الموضوع: عايز رأيكوا فى موضوع خاص جداااااااا

ازيكوا ياجماعة ..مش عارف بصراحة اكتب الموضوع ازاى بس الخلاصة انى قررت اخطب لان اخييرا خلصت الحياة "التعليمية" وداخل عالحياة العملية كلها 3 شهور واتخرج
واخوكم شخصية عقلانية اكتر منها عاطفية
فعشان كدة قررت اشوف النسب المحترم الاول وبعد كدة اشوف بناتهم ..مش اشوف البنت وبعد كدة اتكعبل فى اهلها
وكان قصادى 3 بنات كلهم ولاد ناس محترمين جدا ..الاتنين الاولانيين شلتهم من الحسبة خالص لان الاولى كانت مأنتمة وسلوكها مش عاجبنى خالص ودى اللى كانت جايبهالى اختى لانها كانت شايفهاها هادية وجميلة (وطبعا مكانتش تعرف انها مصاحبة) بس لما تابعتها صرفت عنها نظر مع انها دلوقتى مابقتش بتمشى مع ولاد
والتانية والدها ووالدى اصحاب وكانوا بينمروا هما الاتنين يوفقونا مع بعض ومانكرش البنت دى جميييلة جدااا بس بردو فيها نفس العيب انها مابتقولش لولد لأ وعلى طول ماشية مع ولاد وكل يوم ولد وغير كدة ممكن فى تيرم فيه 6 مواد تشيل منهم اربعة او خمسة ..فدا بردو انعكاس لدرجة التزامها اللى تكاد تكون تحت الصفر واكيد شخصية زى دى ماقدرش اخليها تربى ولادى لان نتيجة التربية تقريبا واضحة

هاتقلولى وايه المشكلة لما تكلم ولاد هاقولكم معلش خدونى على قد عقلى لان دا مبدأ عندى وممكن يختلف من شخص لاخر ..لكن بالنسبالى دا مبدأى وعمره ماهيتجزأ


البنت التالتة بقى وهنديها الاسم الكودى (س) وهى دى لُب الموضوع ..دى بردو بنت ناس محترمين ووالدها محترم وطيب جدا ..البنت عمرى ماشفتها بتكلم ولد وشايفها هادية جدا ..علاقتها بزمايلها بردو حلوة جدااااااا وان كانت انطوائية ودا اللى عاجبنى فيها لانى شايفها متناسبة معايا (كلام فى سركوا انا كمان انطوائى وممكن انعزل عن العالم ومابيفرقش معايا ومن نفس برج البنت ..الميزان )

لغاية دلوقتى شايف شخصيتها تناسبنى جداااااااااااااا
بس العيب القاتل اللى مضايقنى ..ستايل هدومها ..ضيق ومش عاجبنى خالص ..قلت لنفسى معلش بكرا لما تتجوز وتتخطب هاتتلم زى مابشوف بنات كتير بتبقى اكثر احتراما بعد الجواز
بس بالصدفة النهاردة كان فيه اتنين اصحابى بيتكلموا بردو عن بنت فصديقى الملتحى عمال بيقول لصديقى التانى ..سيبك من البنت دى لو عالجمال فيه الاجمل منها شكلا وخلقا ودينا فاظفر بذات الدين ...الكلام دا سمعته من هنا وساعتى البيولوجية ضربت من هنا معرفتش هو فيه ايه بس اللى اعرفه ان كل عقلى اتلخبط
البنت اللى كانوا بيتكلموا عليها دى شايف استايل لبسها محترم عن البنت اللى انا بافكر فيها ومع ذلك كان صديقى الملتحى مش عاجبه هدومها وصديقى التانى بيقوله بس انا بحبها ..اومال استايل لبس (س) هيبقى ايه بالنسبالها؟؟
انا سمعت كلامهم هما الاتنين وجت فى دماغى كل التجارب اللى شفتها لموضوع الجواز وازاى بنات كانت بتلبس مينى جيب وبعد الجواز اتنقبت
دلوقتى بقى البنت (س) هى جميلة لكن مش ملكة جمال ودا مايهمنيش طالما شخصيتها عجبانى
خلقاً بردو شايفها محترمة باستثناء لبسها
ديناً دى بقى هى اللى برجلتنى وماعرفهاش .مش هاقول على نفسى متدين اوى.. وعارف انى باقصر كتير فى حق ربنا لكن عالاقل باعمل فروض دينى
هى بقى حكاية لبسها مقلقانى منها دينيا ..ماقولتش عايز واحدة متدينة جدا لكن عايز اللى اتجوزها ماتكونش اقل منى تدينا .. عايز واحدة زى اختى مابتكلمش ولاد ..لبسها شيك ومحترم ..محترمة نفسها ودينها ومابتفوتش صلاة وطبعا مش لاقى قصادى فى نطاق العائلات اللى اعرفها
بصراحة مش عارف اعمل ايه وعايز اسمع خبرات الناس فى الحاجات دى يعنى ايه رأيكم لو كنتوا مكانى
طبعا صلاة الاستخارة سايبها اخر حاجة لان دى اللى هاتحدد كل دا بس بردو عايز اعرف خبرات اكتر عشان عقلى يعرف يوزنها صح
لو كنت مكانى وبنفس تفكيرى كنت هاتعمل ايه؟؟ تصرف نظر عن البنت دى ولا لأ؟؟
واسف للاطالة

