مره كنت ماشي علي الزراعي اتجاه القاهره وكان في حاثه في الأتجاه التاني ولقيت ناس كتيير وواحده ست بقي واقفه بالعربيه في الشمال وعماله تتفرج
عرض للطباعة
مره كنت ماشي علي الزراعي اتجاه القاهره وكان في حاثه في الأتجاه التاني ولقيت ناس كتيير وواحده ست بقي واقفه بالعربيه في الشمال وعماله تتفرج
عن نفسي مبحولش اقف غير لما يكون مفيش اسعاف ومفيش حد واقف بعربيه
حصل موقف كنت ماشي وفجأه في ناس 5-6 ملموين حولين واحده ست وبنتها وقفت علي جمب بعدها بـ 40 متر مكان فاضي جمب الطريق نزلت لقيت الست دي ابنها ضاربها سألت يا حاجه انتي كويسه اه فيكي حاجه اوصل حضرتك المستشفي قالت لا سبتها ومشيت
وحصلت معايا حادث ميكروباص كنت علي طريق القاهر الزراعي وكنت طالع من القاهره وعدي مني ميكروباص بسرعه عاليه جدا وانا ماشي برحتي عشان الدنيا زحمه بعدها بشوية لقيت الميكروباص دهره للنيل ووشه للطريق والناس نايمه علي الارض برا العربيه انا بصيت للمنظر ومحولتش اقف لان الطريق مش مستحمل واعصابي تعبت من منظر الناس الي نايمة علي الارض وقفت علي جمب بعدها بمسافه كويسه وكلمة الاسعاف وكانت اعصابي هديت شوية لان كنت لسه هكمل لحد الزقازيق
بصراحه بيبقي نفسي اتفرج واعرف ايه اللي حصل
بس بقول مينفعش اوقف الطريق او حتي ابطئ
واروح ماشي علي طول
شهادة حق لازم اقولها لان من الواضح ان كاتب الموضوع فعلا كان اعد فى العربية ولم يحرك له ساكنا والغريب انة كمان متضايق
الحادثة حصلت فى اللحظة اللى كنت ماشى بيها بالعربية من قدام المكان
وتصرف طبيعى (انا بتكلم عن نفسى وعن غيرى اللى انا شفتهم ) تلقائى لقيت نفسى بركن العربية وبجرى وكان اللى عمل الحادثة دة اخويا او حد اعرفة
بتجرى لية ؟؟؟ مش عارف طب حتعمل اية ؟؟؟ بردة مش عارف بس مش يمكن لو انا اللى فى الموقف دة لا قدر الله اتمنى ان حد يكون جنبى ؟؟؟ او حتى يحاول يساعدنى ؟؟؟
العربية الى عملت الحادثة كانت سوزوكى سودة s*4 وكان راكب فيها ولدين الحمد لله اللى جنب السواق مكنش فية حاجة التانى بقا اللى يارب يارب يكون لية عمر ويقوم منها ان كان مازال على قيد الحياة لانة باختصار شديد دخل فى عمود ناحيتة وكان مصاب باصابات بالغة (يكفى انى اقول انة كان فاقد للوعى وكان ينزف من اى مكان يحاول التنفس منة )
لمعلوماتك وشهادة حق لولا التجمع اللى كان موجود دة (معظمة مش كلة طبعا لان كان فى ناس زى العضو اللى اعد فى عربيتة بيصور بيتفرجوا بردة ) اقسم بالله لولا الشباب اللى موجودين واللى جريوا واتلموا على العربية مكناش حنعرف نطلعة من العربية
والله زى ما بقولكوا كدة الرجالة (مزعوا صاج العربية بايديهم ) علشان يعرفوا يطلعوا الولد اللى كان محشور ورغم ان الايرباج فتح ولكن الولد ربنا يشفية باذن الله
طب تعالوا نشوف باة اللمة دى والهمجية دى كانت بتعمل اية
