الموضوع: موقف اتعرضت ليه وعايز اخد رأيكم

المشاركة الأصلية كتبت بواسطة mero100

مع كامل احترامي و تقديري للعضو صاحب الموضوع و لجميع الاعضاء الافاضل ....

اسمحلي اقولك رأايي بحياديه تامه و احكييلك تجربتي .....

اولا : ( لعن الله قوما ضاع الحق بينهم ) ......الحقوق لو ضاعت بين الناس ....يبقي بقت غابه مش حياه بين البشر .....

ثانيا : الناس عاملين قواعد للاستخدام و فايدتها الاتي :
أ) بيصعبوا علي الحرامي انه يدخل و يسرق عربيه . ( نقطه مهمه جدا )

مال قواعد فقد ورقة الدخول (اللى مش مرتبطة بالسيارة تماااااما) بتصعيب مهمة الحرامى؟؟

ب) الكارت له قيمه لانه بيعاد استخدامه .

المولات دلوقتى بقت ماكينة تطبع ورقة فيها وقت الدخول فقط وفى الاخر بتترمى يعنى ملوش اى قيمة مادية.

ج) بياخدوا أعلي أجر لوقت الانتظار في حاله زي حاله حضرتك لانهم ميعرفوش انت وقفت أد ايه . ( معرفش حته كاميرات المراقبه و كيفيه مراجعتها و كم سيتطلب ذلك من جهد ووقت مع العلم انهم غير ملزمين بده حتتي لو كان فيه امكانيه لانهم معلنين غرامه فقد الكارت ) يبقي منصبوش عليك و ده حقهم .

اعلى وقت على اغلى محاسبة بافتراض انهم فاتحين ١٦ ساعة ( اول ساعة ب٥ جنيه وكل ساعة تالية ب٤ جنيه يعنى ٦٥ جنيه)
ده بافتراض اعلى محاسبة وطبعا ١٦ ساعة يعنى دخلنا فى المحاسبة الاقل

الكاميرات انا اتكلمت مع كل الامن اللى هناك، لو اتعرضت لسرقة وطالبت بالرجوع لتسجيلات كاميرات المراقبة ها توافقوا قالوا اه طبعا على طول بدون الرجوع لاى مسئول بيتم الرجوع فورا للتسجيلات، طب انا عايز ارجع للتسجيلات دى، لا مينفعش عشان دى مش سرقة، هو التسجيلات دى للسرقة فقط!!!!!!

وانا قولت ليهم وقت دخولى امتى ومكان انتظارى فين وكمان الجراج كله مكنش فيه بتاع ٥٠ عربية مع انه يتسع لحوالى الف سيارة.

محدش اعلن عن غرامة فقد ورقة الانتظار بره المكان قبل الدخول، لا جوه المكان يعنى مش عليك غير الاذعان، وكمان هما اعلنوا اسعار الانتظار ليه مش يكتبوا كل شروطهم من الاول (زى مثلا مطار القاهرة)؟؟؟


د) الاهم من كل ده ان الناس معلنين شروطهم و انت موافق ..و لازم نتعلم كلنا احترام القواعد و القوانين طالما معلنه مسبقا و محدش نصب علينا ( تقدر تقوللي مبتعملش ليه كده لما بتتتأخر في سداد فاتوره التليفون و بيدفعوك غرامه 10 جنيه ؟ ) .. كونهم جاملوك ده مش معناه ان موقفك صح .

يا باشا قولت مش اعلنوا وانا محدش جاملنى. انا طالبت بدفع مقابل الخدمة اللى هما قدموها ليا واللى حاطين فيها مقابل الخدمة ومكسبهم

التليفون من الاول فيه عقد بينى وبينهم وانا قابل بالعقد، مش بعد ما اتعاقد يقولو خد بالك فيه غرامة.

يا راجل دى الحكومة بتكتب على الطرق احذر المخالفة السرعة مراقبة بالرادار، طب ما الناس كلها عارفة بالفعل ليه لازمة الاعلان اللى قبل الرادار مش بعديه!!!

تجربتي : كنت راكن في جراج البستان ساعتين ب 8 جنيه .....نزلت احاسب ضاع مني الكوين ( هناك شغالين بكوين و مكتوب ان غرامه فقد الكوين 75 جنيه علي ما اتذكر ) .....دورت بسرعه و مش لاقي الكوين ....المسئول هناك بكل أدب و احترام فتحلي الحاره التانيه و خلاني انتظر عشان ميعطلش الناس اللي نازله .....و قاللي بابتسامه ريحتني .....دور علي مهل حضرتك و قعد يساعدني و نفض العربيه بنفسه .....حوالي ربع ساعه مرت ....انا يأست .....مكنش ف جيبي غير حوالي 80 جنيه .........
ابتسم المسئول و قاللي معلش يا باشا .....قولتله متقولش معلش انا اللي غلطان ..... و انا بطلع من جيبي الفلوس .....لاقيت صوت جاي من بعيد بينده و بيجري يا استاااااااذ يا استاااااااااذ ...........
تفتكر طلع مين ؟
طلع الامن اللي بيبقي و اقف في الادوار بتاعت الجراج ....لاني وانا طالع من مكاني صعب عليا لان دراعه كان مجبس و مديت اايدي في جيبي و اديته كل الدنانير اللي كانت ف جيبي و من ضمنها الكوين بدون ماا ااخد بالي .... ما هو مدور و كان وسط الدنانير ....معلش انا مسميها دنانير :-))))
و الحمد لله ربنا نجاني من دفع الغرامه لان فعلا كان اخر حاجه باقيه من المرتب ال 80 جنيه .

طول ما بتحترم القواعد و بتطبقها علي نفسك قبل غيرك ....ربنا حيقف جنبك .....و حتتصلح احوال بلدنا .....و ربنا حيكرمنا و نكون احسن ناس و بلدنا حتبقي اعظم بلد ....لازم نبدأ بنفسنا مش بغيرنا ...........
اسف للاطاله ....بس الموضوع مهم جدا مش مجرد واحد اتعفي من غرامه و خلاص .

الحمدلله يا باشا انك لاقيت الكوين وحضرتك سبقت بالخير وربنا رده ليك

والحمدلله بردو محدش من العاملين كان معترض معايا وكانوا بيقولوا ده حقك فعلا.

والحمدلله الواحد بيحترم القواعد والقوانين فى حياته اليومية.