موضوع محيرني - الشغل في القاهره ولا الأسكندريه

السلام عليكم

اخوكم من البحيره - كفرالدوار بس عايش في الأسكندريه وشغلي في الأسكندريه في فرع من الشركه لكن الشركه الأم في القاهره وانا بقالي دلوقتي 5 شهور شغال في فرع القاهره وقاعد في شقه وبصراحه مبسوط بس انا اخري شهرين وارجع الأسكندريه تاني ومش عارف اقولهم ينقلوني هنا لو عرفت اتفاوض معاهم مثلا يظبطو المرتب شويه عشان فرق المعيشه ولا اخليني في الأسكندريه احسن ؟

هنا انا شغال في المنطقه الحره وساكن في مدنية نصر عند الوفاء والامل يعني دقيقتين من الشغل لكن في الأسكندريه ساكن في سيدي بشر قبلي والشغل في سموحه

هنا الشركه كبيره والمشاريع كتيير وواخد وضعي كويس قوي وبتعمل جدا وبتعرف علي ناس جديده كل يوم لكن في الاسكندريه مفيش اي وضع ولا مشاريع كتيير خالص والشغل بتاعي بيبقي مع القاهره وكله علي التليفون ومفيش فرص زي القاهره

مش عارف بصراحه اكمل هنا حتي لو الشركه طلبت ولا ارجع الأسكندريه ؟

انا حاسس اني مهما عشت هنا مسيري ارجع الأسكندريه عشان ابقي جنب اهلي ومبقاش متغرب طول عمري
لسه الأسبوع ده ابن عمي ميت في حادثة والعربيه كانت مقلوبه بيه في ترعه ومشفتهوش ولا حضرت جنازته وطبعا مش ببقي عارف اي حاجه عن الدنيا هنا ده غير اني كل شويه اروح مكان ودلوقتي انا ابني داخل علي 4 سنين يعني محتاج اشوفله مدرسه عشان موضوع الحضانات الرسمي ده ومش عايز كل شويه اشحططه

بفكر اقعد في القاهره سنتين مثلا احوشلي قرشين ولما ارجع الأسكندريه اكون جبتلي شقت احسن من اللي في سيدي بشر عشان اتخنقت من المكان كله
وساعات بفكر اسيب مصر كلها واهاجر او اقعد كام سنه اعملي قرشين وارجع اعيش عيشه محترمه

ياريت تشورو عليا

مش غربه يعنى اسكندرية من القاهره ساعتين تلاته وتكون هناك

لو فى حد مراعى اهلك وكل حاجة تمام خليك فى القاهره بيتك جنب شغلك وواخد وضعك فى شغلك وعايش مرتاح

لو مفيش حد مراعى اهلك يبقى ترجع اسكندرية واهو اسمها حياتك القديمة ورجعتلها مش هتكون غريبه عليك بس المهم الاهل

مهما حصل حتلاقي نفسك توحشك اهلك ونفسك تقعد معاهم , معاك ان الفرص بتبقي احسن , بس الحياة مش شغل وبس , الحياة الاجتماعية والاسرة والاهل بيبقوا ليهم طعم تاني , متحسهمش الا لو انت متغرب فعلا وبعيد عن اهلك .

ماهو انا كده كده متغرب لاني ببقي عايش في الأسكندريه وبروح لاهلي كل اسبوع ولا اتنين عشان اشوفهم وفي القاهره بروح كل اسبوعين او تلاته ولو كترت قوي كل شهر بس ده عشان ببقي مطحون في الشغل والمشوار بيبقي رخم

انا الحمد لله والدي ووالدتي صغيرين في السن (50 سنه) والحمد لله مش محتاجين حاجه ولو في اي حاجه بروح اقعد هناك لاني ليا شقه هناك في البيت

المشكله الوحيده اللي لما حاجه تحصل في فجاه لو في الأسكندريه في خلال نص ساعه هبقي هناك لكن في القاهره ممكن اخد 5 ساعات عشان اروح

