المشاركة الأصلية كتبت بواسطة khaled_saga
انت ليك وحشة اكتر والله يا احمد انا بس بقالى فترة مشغول اوى غير ان كان عندى ظروف والدى كان بيعمل عملية والحمد لله على كل شىء.
والله يا احمد انا مش مرتاح خالص للغيارات حاسسها تقيلة وكل مرة بشتكى فى الصيانات يا اما يقولوا كويسة مفيهاش حاجة يا اما يعملوها وترجع بعد كام يوم تقيلة تانى ده غير ان دواسة الدبرياج خشنة وبتزيق شوية مش مريحانى .. انا ركبت عربيات جديدة موديل 2011 والدبرياج فيها والنقلات ناعمة جدا زى الرينو سانديرو والاكسنت وغيرها
عامة انا فى اخر صيانة حجزولى ماستر دبرياج (اللى هو تحت الدواسة علاطول) عشان بيرشح زيت خفيف هو مش مشكلة كبيرة بس الراجل اللى اعرفه فى التوكيل من عندنا قاللى هحجزهولك وخلاص يتغير عالضمان واول ما يتوفر تيجى نغيره .. مش فاهم هل المشكلة سببها الماستر ده ولا ايه بالظبط؟؟
فأنا لما انت قولت الغيارات نعمت لما الصباع كان مرفوع قولت يمكن ده يحل مشكلتى ولو انى اعرف ان الصباع لو مرفوع العربية بتقطع وهى ماشية والحل انك تشد الصباع للاخر .. انا حاولت امبارح ارجعه وارا شوية لقيته مش بيثبت هو عامل زى السوستة تدوس عليه يرجع تانى لكن لما تشده ناحية الدواسة يتشد بس تشد جامد شوية (زى ما المفروض انك انت عملت).
ايه رأيك فى الكلام ده؟