مجموعة بتمزع صاج العربية بايديهم وبرجليهم ومحدش فيهم معاة مفك حتى (كدة وحش !!!! )
مجموعة تانية بتتصل بالنجدة (!!!!! )
مجموعة تالتة بتتصل بالاسعاف (!!!!! انت بتهرج مكنش المفروض دة يحصل اصلا)
ومجموعة رابعة واقفة مصدومة من هول الحادث ومكبلة ومش عارفة تعمل اى حاجة غير اللى بيقول ربنا يستر
واللى بيقرا قران واللى بيديعيلوا واللى ست واقفة لا تعرفة ولا عمرها شافتة وعمالة تعيط
ازاى احنا شعب همجى كدة ؟؟؟؟
اقسم بالله لولا هول المكالمات اللى كانت من الناس على الاسعاف مكنوش حيجوا وكل واحد كان بيتصل كان لازم يتعرف اسمة بالكامل وهوة فين وجاى منين وتحقيق ورسالة صوتية فى حالة البلاغ طلع كاذب مش عارف اجراءات قانونية اية والكلام دة
بالنسبة للنقطة بتاعة الاسعاف فى لبس احب اوضحة
اقرب عربية اسعاف كانت موجودة (لان مش بالضرورة على فكرة بتاعة دار الفؤاد تكون اقرب بس العربية مش موجودة هما بيتصلوا باقرب واحدة وكانت اقرب واحدة فى مينا جاردت سيتى وقد كان وفى ظرف 8 دقائق ولله الحمد من اخر اتصال (اللى هوة كان اتصالى انا شخصيا) الاسعاف جت
اللبس فين باة علشان العضو الفاضل يعرف
الاسعاف اول ما ظهرت على الطريق ما لا يقل عن 10 او 15 نفر جرى علشان يوجهها من على اول الشارع او على اول مول العرب كدة علشان ينبهم يدخلوا الحارة البطىء (اللى هى مكان الحادث بالاساس ) لكن سواق الاسعاف مفهمش الكلام دة او لم يستوعب وبالتالى العربية فوتت فتحة البطى واستمرت فى طريقها ووقفت بينها وبين الحادث رصيف اللى بيفصل بين الطريقين وما كان من المسعفين الا انهم وقفوا ونزلوا النقالة وراحوا لمكان الحادث ونقلوا الولد على العربية وطاروا واقسم بالله وشهادة حق احاسب عليها لولا الناس اللى خرجوا الولد من العربية ولا عربية الاسعاف كانت حتعمل اى حاجة الا لما انقاذ مدنى يشرف ويحاول يخرج الناس جوة وانتوا عارفين دة كان حيبقى امتى
ستر ربنا ان اكتوبر بلد شوارعها واسعة والتكدسات فيها تكاد تكون معدومة وبالتالى الاسعاف وصل فى رائى الشخصى فى زمن قياسى
ستر ربنا ان كان فى ناس عرفت تخرج الولد
وانا والله لو اعرف ان الموضوع كان حيبقى فية نقد كدة اقسم بالله كنت صورتة بس الطبيعى ان الواحد يحاول حتى بلسانة انة يعمل اى حاجة
يعنى اقل ما يقال ان كان فى راجل اعد على الارض بيحاول ينطقة الشهادة والولد فاقد للوعى ونقولة مش دريان يا حج كل اللى كان موجود كان بينطقهالة مكانة
احنا شعب جدع ودى فى الاخر الضريبة
المفروض لو كل واحد اتخبط او اتصاب تتصل بالاسعاف وتسيبة يموت مانت عملت اللى عليك
تحياتى للجميع
اولا يا باشا انا احب اقول لحضرتك انتا راجل زي العسل وقرات مشركاتك في موضوعات كتير وانتا في الكتابة رائع
ثانيا زي ما حضرتك بتقول ان الناس دي بتتعب المصاب اكتر انا كنت عملت حادث ورجلي اتكسرت ولما الناس ساعدوني و شالوني خلو الكسر دا مضاعف وتركبلي شريحة ومسامير بسبب مساعدة الناس لو مكنش حد ساعدني كانت هتبقى حاجة بسيطة بس الحمد الله على كل شئ