والله يا باشا انا لو مكانك هفضل فى القاهره واحاول على اد مقدر تليفونات لاهلى وزيارات اكتر

ومتقدرش البلاء قبل وقوعه لو حاجة حصلت لاقدر الله هتكون موجود
انت فى شغلك انت بتامن مستقبلك ومستقبل اولادك وحاول كل فتره تاخد اجازة اسبوع وتروح تعود معاهم

اقتباس:

---

المشاركة الأصلية كتبت بواسطة hazoom2006

والله يا باشا انا لو مكانك هفضل فى القاهره واحاول على اد مقدر تليفونات لاهلى وزيارات اكتر

ومتقدرش البلاء قبل وقوعه لو حاجة حصلت لاقدر الله هتكون موجود
انت فى شغلك انت بتامن مستقبلك ومستقبل اولادك وحاول كل فتره تاخد اجازة اسبوع وتروح تعود معاهم

---

الله يكرمك ياستاذ حازم والله الحمد لله بتصل كل يوم واول فرصه تيجي اشتغل مثلا اسبوع ولا حاجه من الأسكندريه بروح ومش بقعد في الأسكندريه وببقي قاعد معاهم في البلد مع اني بقيت بكره البلد مووت عشان مفيش مره اروحها الا واتخانق مع مراتي وعيالي يمرضو

أنا معرفش مجال الشغل في الإسكندرية أيه ، بس لو أنت قدرت تتعود على الحياه في القاهرة ، و شايف أن فيه فرصة لك أحسن انك تكبر في فرع القاهرة ، ليه لأ ..........
إنت كدة كدة متغرب عن أهلك ، استخير ربنا ، و ان شاء الله تمشي في إلي فيه مصلحتك
أهم حاجة الناس إلي حواليك في القاهرة يتقبلوا وجودك خاصه لو وجودك في المكان الجديد ممكن يترتب عليه انك تاخد مكان حد ،، و ممكن التعامل حالياً معك يكون بشكل علشان معروف انك في مهمه و راجع تاني . الله أعلم الوضع هيكون ازاي لما تتثبت في القاهرة

الجنيه في اسكندريه ب2 او 3 في القاهره
ودا راي شخصي
لو بتاخد 10 جنيه في اسكندريه حتعيش نفس العيشه لو بتاخد 30 في القاهره
بجانب البنزين والسكن والضغوط بتاعه الزحمه
شوف قرارك وحتقدر تحوش ولا لا
وشوف لو ضغطت نفسك في القاهره حتقدر توفر حاجه
وحاول تضغط نفسك ومصاريفك في اسكندريه
واعمل حسبتك وخد قرارك

اقتباس:

---

المشاركة الأصلية كتبت بواسطة phantom0xx0

أنا معرفش مجال الشغل في الإسكندرية أيه ، بس لو أنت قدرت تتعود على الحياه في القاهرة ، و شايف أن فيه فرصة لك أحسن انك تكبر في فرع القاهرة ، ليه لأ ..........
إنت كدة كدة متغرب عن أهلك ، استخير ربنا ، و ان شاء الله تمشي في إلي فيه مصلحتك
أهم حاجة الناس إلي حواليك في القاهرة يتقبلوا وجودك خاصه لو وجودك في المكان الجديد ممكن يترتب عليه انك تاخد مكان حد ،، و ممكن التعامل حالياً معك يكون بشكل علشان معروف انك في مهمه و راجع تاني . الله أعلم الوضع هيكون ازاي لما تتثبت في القاهرة

---

عايز اقولك ان الناس كانو فرحانين جدا لما عرفو اني هقعد في القاهره فتره طويله وبيتحايلو عليا عشان اقعد وده من الأسباب اللي مخلياني عايز اقعد لان الناس هنا حباني اكتر من الأسكندريه عشان هناك الدنيا صغيره قوي وفي نفسنه

