بطارية الاب توب

**makram555** · 08-03-2012 07:33 PM

الاخوه الاعزاء معي لاب توب ماركة dell البطاريه بتاعته تعبت وعايز اشتري واحده جديده ياتري منين اشتريها وتكون اصليه وكيفيه المحافظه عليها ولكم جزيل الشكر

**makram555** · 08-03-2012 09:44 PM

معقول مفيش ردود خالص

**hossam165** · 08-03-2012 11:06 PM

سوق العصر في الخليفة المأمون الدور الثالث

**MASERATI** · 09-03-2012 07:45 PM

السلام عليكم و رحمة الله و بركاته

لو تعرف حد فى أميركا, خليه يجيبهالك من :

www.ebay.com

لأنى كنت احتاجت واحد للToshiba بتاعى و سألت الأخوة هنا فى المنتدى على سعرها, كان أقل سعر سمعته, حوالى 500 جنيه و ماتضمنش أنها أصلى و قالولى الأصلى فى التوكيل ب900 جنيه, و لما جيت كندا جيبتها ب24 دولار (150 جنيه مصرى) شامل الشحن لحااااااااااااااااد باب البيت و الحمد لله, بفضل الله, شغالة معايا بقالها 3 شهور زى الحلاوة.

**د.اشرف هنداوى** · 09-03-2012 08:08 PM

انا زيك بطارية السوني بتودع بعد استعمال 5 سنين و كل اللي سألتهم قالولي سعر الاصلية في حدود الألف جنيه يبقي خليها كده و تشتري لاب جديد احسن

**aboomar22** · 09-03-2012 09:40 PM

لو اللاب قديم بلاش خليه كده وخلاص وزود على ثمن البطارية وهات واحد جديد وعلشان تحافظ على البطارية متسبش الجهاز على طول فى الكهرباء لازم كل فترة تشغله على البطارية وتفضيها ونرجع تشحنه تانى

**makram555** · 10-03-2012 07:44 PM

المشاركة الأصلية كتبت بواسطة aboomar22

لو اللاب قديم بلاش خليه كده وخلاص وزود على ثمن البطارية وهات واحد جديد وعلشان تحافظ على البطارية متسبش الجهاز على طول فى الكهرباء لازم كل فترة تشغله على البطارية وتفضيها ونرجع تشحنه تانى

شكرا علي ردودكم القيمة وعلي فكره الاب اللي معايا مش قديم يادوبك له سنتين معايا بس عمري ماشغلت الجهاز بدون البطاريه فاكل اد ايه نشغل الجهاز علي البطاريه ولك جزيل الشكر

**SYD** · 10-03-2012 08:22 PM

نصيحة

ماتشتريش بطارية جديدة
البطارية الي ب300 جنيه دي بالتأكيد مش أصلية

البطارية الأصلية لا يمكن تحت اي حال من الأحوال تقل عن 600 جنيه بقول لن تقل يعني ممكن تزيد وتزيد بكتير كمان

احسن استعمال للبطارية
انك مبدئيا ماتستعملهاش غير للضرورة القصوي

يعني لو انت في البيت يبقي ماتركبهاش
لو انت في الشغل ماتركبهاش
لو انت في مكان فيه مصدر كهرباء جمبك ماتركبهاش

طب لما تفكها ، تفكها مشحونة ولا فاضية ؟؟؟؟؟؟!!!!

نص نص

بالظبط عند 40%

البطارية الليثيوم ليها عمر افتراضي يقاس بعدد مرات الشحن الكامل
الشحن الكامل
يعني ايه الشحن الكامل ؟؟
يعني تشحنها من 0% لحد 100%

بالتالي
احسن شحن يحافظ علي البطارية
لما تشحنها ابتداء من 15% ومعظم الكمبيوترات بتحذرك عند هذا المستوي طبقاً للPower Plan الموجودة في نظام التشغيل وتشحنها لحد مثلا 90% وتفصل الكهرباء

يستحسن ماتركبهاش غير للضرورة

ولما تكون فاصلها تماما ممكن كل شهر او 3 اسابيع تركبها شوية تخلص علي الشحن الموجود وترجع تشحنها للأخر لحد 100% وتفضيها لحد 10% او أقل وترجع تشحنها لحد مثلا 50% او 60% والأحسن زي ماقولنا لحد 40%

طب ليه هعمل كدة كل شهر او اقل ؟؟؟؟
عشان تنشطها من جديد ومتديهاش فرصة تخمل او تبوظ خلاياها

احتمال وارد جدا انك لما تركبها بعد فترة فصل طويلة انك تلاقيها خلصت شحن او وقفت الشحن عند 97% ودة امر طبيعي ووراد جدا
ماتقلقش
فضيها واشحنها كام مرة ورا بعض هتلاقيها ظبطت تاني ورجعت تملي لحد 100%
او ممكن لما تلقيها وقفت عند 97% تشيل الكابل شوية صغيرين وليكن 5 دقايق وارجع ركبه تاني لحد لما تشحن لحد 100% شيل وركب كذا مرة لحد لما تملي ل100%

انا شخصيا ماركبتش بطارية الكمبيوتر بتاعي غير مرات معدودة من حوالي سنة ونص والحمدلله بفضل الله البطارية بحالتها ويوم لما بركبها مش اقل من 3 ساعات شغل
بس بعد ايه ؟؟؟؟ بعد ماغيرت حوالي 3 كمبيوترات قبله وكل واحد بطاريته بتودع في حوالي 6 شهور

في ناس بتقول حفظ البطارية في كيس بلاستيك محكم الربط في فريزر الثلاجة
بس انا لا اميل لهذا الرأي

خليها دايما في شنطة الكمبيوتر ولكن بدون استخدام غير في الظروف القاسية جدا واعتقد ماحدش فينا بيشغل الكمبيوتر بتاعه ومفيش جمبه مصدر كهرباء

ومع كامل احترامي للDELL بس انا ماشوفتش منه كمبيوتر بطاريته بتعيش ابدا

تقبل مروري

والله المستعان
،
،