المشاركة الأصلية كتبت بواسطة wa7d

بص نصيحة من اخ اكبر , لا تحكم علي اخلاق الشخص باللبس , اعرف بنات كما تقول لبسها محترم وتمشي باحترام ولكن ما خفي كان اعظم وعن تجارب ,ومش معني كدا انك تروح ترتبط بواحده بتلبس عريان , انما متحطش اللبس مقياس للاحترام والاخلاق ,شخصية اللي قدامك هي اللي حتحدد اذا كان اخلاقها فعلا داخلية عن اقتناع ولا مجرد خداع وخوف من كلام الناس .

مش قصدى اخلاقها بالعكس البنت دى من النوع النادر اللى تلاقيها فى حالها جدا وهادية جدااا ،ومع ذلك علاقاتها بالناس حلوة..خلقا فى الظاهر كويسة جدااا
لكن قصدى درجة التدين دى اللى قلقانى وخصوصا انى عايز واحدة تقربنى من ربنا ..لو حتى زيى بس بعد كدة نشجع بعض على الفروض والسنن ..ودى انا شفتها فى جوازة عمى وجوازة اختى كل زوجين منهم كانوا بيشجعوا بعض

المشاركة الأصلية كتبت بواسطة mohamedbook

والله بقت حاجة زفت في الاختيار
كنت في المعادي وداخل اصلي لقيت وحده لبسة هدوم زي الزفت ودخلت صلت ازاي مش عارف
لبس ديق بمنظور ايه استرتش ياعني واسكني والكلام ده نفض خالص
لو جيبات بس علي اد جسمها مش محزق وقي ومش فضفاض فده يعني في الايام الحلوة دي ممكن نسمية عادي
ولو انت عايزها لسة نقاب او عبيات واسعة هتلاقي باردوا بس ممكن في الحاله دي تقول مبهدلة في لبسها
والله انت ونصيبك الجواز عامل زي البطيخة ياحمرة ياقرعة وانت ونصيبك
بس خد وحده بتتقي الله يعين محافظة علي الصلاه اما لو مش بتصلي سيبك منها خالص وبعدين طول فترة الخطوبة عشان تعرف كل حاجة بس في حدود عشان لو سبتها يبقي بشياكة واحترام من غير متجرح مشاعرها

هههههههههههه دا العادى دلوقتى ممكن تدخل عادى بالبس الضيق وفيه إسدال جوة ..تصلى وتطلع تمارس حياتها بطبيعية :)
دى بقى ماعرفش بتصلى ولا لأ ..وعشان كدة مقلق ..وان شاء الله لو عالخطوبة فمش هاتقل عن سنتين بالميت
وعلى رأى حضرتك الجواز زى البطيخة والله اعلم بالمستخبى

المشاركة الأصلية كتبت بواسطة samyyousef

ربنا يوفقك و يوفقنا
يجب ان تعلم مقدما ان - غالبا - كل خاطب كاذب.............و لا اقصد حرفية الكلمة ...لكن اقصد انه غالبا يظهر احسن ما فيه و يخفي الكثير
لذلك بعض من اعلمهم من المتزوجين ينصحون بمعرفة بعض الجوانب الخاصة بالبنت بطريق غير مباشر...بمعنى - و على سبيل المثال - ينصحون بالدقيق في سلوك والدتها عامة و مع والدها خاصة
اما بالنسبة لما ذكرته عن أن هناك من كانت ترتدي الميني جيب ...ثم تغير حالها الى النقاب....فهذه ليست قاعدة....و تحمل الكثير من المخاطرة
اما بالنسبة لمن تتحدث عنها و التي تفكر في خطبتها...........فيفضل عدم الكلام عن شخص بعينه و ما اذا كان على درجة التدين ام اقل .....فلا احد يعلم مقدار دين احد حتى اننا اذا توسمنا في احد الصلاح قلنا نحسبه كذلك.........و حسما لهذا الأمر حتى لا يتوه الحوار لو كنت تميل اليها ...و استخرت الله في هذا الأمر ...فاسألها بشكل مباشر عن موقفها من نمط ملبسها و توجهها مستقبلا
اردت ان انصحك بما علمت.........و في النهاية اقول ...الله أعلم........و ربنا يوفقك