دلوقتي لما بقيت بشوف حادث بنزل علشان مخليش حد يلمس المصابين لحد ما الاسعاف
اكيد طبعا لا تلام على جدعنتك وشهامتك
بس احنا بنتكلم فى نقطة تانيه خالص اللى بيقف يتفرج ويزحم الدنيا وخلاص
احنا شعبنا ميبانش اصلو الا فى المواقف الصعبة
انا عن نفسى فى مرة جريت بطافيه الحريق على عربية كانت على وشك الانفجار وكان صاحبها مش عايز يسبها وفى ناس جريت بس فى 2 شباب فضلو ماسكين فى الراجل لاخر وقت و الحمد لله ربنا قدرنى وطفيت النار بتاعتها
اكيد مساعدة شخص احساس لا يوصف بالرضا عن النفس و للاسف لان النظام عندنا خلط احنا بنحاول نصلح الخلط ده بخلط اصغر شوية لان فعلان اخراج الشاب من العربية محتاج ادوات لا يملكها الا الدفاع المدنى ودول مبيظهروش خالص
وفى النهايه لك كل التقدير و الاحترام انت وكل من ساعد فى عمليه الانقاذ
لكن احنا بنتناقش من اجل تصحيح جميع الاوضاع
تخيل احساس هذا الشاب
[youtube]http://www.youtube.com/watch?v=jO0s10qSOw4[/youtube]
بص اقولكوا علي حاجه لو انت هتقدر تساعد وتعرف تساعد انزل مش هتعرف علي الاقل كلم الاسعاف وادعيلهم
mido_soliman أخي العزيز ...
أولاً أحيك أنك قدرت تساعد ... وأحيك على مشاركتك ... لكن زي ما تفضلو الاخوان ... أني مش بلوم الناس الي بتساعد أذا تقدر تساعد ... لكن كويس انتا كنت موجود وشاهد رغم ممكن تكون كنت مشغولة بالمساعده فمستوعبتش ان الموقف ان الطريق زي مازكرت 7 حرات مقفولين ... لأن شوارع اكتوبر كبيرة اربعه في السريع و3 في البطيء ... وعربيات مرمية هنا وهناك ... طيب ماخطرش في بالك ان ممكن حد من راكبين العربيات دي معاه حالة طارئة ولازم ينقلو المستشفى بسرعة ولا هو علشان ننقذ أنسان نموت أخر دي نقطة وانا بقول فرضاً اومثلاً وما أكتر ظروف الناس .
وحضرتك معلش لأن مشاركتي مطلعتش كاملة بسبب مشاكل مع المنتدى تقنية ومش عارف اذا لو راجعت لمشاركتي ... الي قلت فيها مش انا الي كنت بصور انا خليت الي راكب جمبي يصور وانا كل تركيزي في السواقة اني احاول اوسع طريق للأسعاف الي ورايا ... لكن العربيات واقفه قدامي ، وحضرتك تقدر تسمع صوت كلاكساتي في الفيديو عاوز الناس تمشي بأه علشان توسع طريق للاسعاف ... ونقدي هنا حتى يشمل الناس الي راكبة عربياتها وماشين على قشر بيض وقاعدين بيتفرجو ، بتتفرجو على ايه ، في حين الاسعاف صوتها ورنا يسمع كل المدينة ودول في منتهى التناحة ولا كأن في أسعاف أساساً ولا حياة انسان على المحك .
النقطة الاخرى تصدق وتأمن بالله انا ماشفت الحادثة ولا عاوز اشوفها ، لكن رسولنا الكريم قال (أياكم والجلوس في الطرقات ) ويشمل الوقوف أيضاً ... علشان مايجيش واحد يقلك انا مش جالس انا واقف . وأكد كمان رسولنا ان الطريق له حق ... لمن قال فأعطي الطريق حقه .
