عندى موتور شيرى اوتوماتيك يعمل بحالة جيدة بالكونترول الخاص به
من يحتاج اى قطع غيار
عرض للطباعة
عندى موتور شيرى اوتوماتيك يعمل بحالة جيدة بالكونترول الخاص به
من يحتاج اى قطع غيار
هو انتا يا كبير غيرت موتور العربية بايه
ولو هتبيع الكنترول تبيعه بكام
بس متعمليش زى شغل التوكيل هههههه
عيب يا باشا انا معاك فى اللى انت عايزه
شكرا علي مكالمتك ليا يا توني
طارق اسيوط
ممكن تبعتلى تليفونك على الخاص لأنى ممكن احتاج منك بعض قطع الغيار من الموتور ده لكن هو كانت مشكلته ايه أحسن يطلع العيب اللى فيه نفس العيب اللى فى موتور سيارتى عشان انا عندى صوت نقر من تحت و احتمال اغير سبيكة و اخرط كرنك او افضل اغيره بواحد سليم و ممكن لو حصل نصيب اخد برضه الكونترول بتاع الاتوماتيك لو شغال تمام و انت ظبط معانا الأسعار و موتور سيارتى برضه اتوماتيك
اهلا استاذ douha_wise
مشكلة الأخ توني ان الموتور بتاعة يشتغل شوية وشوية ما يشتغلش خالص واحيانا يتلت يعني يشتغل 3 بستم والمشكلة دي بتبقي في الكنترول بتاع العربية وأنظمة التغذية الكهربائية زي الأنجكشن وتزامن اطلاق الشرارة للبوجيهات وفتح حساس الثروتل وخلافة يعني الكنترول ممكن يكون مشكلتة كبيرة اضافة الي ان الكنترول بتاع العربية دي نزل منة نوعين الأول السريال بتاعة بينتهي ب 01 والتاني بينتهي ب 05 ودول مايشتغلوش علي بعض نهائي
اما صوت الموتور من تحت دة بيبقي دايما في جلب البيلات بتاعة البساتم ودي بتيجي مع طقم البستم ودة في حدود 250 جنية وتضيف عليهم 90 طقم شمبر و50 جوان وش سلندر اما خرط الكرنك دة فمستبعد الا اذا كانت لمبة الزيت بتنور
يعني ممكن تغير البساتم بس من غير الكارنك وتحتفظ بنفس قيمة السبيكة الأستاندرد لأن طقم السبيكة في حدود 300 جنية وخرط الكرنك في حدود 150 كمان وهاتعوز تغير زيت وكمان تليين ب 3 صفايح بنزين!!!!!!
وعموماانصح حضرتك انك بعد ما تفك الموتور الأول وتحدد العيب ابقي اشتري علشان ما تشتريش حاجة ممكن ما تلزمكش وتبقي بدل ما تلم الموضوع تفتح اكتر
شكرا
يا اخى الحبيب انا مش عارف اقولك ايه على انك اهتميت و رديت لا اجد غير ان اقول جزاك الله كل خير
عموما بالنسبة لموتور سيارتى فهو مش بينقص زيت خالص و بيعرق و زى الفل عيبه الوحيد و اللى ظهر من شهرين بس بعد ما غيرت زيت و فلتر و بيكون موجود بعد ما العربية بتجمع اخر الغيار يعنى على 2500 الى 3000 لفة مش قبل كده هو التنقير اللى تحت و عشان كده انا اظن ان الموضوع مش هيكون اكتر من سبيكة و بيلات و بالكتير كرنك و اكيد شمبر و انت رأيك ايه و ياريت لو عندك صنايعية كويسين و فاهمين العربية دى و مش بيتغالوا فى الأجر تقولى عليهم و ارسل لى تليفونك اظبط معاك عشان انا كنت بفكر فى عادل بتاع صقر قريش لكن لاقيته بيقولى مصنعية عاليه ليه و للخراط و على فكرة لمبة الزيت كانت بتنور الأول كل فترة و بعد ما عملت سكان بالكمبيوتر و ازلت الأعطال مبقتش تنور
اكرر شكرى لك
السلام عليكم
انا عندى اقتراح ليك يا استاذ/ممدوح
قبل ما تحل وتكلف نفسك وموضوع الحل ده مش ساهل
ماتغير الزيت لزيت اتقل من اللى معاك وليكن مثلا
15w-50
وجرب انا كانت لمبة الزيت عندى بتنور ولما غيرت الزيت والفلتر بفلتر المانى والزيت شل هيليكس الاصفر hx5 الحمد لله ما بقتش تنور الا ساعة الدوارة فقط و الحرارة انتظمت والصوت جميل
ولك تحياتى
انا فعلا كنت حاطط زيت كاسترول و سقطه و حطيت توتال الفين كيلو و غيرت الفلتر تانى بفلتر المانى اللى كنت رشحتوه بالمنتدى و لمبة الزيت مبقتش تنور الا عند الدوارة فقط برضه لكن صوت التنقير زى ما هو و بالنسبة للحرارة انا مكنتش بشتكى منها اصلا المشكلة الوحيدة الآن فقط هى التنقير اللى بيحصل عند الوصول لعدد لفات من 2500 الى 3000
عزيزى الاستاذ ممدوح مش الفكرة اننا نغير نوع الزيت مش مهم كاسترول ولا شل ولاموبيل ولا.... ولا.... ولكن الفكرة نجيب زيت اكبر لزوجة علشان نكبر طبقة الميكرو فيلم بين الكرنك وسبيكة البيل للحد من صوت التنقير اللى حضرتك بتسمعه هى دى الفكرة..... وهو الزيت اللى كنت بتستعمله مكتوب عليه ايه.
والله الموفق