الموضوع: استشارة من خبراء الاسبرسو والامريكان كوفي :)

المشاركة الأصلية كتبت بواسطة nonia

بصراحة الامريكان مع الفلتر الثابت مريحة
بس لو بتحتاج تركز وتعد صاحي فترات طويلة يبقى الاسبريسو

انا كده خلاص تقريبا نويت على اسبرسو ماشين في حالة ان الفلوس كملت :)

المشاركة الأصلية كتبت بواسطة paradox

سلام عليكم....أعتقد الاخوة الأعضاء قالوا أغلب النصائح بس اسمحلي اضيف نصيحة شخصية لأن موضوع القهوة ده مزاج عندي وجربت ماكينات مختلفة. طالما نويت تشتري مكنة يبقا انت هاتقارن اللي هاتعمله المكنة دي باللي بتشربوا في كافيهات زي كوستا أو ستار باكس أو غيرهم. يبقا تجيب مكنة كويسة علشان ماتركنهاش كمان شهرين تلاته زي ما حد في مشاركة قبلي حصل معاه ويبقا كده بترمي فلوس في الأرض.
أنصحك تشتري ماكينة اسبرسو تكون فيها مضخةضغطها مش أقل من 15 بار لأن دي هي اللي هاتعمل اسبرسو بجد. فيه توكيل دي لونجي في امتداد عباس العقاد بعد الحديقة الدولية وبعد تقاطع ذاكر حسين على اليمين. تقدر تشوف عندهم تشكيله واسعه من الموديلات. المضخة بتكون أغلى (في حدود 1000 - 1200) في حين العادية بتبقا في حدود 500 مثلا. دي لونجي ماركه كويسه في ماكينات القهوة عموما والتوكيل محترمين جدا في أي صيانة بعد كده.

بالنسبة للبن، مع كامل احترامي لنصائح الزملاء بس ده مش هاتشتريه من بتوع البن التركي العادي (ولا عبد المعبود ولا شاهين ولا الكلام ده) حتى لو قالك بيعمله. أحسن أنواع في السوق هي segafredo و lavaza ودول هاتلاقيهم في السوبر ماركت (أولاد رجب - كارفور) سعر واحد تقريبا (حوالي 36 للربع كيلو) مع أفضلية لـ segafredo. (الربع ك هايقضي مش أقل من 30 فنجان - حسب الماكينة) الماكينة اللي فيها مضخة هاتوفرلك في استخدام البن لأنها بتضغط البخار بالمضخة وبالتالي بتطلع خلاصة البن ومش بتتضطر تحط فيها بن كتير. ونصيحة بلاش الكابسولات لأنها هاتقيدك في الانواع (تقريبا illy و starbucks بس ) وهاتبقا أغلى كتير (تقريبا 70 جنيه الـ 20 كبسولة)

ماكينة الاسبرسو بتعمل بيها أمريكان برضه على فكره لأنه نفس البن. كل الحكاية بدل ما نفس كمية البن بتعمل بيها فنجان صغير هاتعمل بيها كوباية كبيره. ودي الطريقة اللي بيها بتتحكم دايما في القهوة تقيلة أو خفيفة (نسبة البن لحجم الفنجال اللي بتعمله). وعلى فكره عن تجربه مع الوقت هاتتعود على الأسبرسو أكتر مش هاتعرف تشرب الأميركان. (زي ما بطلت تشرب النسكافيه كده).

فيه ماركة تانية اسمها Nespresso بس دي لو بجد غاوي تدلع نفسك...بس سامحني دي عايزالها موضوع لوحدها وبصراحة over شويتين في السعر (سواء سعر الماكينة أو الكابسولات) بس حكاية.

ربنا ييسرك الافضل ان شاء الله وماتنساش تقولنا جبت ايه في الأخر وتحكيلنا عن تجربتك ان شاء الله

تمام جدا الله ينور عليك يا باشا

انا خلاص لو هجيب اسبرسو ناوي على ماشين 15 بار زي ما نصحتني

ياريت بقه تقولي على ماشين النسبريسو دي بالتفاصيل

انا عارف تقريبا انها من شركة نسله على ما اعتقد .... بس ايه اللي بيميزها

وسعرها كام وسعر الكبسولات كام والكبسولة بتعمل كام فنجان ؟؟

المشاركة الأصلية كتبت بواسطة الغزالى

قوله يا شنورى ... بيقولك 1200 جنيه و 8800 جنيه ... طيب اتجوز الوليه بمكنه قهوه ولا ايه يعنى ... طيب ... اسمع كلام شنورى .. وهات كل المكان قالولك عليه فلاتر غلايات اى حاجه واحنا هانختار الى هايعمل معانا دماغ فى الاخر

هههههههه كله من الجنيه المصري اللي كل يوم حاله في النازل

منه لله اللي كان السبب

انا عندي مكنه الاميركان كوفي نوعها Delongi حلوة اوي و بتعمل 8 اكواب و سعرها كان حوالي 175 جنيه و بقلتر دايم بس انا بحط برضة فلتر الكيس بيبقي فيه 100 سعره في كارفور جوالي 22 جنيه (( علي فكرة هو سعره اساسا حوالي 10 جنيه برة بس هنعمل ايه ))

الفرق الرئيسي بيبقي في نوع البن اللي بتستعمله انا يستعمل Jacob كنت بجيبها من برة بس لقيتها في كارفور اعتقد ب 70 جنيه النص كيلو و هتلاقي كمان في Starbucks انواع تانيه زي سومطره تحفه برضة بس غاليه بحوالي 100 جنيه - اعتقد ارخص نوع هو ماكسويل بس مش اد كدة و برضة في تكهات كتير و فيه تقيل و خفيف هتقعد تجرب كذا نوع لحد ما تعجب بواحد و مش هتغيرة - يعني انا سومطرة معجبتنيش اوي و لا ماكسويل اكتر حاجة عجبتني Jacob

نصيحه برضة تجيب كوفي ميت بطعم ال Hazelnuts و تحط يدوبك حبه صغيرين اوي منه علي الكوبايه يعني يدوبك 1/8 معلقه صغيرة كدة بتبقي حكايه