شكرا لمشاركتك الجميلة
ومعلش لو كان عندك تجربة سيئة في موضوع الإستيراد
وشكرا لنصيحتك بس انا كان نفسي اعمل حاجة نتعاون فيها كلنا ونساعد بعض بيها على العموم الموضوع مفتوح لاي مشاركة ايجابيه ممكن تساعد الاعضاء
عرض للطباعة
العفو يافندم، حضرتك برضه طرحت فكرة كويسة وممكن نعمل لها شوية تعديلات.... إزاي؟؟؟
كان أحد السادة الزملاء الفيليشياوية الأفاضل مسافر للمنصورة يخلص ورق موتور عربيته وعمل موضوع فيه أرقام تليفوناته عشان اللي عاوز يسأله عن اسعار قطع غيار، وفعلا كلمته وسألته وتفضل مشكورا بمعرفة اسعار الحاجات اللي كنت عاوزها، يعني إيه؟؟؟ يعني ممكن نتعاون ونعمل قاعدة بيانات عريضة ومطورة وكل واحد مننا يشارك فيها بتدوين طبيعة قطع الغيار اللي اشتراها ووصفها وسعرها ومن عند مين عشان نعرف التاجر الأمين من الغشاش، وقطع الغيار السليمة من المضروبة، ولما يلاقي تاجر من التجار كم الزباين (اللي هو إحنا) ويعرف إن الكل عارف بعضه يدينا أسعار أفضل وقطع غيار سليمة. وبالتالي ممكن يكون الموضوع متجدد وعليه مشاركات من الجميع ويكون مرجع للكل. والله المستعان
http://www.nilemotors.net/Nile/276011-a.html
اقروا الموضوع ده كده وشوفوا الناس بتعمل ايه في الاقسام التانية يمكن تحسوا بالغيرة شوية وتتحركوا عذرا بس بصراحة احنا نايمين
يا فندم الكلام جميل، التنفيذ مش سهل، الموضوع مش تشاؤم بس واقعية مش أكتر وتعالى نحسبها بالورقة والقلم.
الحكاية مش بالسهولة دي، والله الموضوع ده عملته بنفسي قبل كده مع واحد صاحبي، كانت مغامرة بكل المعاني ومش سهلة وعاوز تفرغ تام وخبرة تامة ودراية مهولة بما يحدث خلف الكواليس في ساحات تقطيع السيارات في الخارج وما يحدث في الشحن وما يحدث في أسوأ بقاع الأرض ألا وهي ساحات الموانئ المصرية وإنالله وإنا إليه راجعون. بجد المخاطرة دي مش هتكون كويسة بالمرة، ولله أنصح السادة الزملاء بعدم الخوض في غمارها، وخليك زي الملك واشتري من التجار هنا اللي انت عاوزه وبمزاجك. اللي ممكن نعمله هو قاعدة بيانات متجددة وشاملة للتجار المحترمين والموثوق فيهم واسعارهم وبالتالي ممكن يتشجعوا ويعرفوا المطلوب مننا ويجيبولنا الحاجة المطلوبة وفي نفس الوقت يبقوا عارفين إن لو واحد عمل حركة نص كم مع فيليشياوي أمره هينكشف اما 1000 فيليشياوي وبضاعته هتبور عشان محدش هيعبره فالكل هيكون حريص على ارضاء الزباين والمنافسة بين التجار هتزيد والأسعار في صالح فرسان الفيليشيا، والحكاية دي أقرب للواقع وساعات بعملها مع تاجر أو ميكانيكي وفعلا بتنجح لما اشتري منه حاجة وأعرفه إني هبلغ الشباب على المنتدى بالأسعار فعلا إما يديني سعر نهائي وإما يديني حاجة كويسة وفعلا كذا زميل بيروح له ويشتري منه ولما أرجع له مرة تانية بفكره وفعلا ألاقي معاملة تمام وبيكون عارف إني هجيب له زباين وإننا هنفعه. أرجو أكون أوضحت وجهة نظري وسامحوني للإطالة
بعد اذن كل المشاركين الكلام كويس واحلى حاجه انا نبقى ايد وحده وفى الحاله دي كل حاجه هتبقى سهله
...رأيي الشخصى
كل واحد عايز حاجه يقولها وفى الحاله دى سواء الحاجات متكرره او لأ هنقدر نشترى الحاجات بسعر كويس جداً واي تاجر هتروحله هيعملك خصم عشان هتشترى كمية
وده عن تجربه
انما النص ما انصحش بيه لأنه هيفضل منه حاجات اكتر من الي هنستخدمها سواء صاج او هوالك
بالتوفيق