!! صوت في موتور شاهين 1.4 2004 بعد تغيير سير وبلية الكاتينة مرفق فيديو !!
ازيكو يا شباب :flower4u:
من 23 يوم بالظبط عملت الصيانة الدورية عند الميكانيكي منها ما يخص الموتور(تغيير سير الكاتينة ايزوران دايكو أرجنتيني، بلية الكاتينة Coram ايطالي - الميكانيكي قالي نغيرها - تغيير جوان غطاء التاكيهات، فلتر البنزين تركي، الزيت كاسترول GTX SL والفلتر فاك)
العربية شاهين 1400 موديل 2004 كربراتير ماشية 55 ألف بس
قبلها في نفس اليوم نظفت انا الكربراتير باسبراي Abro أمريكي
ظهر تاني يوم صوت كده - ياريت تشوفو الفيديو - فرجعت للميكانيكي قالي لأ مفيش حاجة ولو الصوت مرحش لوحده روح لكهربائي يشوفلك بلي الدينامو
بعديها بـ 10 أيام رحت للكهربائي وقالي اشوف البلي، سبتله العربية ساعتين ورجعت قالي غيرت بليتين في الدينامو الماني تمنهم 37 جنيه المهم دورت لقيت الصوت مش موجود وأول ماروّحت لقيت الصوت زي ما هو فرجعتله فجاب خرطوم ميه حطه على الموتور والدينامو وسمّعني فعلا الصوت جاي من الموتور من قدام من عند العلبة البلاستيك بتاع الكاتينة
رجعت للميكانيكي مش مقتنع ففصل سير الدينامو لقى الصوت موجود ومع ذلك قالي لأ ميشغلكش الصوت ده مفيهاش حاجة
المهم من وقت ظهور الصوت ده وأحيانا لما أجي أدّور الموتور بعد يومين او 3 عدم استخدام أحس انه اتكتّف او اتخنق كده مع المارش
الكلام ده من 13 يوم وانا الصراحة مش مبسوط من الصوت ده لأن كل حاجة ليها سبب وخايف ليكون في ضرر أو حاجة تحصل وتاني يوم حسيت بصوت خشونة الصبح مع صوت نحرة كده او حاجة بِتْوحّ بس خف بعد كام يوم
المرة اللي فاتت لما غيرت سير الكاتينة ظهر الصوت لمدة أيام واختفى لوحده
الصوت مش مزعج والأداء تمام بس ايه سببه يعني مش ده الطبيعي؟؟؟
سؤال تاني بعد تنضيف الكربراتير لقيت العربية عالية فوطّيت مسمار الهوا بس العربية عالية شويه اثناء التسخين هل ده ليه علاقة وأوطيها ازاي؟
الفيديو أهه ياريت تشوفوه ومستني رأيكم :3_3_102[1]:
‫صوت في موتور شاهين 1.4 2004 بعد تغيير سير وبلية الكاتينة‬‎ - YouTube