مشكله فى فتيس الكروز 2010

**samarko_sdf_20** · 05-03-2012 07:54 PM

السلام عليكم ورحمه الله وبركاته

أنا عندي مشكله غريبه فى الكروز ومش عارف المكشله من الفتيس نفسو ولا من قواعد الفتيس ..المشكله اني لما بدي كيك داون للعربيه وبعدين ادوس فرامل واقرص بنزين تاني بيحصل رجه للعربيه جامده من قدام وخصوصا مابين الغيار الاول والتاني وروحت ياسين منصور قالى العربيه تمام ومافيهاش مشاكل ومفيش اي اعطال على الكنترول مع اني ملاحظ اني لما بتنقل مابين ال r و ال d او ال n الموتور بيتحرك جامد بميل "انا عارف ان الموتور لازم يتحرك بس انا بيتحرك عندي بدرجه مش طبيعيه" ولما سألتهم على قواعد الموتور او الفتيس قالولى سلام ومافيهمش اي مشكله وكل العربيات الكروز فيها الرجه دي وكلمت ميكانيكي فى التليفون قالى دي مشكله فالف بادي وانا مش عارف اصدق مين وفى مياكنيكي روحتلو قالى دي عايزه قاعده فتيس جمل اللى هيا مكانها تحت البطاريه والكنترول ناحيه السواق على الشمال ومش عارف اعمل ايه بقي والموضوع ده معكنني ومضايقني ولحد دلوقتي صارف 300 جنيه كشف بس فياريت لو حد معاه كروز او يعرف المشكله دي سببها ايه يقولى واريح دماغي علشان بجد زهقت

**akmm** · 14-03-2012 01:15 PM

اعرض المشكله مره اخرى فى قسم شيفروليه واكيد حتلاقى إجابه من الإخوه فى المنتدى .

**samarko_sdf_20** · 14-03-2012 08:37 PM

ولا فى حد رد عليا باي كلمه مفيده ياباشا لا هنا ولا هناك والف شكر على اهتمامك

**blazer** · 14-03-2012 09:39 PM

هل بيبقى فيه صوت هبده فى الفتيس فى التعشيق
او صوت دبدبه وانت جايب ال d ودايس فرامل ؟

**samarko_sdf_20** · 15-03-2012 04:09 PM

المشاركة الأصلية كتبت بواسطة blazer

هل بيبقى فيه صوت هبده فى الفتيس فى التعشيق
او صوت دبدبه وانت جايب ال d ودايس فرامل ؟

لا خالص مفيش الاصوات دي هو احساس ان العربيه بتتنطر لقدام جامد مع دوسه البنزين ومش احساس ان الموتور بيشد العربيه لقدام

**samarko_sdf_20** · 15-03-2012 04:10 PM

عارف نفس الاحساس بالظبط لما يكون معاك عربيه مانويال وجبت الاول وانت دايس دبرياج وبعدين دوست بنزين وسبت الدبرياج مره واحده شوفت النطره دي اللى بتحصل هيا نفسها اللى بتحصل معايا فى الطلعه لو انا دايس بنزين مره واحده

**samarko_sdf_20** · 17-03-2012 01:35 PM

ايه يا جماعه محدش عايز يرد ليه :(

**ahmed_h_g** · 18-03-2012 01:58 AM

محدش هيقدر يفيدك الا ميكانيكي شاطر يجرب العربيه معاك ويعرف العيب من غير ما يجرب فيك وتفضل تدفع أو مالك أخر كان عنده نفس العيب وعرف المشكله وحلها

**Ahmed Saad** · 04-04-2012 06:46 AM

خليهم يعملوا شيك علي محول العزم لان فيه زي حديده كده مربوطه علي ترس الفلام لو مساميرها مفكوكه تعمل اللي حضرتك بتقول عليه علشان ده حصل عندي بالضبط وربط المسامير كل ده راح