اقتباس:

---

المشاركة الأصلية كتبت بواسطة shnory

الجنيه في اسكندريه ب2 او 3 في القاهره
ودا راي شخصي
لو بتاخد 10 جنيه في اسكندريه حتعيش نفس العيشه لو بتاخد 30 في القاهره
بجانب البنزين والسكن والضغوط بتاعه الزحمه
شوف قرارك وحتقدر تحوش ولا لا
وشوف لو ضغطت نفسك في القاهره حتقدر توفر حاجه
وحاول تضغط نفسك ومصاريفك في اسكندريه
واعمل حسبتك وخد قرارك

---

تصدق اني في القاهره بالرغم من اني بصرف كتيير ومش بحوش زي الأسكندريه بس حاسس ان الفلوس فيها بركه ونفسيا مرتاح

حاسس اني لما بعدت عن الفرع الفقر ده ربنا كرمني وحاسس ان ناس كتيير كانت منفسنه وفي نفس الوقت بعدي عن البلد بالشهر خلي الناس تفكها مني شويه

مش عايز اقولك ان في ناس بتقولها في وشي كده من الأسكندريه اني هنا باخد بدل سكن مع اني مش بحطه في جيبي يعني وبدفعه ايجار للشقه وباصين للكام ملطوش اللي باخدهم ذياده عشان فرق المصاريف

انا لسه محتار جدا واللي ذاد حيرتي اني اكتشتفت اني متاخر علي تقديم ابني للمدرسة والمفروض كنت اقدمله من شهرين ومعظم المدارس خلاص قفلت التقديم ومش عارف ازاي معرفتش حاجه زي دي بس انا عمري ماكنت اتخيل ان التقديم يبقي قبلها بسنه

انا دلوقتي في قمة الحيره وزي مااكون شايل هم الدنيا كله فوق دماغي

من ناحية: في القاهره واخد وضعي جدا جدا والناس كلها شايفه شغلي وبتعرف علي ناس كتيير بس متغرب ومعرفش حد وممكن كل فتره اسافر بره اسبوع او شهر ولأول كنت بودي مراتي عند اهلي لكن دلوقتي هيبقي في مدارس ومش هينفع اوديهم ولا هيفع حد يجي من الأسكندريه يقعد معاهم ولا هبقي مرتاح لوجوده في القاهره لوحدهم

لو في الأسكندريه اي حد من اهلي او من اهل مراتي هيروح في نص ساعه ليهم ويفضل معاهم لحد ماارجع وهشتغل برده بس هيبقي شغلي باين وكل حاجه بس بنسة 70% مثلا بالنسبة لبقية اعضاء الفريق اللي بشتغل فيه الا اذا كان المشروع كله في الأسكندريه وساعتها مش هتفرق هيبقي القاهره زي الأسكندريه بس علي الأقل هبقي جنب اهلي واي حاجه تحصل في نص ساعه هبقي عندهم

انا ابتديت غير رايي تاني وارجع الأسكندريه بس مش عارف بجد متوتر ومحتار جدا جدا جدا

دلوقتي انا محتاج اخد قرار في الأتي

1- هقعد في القاهره ولا الأسكندريه؟
2- هقدم لابني في انهي مدرسة وفين؟ وده يعتمد علي القرار الأول
3- مش عارف اجيب عربيه زيرو واضحي بملغ كبير ولا اجيب حاجه مستعمله كويسه امشي بيها سنه ولا اتنين واوفر الباقي علي تمن الشقه اجيبلي شقه احسن

القاهرة طبعا .. واسكندرية مش سفر ... ساعتين قطر و خلصت ... الشغل و مستوى معيشة الأولاد من كلامك فى القاهرة احسن ... خليك و اكبر هناك طالما مبسوط

