فكرت تتخلى عن الجنسيه المصريه و تاخد جنسيه أجنبيه أيا كانت ؟

**ahmed_badawy14** · 07-03-2012 12:05 PM

نفسي ابقي كندي او استرالي او بريطاني ......

**shaddadfalcon1** · 07-03-2012 12:11 PM

لا عايز ولا يشرفني اني اخد جنسيه تانيه غير مصري

**gebreel** · 07-03-2012 12:23 PM

معنديش مشكلة اخد جنسية ثانية بس احتفظ بالمصرية لأني بحب البلد بنت التييت دي ليه مش عارف و الله بالرغم من القرف اللي شايفينو

**Amr_tika88** · 07-03-2012 01:45 PM

انا فكرت اروح المانيا او سويسرا وانا بحاول ادرس لغتهم لانها لو معاك هتفرق كتير جدا انهم يقبلوا فكره انك تهاجر هناك . ولو اتعرض عليا اتنازل عن الجنسيه المصريه هتنازل لسبب بسيط اني مشفتش في البلد دي شي كويس ابدا كله غلط في غلط. واكيد مش هتجوز واجيب اطفال عشان يبقوا تعساء الحظ وانا كمان مش هقضي عمري في بلد لا تحترم اهلها والذل عنوانها وبعد الثوره بقي اكتر وعيني عينك

**kameluo** · 07-03-2012 01:54 PM

المشاركة الأصلية كتبت بواسطة beshomilan

اتمنى احصل على جنسيه دوله اخرى مثا انجلترا او المانيا او روسيا او امريكا او كندا او سويسرا
دول ليها تقل وصوت ويوم ماحد يقولك بخ فوشك الدنيا تقوم متقعدش عشانك
كفايانا القرف اللى احنا فيه ده والجهل اللى مالى العقول..كفايه ان نسبه الاميه عندنا 55 % بينما فى دوله زى السويد فى اوروبا نسبه الاميه 0% !!ده يبقى ايه
ده امريكا منامتش لحد ماولادها اللى برا ارضها وممسوكين عندنا خرجوا ورجعولها تانى والدنيا كلها كانت مقلوبه عشانهم ودفعوا رشاوى الدنيا والاخره عشان يرجعولهم واحنا بنموت ونتهان فبلدنا عشان ملناش قيمة..دا يتسمى ايه!!!
اسرائيل نفسها لحد دلوقتى بتاخد اسير اسرائيلى محبوس فمصر فمقابل 150 واحد مصرى مسجون عندهم!!
ده يتسمى ايه؟؟
فيلم عسل اسود هو الواقع المصرى للاسف
انا خالى كان فى هولندا وعندهم ساحة بينزل فيها الحمام والناس بتتمشى فوسطيهم وقاللى فمره كانوا مقفلين منطقه فى وسط الساحة بالاقماع والاسعاف والشرطة موجودين وقرب وعرف ليه..تخيلى ليه؟؟
لقى ان فيه حمامه مجروحة وبتنزف عشان ولد كان بيجرى وغصب عنه داس عليها فهما بيعالجوها فورا!!!ده يتسمى ايه!!
لما تلاقى جريمة قتل مكتوبه فى الجورنال ومكتوب ان القاتل طعن المجنى عليه 90 طعنه فى الجسم..ده يتسمى ايه!!
لما تلاقى واحد اتمسك وقالك انه هارب من 30 قضيه سلاح نارى وقتل واغتصاب وسرقة ومخدرات ومجموع الاحكام 25 سنه بس..ده يتسمى ايه!!!
ربنا يستر علينا ويحافظ على كل الناس من الشر
معلش ياجماعة دى وجهة نظر شخصيه وعارف ان كتير معارضينى بس انا بتكلم بصراحة ومحدش يزعل منى

للاسف كلامك صح
حاجة تحرق الدم

**ahmedsamir5edr** · 07-03-2012 02:17 PM

و بدأت فعلا يا افندم في اجراءات السفر .. و لا يوجد اي مانع من التنازل عن الجنسيه ...

**kameluo** · 07-03-2012 02:19 PM

المشاركة الأصلية كتبت بواسطة amdd

بس نفسى الاقى لنفسى جواب على سؤال منغص عليا عيشتى .
هو لو حصل حرب لا قدر الله تعالى...هنزل وأدافع عن البلد اللى اتربيت فيها ولا هدافع عن بيتى بس وأهلى بس ..لو مادفعتش عن بلدى عارف انى هبقى خاين بس عقلى الباطن رافض الدفاع عنها...لانى مش لاقى دلوقتى حد فى البلد بيدافع عنها .
هو لازم نتنكس ويبقى فى عدو من بره علشان نبان على حقيقتنا ويبان معدنا وخوفنا على بعض
شوفو كده الناس عملت ايه فى اللجان الشعبية لمجرد الاحساس بالخطر ..انا متأكد ان لو قامت حرب لاقدر الله هنعرف قيمة الاحترام لبعضنا

للاسف حب البلد و الأنتماء أليها مابيبقاش في الأنسان اول مايتولد
لأ دي بيجي من موقف البلد السياسي و الدولي و حبها لمواطنيها
يعني المواطن الأمريكي دلوقتي فخور ببلده و زمانه بيقول شفتوا امريكا عملت ايه عشان ولدها ,
شفت لبسنا المصريين الطورح و جبنا عيلنا المحبوسين هناك ازاي ,شفت لما جندي اتخطف في العراق طلعنا جيش عشان نجيبوا ازاي , شوفت لما مركب امريكية اتخطفت في الصومال طلعنا اسطول بحري عشان نجبها و نجيب الطقم الفيها ازاي , شفت كل بلأد العالم بتخاف من امريكا و بتعمل الف حساب الأي مواطن امريكي عندها ازاي
ساعتها المواطن الأمريكي مش حيحب يسيب بلده ابدا و حيفديها بروحه لو حصلها حاجة

لكن تعلي للمواطن المصري
واحد بيتجلد في السعدية 1000 جلدة و مصر مكبره دمغها
واحد اتقتل في المانيا و مصر مكبره دمغها
مجند مصري اسرائيل ضريته علي الحدود و اسرائيل تاني يوم تقول لمصر Sorry
مركب صيد اتمسكت في ليبيا و مصر مكبره دمغها
مركب شحن تتخطف في الصومال و مصر مكبره دمغها

عاوز المواطن المصري يبقي عنده انتماء لمصر ازاي!!!!!!
حيفديها بروحه لو حصل حرب ازاي و هو طالع أيمانه فالعيشة هنا في مصر و مالوش اعتبار و كرامة برة مصر

انا عن نفسي اتمني اطلع منها و يكش تولع بجاز لو حصلها حاجة

**المنسي** · 07-03-2012 02:41 PM

فكرة التنازل عن الجنسية المصرية بالنسبالى مستحيل لكن لو هاخد جنسية تانية معاها انا موافق ومستعد اهاجر بس بشرط ان اخد مراتى وابنى معايا خلاص الواحد مبقاش عايز حاجة من البلد بعد اللى وصلت ليه