سؤال للخبراء ... إزاي ممكن نعرف أن السيارة قيمتها فيها ولا لأ

**karemof** · 07-03-2012 12:15 AM

السلام عليكم،
موضوع بقاله فترة بفكر فيه وخصوصا أنا عايز أشتري عربية زيرو
طبعا كلنا بنسمع أن الكوري والياباني قيمته فيه لكن الأوروبي قيمته السوقية بتخسر جامد، مع فارق الكفاءة اللي بتكون في صالح الأوروبي اللي بيكون سعره أغلى
طبعا هي معادلة صعبة بالذات لو حتشتري بالقسط لأنك حتلاقي المبلغ اللي حتدفعه كل شهر مش حيفرق كتير وبالذات لما تاخد قيمة حقيقية مقابل الفلوس كما في الأوروبي
اللي عايز أوصله هو أزاي الواحد ممكن يحكم على ماركة معينة أذا كانت بتحتفظ بقيمتها السوقية بدرجة أكبر من ماركة تانيه، يعني مثلا الكيا بتحتفظ بقيمتها بصورة أكبر من الرينو
ماشي الكلام دا بيرجع بصوره كبيرة لثقافة المشتري المصري وبالتالي بينعكس على العرض والطلب، أكيد دا كلام مقبول
لكن السؤال الأساسي هو العربيه لو قل سعرها كل سنه كام في الميه يكون النقص ده معقول جدا ولا متوسط ولا كبير قوي ؟
مثال رقمي لو العربيه أشترتها السنه دي ب 100000
- في الماركة أ حتقل حتقل بنسبه 5 % بعد السنه الأولى وبعدين 3 % بعد التانيه وهكذا
- لكن في المركة ب حتقل بنسبة 9 % بعد السنه الأولى وبعدين 6 % بعد التانيه وهكذا
هل الواحد ممكن يوصل لنسبه معينة عامه تكون مرجع لأي حد على أساسها أقول أن العربيه لو قلت بعد السنة الأولى 3 % مثلا يكون ده مقبول جدا لكن لو قلت 6 % يكون ده متوسط لكن لو قلت 10 % يكون ده كتير قوي
متأسف على الأطالة لكن بحاول أوصل وجهة نظري لتعم الفائده

**حماده المصري** · 07-03-2012 02:37 AM

ده مش مقياس حضرتك

يعني معظم العربيات الي فوق في رنج 160 الف جنيه او الي فوق 100 عموما بتقل من 10 ل 20 الف جنيه في السنه وممكن اكتر

انما العربيات الي ب 100 و اقل بتقل ممكن 5 الف جنيه في السنه

ولو عربيه مبتمشيش كتير بتحافظ على السعر

بعدين لما نقول عربيه قيمتها فيها نتكلم على يوزد انما زيرو مستحيل لان اقل وقعه فيها 10 الف جنيه وقتي لو رخصت كده ولسه ممشيتش ما عدا التيوتا زمان انما دلوقتي الموديل الجديد برضو بيقع في السعر

**AhMeD MeTwAlY** · 07-03-2012 02:53 AM

مدام حضرتك بتدور علي انخفاض السعر في اعادة البيع
اشتري مستعمل استعمال نضيف او عربيه محروقه

**Zika9909** · 07-03-2012 03:27 AM

المشاركة الأصلية كتبت بواسطة xmanx51

مدام حضرتك بتدور علي انخفاض السعر في اعادة البيع
اشتري مستعمل استعمال نضيف او عربيه محروقه

معلش أنا مش فاهم قصدك بـ "عربية محروقة"
قصدك ولعت قبل كده و لا إيه؟؟

**SYD** · 07-03-2012 03:41 AM

ههههههههه

لا طبعا

عربية محروقة يعني حد اشتراها وبيبيعها بأقل من سعر سوقها ودي بتبقي في الزيرو وغالبا بيبقي واحد شاري قسط وبيبيع حرق عشان يسيل الفلوس تاني

بالنسبة لصاحب الموضوع

احنا في مصر ماعندناش الثقافة دي او الأسلوب دة في تقييم العربيات المستعملة

معروف ان في عربيات سوقي وعربيات تقيلة في البيع
السوقي طبعا معروف لينا كلنا زي الهيونداي والدايو واللانسر

وفي عربيات تانية تقيلة و بتخسر لما تبيع زي الفولكس والأوبل والرينو

وفقه ان العربية تقل بعد السنة الأولي مقدار كذا وبعد السنة التانية مقدار كذا وبعد التالتة ...... الخ
مش موجود لعدة اسباب

1- لو العربية هتقل بعد السنة الأولي 10% وبعد التانية 8% وهكذا هتلاقي العربية بعد حوالي 15 سنة بتتوهب ومش بتتباع لأن مش هيبقي ليها سعر ودة طبعا مش موجود لأن عندنا عربيات لسة بتحرت في الشوارع موديل 95 و 91 وكدة وليها سعر فبالتالي مش ينفع تقل قيمتها بنسب كل سنة وبيحددها سعر السوق والعرض والطلب والحالة