باشا انت محسسنى انك مهاجر دا الموضوع كله ساعتين زمن
دا انت و رايح من سيدى بشر ل سموحه من ع البحر والدنيا زحمه شويه هتاخدلك اكتر من ساعه
نصيحه لوجه الله خليك ف القاهره ف شغلك كده انت عندك فرصه انك تترقى وتثبت نفسك لكن ف اسكندريه مجرد روتين
صلى صلاه استخاره وربنا هيكرمك

جوز اخت صديق ليا
شغله في القاهره وكل يوم بيسافر ويرجع اسكندريه
وحياته ماشيه عادي

يعني انتو شايفين القاهره احسن؟؟
المشكله لو الشركه قالتلي انقل من غيراي بدلات او ذيادة في المرتب
دي بقي هتبقي المشكله الكبيره لكن لو هيعوضوني اعتقد هيبقي اهون شويه

استخير

القاهرة القاهرة
بس ظبط حياتك عليها واستقر وخلى مراتك تتعرف على الجيران وتعمل صداقات فى اطار المعقول عشان متحسش بالوحدة ....وجرب يا سيدي سنة ولو ماستريحتش ابقى انقل بسيطة

على راي الناس انت مش مهاجر كنكا...........ههههه
بالتوفيق ان شاء الله

جزاكم الله كل خير

ان شاء الله يوم الأحد هتكلم مع المدير بتاعي واشوف النظام ايه

استخير أولا

طالما الشغل فى القاهرة أحسن و فيه سفر و خبرة أكتر يبقى خليك فى القاهرة و ربنا يهديك الى القرار السليم

مش موضوع احسن ولا خبره اكتر
الخبره تقريبا واحد لاني تقريبا معظم شغلي مع القاهره فالحاجه الوجيده اللي بتبقي ناقصاني اني ابقي قاعد مع الفريق كله بدل مابقي معاهم علي التليفون ولو شغال في مشروع في الأسكندريه هيبقي مفيش اي مشاكل خالص بس مشكلة الأسكندريه ان مشاريعها قليله وفين وفين علي مايجي مشروع جديد

وممكن اشتغل من الأسكندريه عادي وموضوع الفريق دي ابقي اجيب يوم كل اسبوع ولا اتنين بس يعني الفكره ان الشغل بيبقي باين قوي للتيم كله لكن المانجر كده كده شايف الشغل ووانا طول عمري شغال في الأسكندريه بس الفكره ان في القاهره واخد وضعي قوي لكن في الأسكندريه الناس كلها عادي وده ناشيء من فكرة ان الناس كلها معاك من وانت صغير وفي ناس اصغير منك فلما انت بتكبر وتترقي وتبقي مدير عليهم بيبقيو مش متقبلين الفكره قوي ويعاملوك علي انك لسه صغير لكن في القاهره كل مشروع فيه ناس مختلفه وميعرفوش انت كنت ايه لكن بيعاملوك علي الوضع اللي انت فيه

شوف مستقبل وبلدك هيكون احسن فين يعنى لو القاهره فيها فلوس اكتر تقدر تخلى عيلك مش محتجين حاجه و انا واخد وضعك فى الشغل
يبقى خبليك و اهلك مش هيزعلو منك
شوف تقدر تامن مستقبلك و مستقبل ولادك فين و روحححححححححححححححححححح

بالنسبة للمستقبل والفلوس فالأتنين واحد وخصوصا اني دلوقتي مش بسكتلهم ولو شفت اني استاهل فلوس اكتر بطلبها منهم

زي ماقلت الفارق الوحيد اني ابقي شغال مع التييم بتاعي والناس كلها تبقي شايفه الشغل يوم بيوم واعرف اناس كتيير

انا البارح صليت استخاره وسايبها علي الله بس ابتديت احس باريتاح ناحية الاسكندريه

انا عايز اوضح او أكد اني شغال في نفس الشركه بس فرع في الأسكندريه يعني مش في شركه تانيه اقل ولا حاجه