعت صوت طااااخ!
لمين نفسي من وسط الحفر والأعمدة والقرف كله وركنت ونزلت وانا متوقع الإكصدام إتفشفش!
الإكصدام إتخربش كام خربوش جنب بعض بس العجلة اليمين كانت على الأرض والطاسة إتعوجت وحصل فيها شرخ والأصعب لما فكيت الطاسة لقيت الجنط معوووج.... الحمد لله على كل حال.
محتاج نصيحتكم:
1- الكاوتش ممكن يكون إتدمر ولا فية أمل... هو مافيهوش قطع ظاهر.
2- الجنط أسمع إنه ممكن يتعدل بس كدة حيتكهن ويتحط إستبن ولا ممكن يتعمل كويس وأمشي علية؟
3- الطاسة ممكن حد بتاع فيبر يعدلها ويلحمها ولا مش ممكن؟
4-هل اروح حد برة ولا أروح مركز بريدجستون إللي في إسكندرية يظبطوا الكاوتش والجنط؟؟؟ وهل بيعملوا خصم لأعضاء نايل موتورز ؟ ومين الشخص المسؤل هناك؟
5- ممكن تكون الخبطة سمعت في الطنبور او أي جزأ من أجزاء العفشة؟
6- أعتقد إني أصلح على حسابي وأستعوض ربنا بدل ما أدخل في متاهة التأمين؟؟؟ قلتم إية؟
وجزاكم الله خير
