السلام عليكم ورحمة الله

كنت راجع من السفر وعديت على الداون تاون فى التجمع الخامس.

وصلت الساعة 5 وربع ركنت العربية وطلعت صليت وقعدت فى company cafee وجيت امشى الساعة 8 ونص لقيت ان كارت البارك وقع منى وضاع.

اللى راح هناك عارف انهم عاملين غرامة 75 جنيه للى يضيع الكارت.

انا الصراحة قفلت معايا مدفعش وقولت يالا لما اشوف ها يحصل ايه

دخلت على بتاع البارك بقوله الكارت ضاع منى قالى 75 جنيه قولتله ليييه؟؟؟ قالى غرامة لفقد الكارت قولتله:

اولا دى اسمها قواعد منظمة لسير العمل داخل المكان ليا انى اقبلها او لأ
ثانيا: الكارت ده وسيلة انكم تعرفوا انا دخلت امتى
ثالثا: نقدر نرجع لكاميرات المراقبة ونعرف انا دخلت امتى
رابعا: العلاقة اللى بينا هى علاقة خدمة مقابل أجر، الخدمة هى البارك والأجر انتوا تاخدوه حتى لو مائة جنيه لكن تكونوا تستحقوه فعلا
خامسا: مفيش فى القانون اللى يخليكوا تفرضوا عليا او على غيرى غرامة.


الsupervisor تعنت وقالى مليش فيه ولازم تدفع ال75 جنيه، صعدت الموضوع للى أكبر منه واللى اكبر منهم لحد مدير ادارة المول ومدير امن المول وفى الاخر مشيت كلامى ودفعت تمن البارك فقط.

والدى كان معايا وكان زعلان منى وكان عايز يدفع الفلوس تجنبا للوقفة (رغم انهم الحق يقال جابوله كرسى يقعد عليه) خصوصا اننا جايين من سفر.

صاحبى كان معايا بس فى النص كان عايز يريح دماغه ويدفع.

يا ترى انا غلطان وتعنت معاهم ولا انا على حق فى اللى عملته؟؟؟