ولذلك لمن طلبت من الي جمبي يصور انا عارف ومتأكد انو مش هيشوف الحادثة بس انا كنت حابب اصور تجمهر الناس وبيقلب بهبل ويخبطو على عربيات الناس علشان يوسعو الطريق وهما ذات نفسهم الي قافلين الطريق ... العربية الي كانت قدامي كان فيها اسرة وشفت شب صايع بيرزع على العربية بتاعتو وصوتها طالع في الفيدو رغم ان الطريق مقفول وفيه عربيات قدامو ومعاه أطفال في العربية يعني ميصحش ابداً الي حصل يعني الراجل الي قدامي ده هيعمل ايه يركب جنحات ويطير ولا يشغل التيربو وينط فوق العربيات ... ياريت تشوف الفيديو تاني مرة وانتا هتلاحظ كلامي ... ومتقليش احنا شعب عاطفي وشوية كلام مسكنات لازم نشغل عقلنا شوية .
والنقطة التانية : أحنا لحد دلوقتي وفي العربية فيها شباب ... طيب لمن يبقى فيها حريم ... بالعقل كده ترضاها كده لحد من محارمك ... انا بأه ياسيدي شفت بعيني عربية مقلوبة وطلعو الي فيها والشباب لسة متجمعين فالراجل أبتدى يقلهم خلاص روحووو كتر خيركو ولسه متجمعين تناحة كده لغاية مالواد قلع حزام بنطلومو الجينز وأبتدى يهوش في الناس علشان تبعد عن جثة مراتو الي هدومها اتقطعت من عليها .انا عارف انها مش شهوة ولا حاجة بس حتى لو ميته لا يجوز يا أخي الميت ليه حرمة ... ومتقنعنيش ان كل الناس الي واقفه دي ليها لازمة الي عاوز يدعي يدعي في عربيتو ياخي ... والي واقفه تعيط تروح تعيط في بيتها ... ومن كل الزحمة دي كلها ومن كل المولد ده كلو هتلاقي هما خمسة بس الي عرفو يفتحو الباب العربية ... فايه لازمت الباقي ... مش على الحادثة دي بس انا بتكلم عن كل حادثة فيكي يامصر بتلاقي جماهير وأمة لا أله الا الله متلمه ... كأنهم بيتفرجو على حاوي عدم المؤخزة ... وكل الي عاوز أقولو أن مصايب الناس مش لعبة وأعراض الناس مش فرجة ... وزي ماذكرو الاخوان المحترمين في المنتدى أن أحياناً بتبقى الحادثة الجهة التانية والشارع من الناحيتين واقف وحال كل الناس يوقف علشان واحد عمل حادثة انشالله حتى يكون أتكسر عندو فنوس أيشارة من أمو 14 جنية والناس كلها واقفه ومصالحة متعطله علشان فانوس أشارة ب14 جنية ... يا أخي ده البانزين الي حرقتو العربيات في وقفتها في خلال نص ساعه يساوووووووووووي ملالالالالالالالالالالالا لايين . ودي واقفين يتخانقو على 14 جنية ... ويقولك لا هو الي كسر عليا وحدف من غير مايبص في المرايه هههههههههههههه شوفت التفاههة . فالحادثة حادثة سواء فيها مصابين او غير مصابين ... الدنيا بتوقف وبتتفرج .... وتحياتي ليك يا باشا وللسادة الاعضاء .
ربنا يخليك ليا ياباشا ده بس من زوقك واللهي ... وألف سلامة عليك يا غالي ... وبحي تجربتك دي ياريت الناس تستفيد منها ، ويعرفو ان العربية مش هتنفجر ... لو المصاب فضل فيها لغاية مايجي المختصين ... لأنهم بيشيلوه بعناية خاصة مخافة حتى عمودو الفقري او رقبتو تتحرك من مكانها أو تتملخ ... مما يسبب للمصاب شلل طول عمرو .
وبدل ما انتا بتساعدو يبقى انتا بتقضي عليه ... وان الاسعاف مش محتاجة جي بي ار اس علشان تحدد المواقع ... مواقع الحادثة ، لأن الحادثة باينة من على بعد كيلووو بس المشكلة ازاي يوصلها مش مشكلت الحادثة فين ههههههههههههه وقاعدين يقلولا تعال هنا تعال هنا ... طيب بتاع الاسعاف هيركب جنحات وينط فوق العربيات ولا هيشغل التيربو ولا هيشغل الميكرفون ويقول هيا طـــــــــير يا جرنديزر .... وتحياتي .