طب ودى اعرفها ازاى؟؟؟... اللى اعرفه ان اخت (س) ليها نفس تفكير والدتها وبصراحة تفكيرهم الاتنين مابيعجبنيش لا اخت س ولا والدتها ولا بيعجب (س) وعشان كدة مافكرتش فى حكاية طباع والدتها لان البنت بتقول لاختها الكبيرة غلى الغلط غلط فى ظل موافقة والدتها عالغلط دا

المشاركة الأصلية كتبت بواسطة screenplays

كده كده عمر محدش عاش مرتاح في حياته و كلنا كده كده ميتين فتعيش مش مرتاح مع نفسك احسن تعيش مش مرتاح مع ناس تانيه تعد تقرف فيك + انهم مسئوليه علي دماغك و ممكن تروح جهنم لو مشلتش المسئوليه دي صح

اعذرني لصراحتي و لكن دي الحقيقه

يااااه ليه كدة بس؟؟ الحياة مش بالسواد دا
وبالعكس ترتاح مع نفسك وتعادى غيرك افضل من انك تبقى مش مرتاح مع نفسك ومرتاح مع غيرك
وازاى هرتاح مع غيرى وانا مش مرتاح مع نفسى؟؟؟
وحضرتك قلت جملة حلوة بتاعة هاروح جهنم لو ماشلتش المئولية صح

المشاركة الأصلية كتبت بواسطة mnabeih

الكلام علي الفتاة س
واضح من كلامك ان انت كنت مقتنع بيها بس كلام زمايلك هو اللي اثر عليك
انا بس عاوز اعرف هاتلاقي فين الاكثر جمالا و خلقا و تدينا , اصلهم مش مرمييين يعني
موجودين دة اكيد بس مش هاتفضل مستني الperfect دي علي طول
مش باللبس يا اخي, هو عليه عامل بس بسهولة بيتظبط
المهم الاخلاااااااق و تبقي علي قدر من التدين علي الاقل بتعمل فروض ربنا
و اهم حاجة يكون عندها قابلية انها تتغير , مادام التغيير للأحسن
في مبادئ لازم تكون موجودة في البنت
و في حاجات ممكن تتظبط بعد الارتباط و حط في دماغك بردو الراحة النفسية للقدامك
مش جميلة متدينة هووووب ياللا نتجوز
الاخلاق يا اخي الفاضل
و بعدين متدينه دي مش عشان لبسها و بتقرا قرآن و بتصلي و بتبقي عنيها في الارض و هي بتكلمك كدة خلاص بقيت متدينه
المهم فااااهمه الدين و بتطبقه, و دة انت مش هاتعرفه من برا كدة
انا شايف ان انت مستريح ل س و في حاجات بينكم مشتركة
و ما بتكلمش ولاد, جمييل
و شايف انها مناسباك, يعني الراحة النفسية موجودة
حكاية اللبس بتحتمل كذا مبرر, بس ما تخلكش تصرف نظر
خد خطوة و حاول تاخد بالك من الحاجات دي
و ربنا يكرمك ان شاء الله

انت سنك قريب من 21 سنة؟؟
كلام حضرتك هو تفكيرى بالمللى ودا اللى انا قلته بالظبط لصديقى الملتحى وحضرتك فاهمنى صح جدا جدااااا كمان
اصل صديقى دا بيدور على البنت الperfect ومتأكد انه فى الاخر مش هايلاقيها وانا فعلا مش عاوز واحدة اجى اضحكها بنكتة محترمة تقولى حرام روح قول كلام ربنا احسنلك ..
مابيعجبنيش الاسلوب دا مع انه بيعجب صاحبى دا جدا ونفسه يلاقى واحدة جهادية ههههههه
بالنسبالى مش عايز غير واحدة ضميرها صاحى اللى زى ماحضرتك قلت تكون قابلة للتغيير
وهابقى اقولكوا ناوى اعمل ايه فى الرد القادم

المشاركة الأصلية كتبت بواسطة hossam165

اظفر بذات الدين
اظفر بذات الدين
اظفر بذات الدين
اظفر بذات الدين

هو دا اساس الصراع الفكرى ...اى بنت فيها تكات بايظة بس المهم تكون بتتصلح

المشاركة الأصلية كتبت بواسطة zangry

انا برده كده مبحبش البس المحزق ده بس انا اقتنعت انه مش باللبس لأن لو كده هتلاقى 95% تقريبا مش محترمين

نفس اللى كنت مقتنع بيه واكتشفت ان فيه اهالى كانوا لما بناتهم تتحجب بيخلوها تقلع الحجاب !!!


وبجد نااستفدت جداااا من كلامكوا دا ونفسى اسمع منه اكتر واكتر وشكرا لردودكم الجميلة دى