2- معدل التغيير عندنا منخفض جدا عكس دوول الخليج الي دة منطقهم في البيع
يعني نسبة سيارات موديل السنة السابقة لا يقارن بسنتين سابقتين لا يقارن ب3 سنين فاتو لا يقارن ب5 ب 6 ب7 وهكذا
فبالتالي بتلاقي بردو التسعير بناء علي التجار والسوق والعرض والطلب والحالة واخيرا سمعة العربية
يعني طالع سمعة علي الأوبل مثلا ، مخلي سعرها في الأرض
طالع سمعة علي الدايو مثلا - مخلي سعرها في السما
طالع سمعة علي اللانسر - مخليهاها بتتباع زيرو لحد 2011 واساسا الشركة قربت تنزل الشيب الي بعد الشارك يعني البومة لسة بتتباع ونزل عليها شيب بعدها وهينزل الشيب التاني وهي لسة بتتباع ودة ليه ؟؟؟؟؟؟؟؟ عشان التجار سوقوا ليها صح وبشكل مبالغ فيه

موضوع السمعة دة عايز موضوع لوحدوا طبعا ولكن اعتقد فكرتي وصلت لحضرتك
احنا بنشتري علي السماعي والكلام السوقي بتاع التجار الذين لا يتعدوا كومسيونجية للعربيات

شكرا جدا لصاحب الموضوع علي موضوعه المميز

والله المستعان
،
،

**SYD** · 07-03-2012 03:47 AM

المشاركة الأصلية كتبت بواسطة حماده المصري

انما زيرو مستحيل لان اقل وقعه فيها 10 الف جنيه وقتي لو رخصت كده ولسه ممشيتش ما عدا التيوتا زمان انما دلوقتي الموديل الجديد برضو بيقع في السعر

اهو دة اكبر دليل علي كلامي

مين الي حط التسعيرة دي ؟؟؟؟

مجرد ما تعلق نمر تقل من ثمنها 10,000 حتي لو مامشيتش
كانوا زمان 5 بس دلوقتي بقوا 10

مين حط المبلغ الأول ؟؟؟ ومين حط المبلغ التاني ؟؟؟؟

طبعا تجار السوق

طب ليه ؟؟؟؟؟؟؟

ماتعرفش

مع ان الأصول تزيد بقيمة سنين الرخصة لأنه وفر عليك وقوف في طوابير وتراخيص وبصمة وقرف وتعليق نمر واكراميات وبهدلة ومضيعة وقت

لكن تقول لمين ؟؟؟؟؟؟

ماعندناش قانون يحكم البيع والشراء للمستعمل واعتقد كمان للجديد
يعني الوكيل له السلطة المطلقة في تحديد سعر العربية وله الحق منفردا في رفع سعر الموديل من سنة لأخري حتي لو لم يتم تغيير علي العربية

تقبل مروري

والله المستعان
،
،

**speranz** · 07-03-2012 04:13 PM

اظن الحل ان الناس تبطل تجيب اى عربية وتبيعها بعد فترة
يعنى لو كل واحد فكر ان العربية دى الى هتعيش معاه 10 سنين مش هيفرق معاه سعر اعادة البيع
وساعتها هنخش على الاوروبى بقلب جامد وهننسا العربيات الاسيوية للابد
لكن الى حاصل دلوقتى ان الواحد بيسيب العربية الاوروبية المحترمة
ويجرى على العربية الاسيوية الى قيمتها اقل بكتير من سعرها
لمجرد انه بعد سنة او اتنين هيجرى يبيعها بفرق بسيط

**karemof** · 08-03-2012 03:23 PM

طيب يا جماعة تسهيلا للموضوع بعد أذنكم نتكلم على عربيات محدده, و الناس اللي عندها فكرة تقول سعرها بيقل كام % تقريبا في خلال السنة الأولى وبعدين التانية, و ممكن مع زياده المشاركات نطلع باستنتاج أن الماركة "أ" أكتر واحده بتحافظ على قيمتها تليها "ب" تليها "ج" و هكذا ..........., وكمان الاستنتاج الأهم تقييم النقص في السعر هل هو مقبول أم متوسط أم كتير جدا, و ممكن نفترض رقم ثابت ليهم كلهم لاستهلاك الكيلومترات

ممكن ناخد كيا سيراتو/أو كارينز -- رينو فلوانس -- سكودا فانتازيا -- فولكس جيتا -- بي أم 316 مثلا

يا ريت اللي عنده معلومة يتفضل يقولها بحياديه, وطبعا تكون معلومة عن موديلات عدا عليها في السوق سنتين أو أكتر

-

-

الموضوع: سؤال للخبراء ... إزاي ممكن نعرف أن السيارة قيمتها فيها ولا لأ

LinkBack

أدوات الموضوع

عرض

سؤال للخبراء ... إزاي ممكن نعرف أن السيارة قيمتها فيها ولا لأ - انشر الموضوع فى :

-

-

-

-

المواضيع المتشابهه

ممكن سؤال عن سعر الماروتى 1999 و فيها عيب

سؤال للخبراء: هل العجله الثابته ممكن تخسس

للخبراء: ايبيزا 93 وايه اللى ممكن اعمله فيها

سؤال: صيانه الالف الاولي في السيارة يارس ماذا يتم فيها

ممكن سؤال للخبراء لو سمحتم؟

الكلمات الدلالية لهذا الموضوع

المفضلات

المفضلات

ضوابط المشاركة