الموضوع: اذا لم تستطيع ان تقاوم ............فحاول ان تستمتع .....

نعم ....تلك المقوله الشهيرة التى تلخص احدى الحيل الدفاعية للانسان الذى يواجه الواقع المرير المحيط بنا على جميع الاصعدة.
و نحن كبشر نواجه الكثير من المواقف التى تستدعى الى الذهن تلك المقوله التى تجعل الانسان لا يصاب بالاحباط او المرارة او الضغط......
عندما يقابلك موقف صعب مثلا من رئيسك فى العمل او صاحب الشركه و يطلب منك اشياء لا تتناسب مع قدرتك و مؤهلاتك و تركيبتك النفسية فحاول ان تستمتع بتلك الاوامر ... لعجزك عن المقاومه و المواجهه احيانا ......على اعتبار استكشاف مواهب و مهارات دفينه لا تراها انت فى نفسك .......

فى المنزل ..... عندما تتثاقل عليك الطلبات و المسئوليات و المهام و لا تستطيع ان تقاوم ... فحاول ان تستمتع بانك العائل الوحيد ليهم و ملهمش حد غيرك و بيدلعوا عليك و كلام من هذا القبيل .......
لما ترجع البيت متأخر و تلاقى المدام بتصرخ من تحت البطانية و تقولك :- انت جيت يا مدهول ..... ايه اللى اخرك كده ... هى اللوكاندا ده ملهاش مواعيد ولا ايه ؟؟ فحاول ان تستمتع بان هذا الكلام من دواعى العشم و المحبة الخالصه و البعد عن الرسميات ......
لما تنزل لوالدتك اللى لسة كنت عندها امبارح و تلاقيها بتقولك : يا دوبك ما افتكرت ؟؟؟؟ ما نت قاعد جنب الهانم ... الليدى... و ناسى امك اللى ربتك و رضعتك و خليتك رااااااااجل فاتح بيت .... ايوا انت مالكش خير فينا .... ده برضه اعتبرة من دواعى الحب الزائد اللى احيانا يساء التعبير عنه و انتظار المزيد من رد الجميل و الوفاء و ...... الخ
لما تكون ماشى فى الشارع و حد يثبتك و يقولك طلع اللى معاك يا عينية .... طلع اللى معاك فورا و اعتبرة عابر سبيل و حفاظا على ماء الوجه و البعد عن التسول لجاء اللى هذة الطريقه لاستدرار عطفك و احسانك .... و انت كده كده كنت هديله اللى فيى النصيب .....
لما تكون ماشى جنب الاستاد و تلاقى ماسورة بنى ادمين انفجرت قدامك ويا سلام بقى لما تكون عربيتك حمرة و يحوطوك و يطلعلك واحد يقولك انت كنت بتشجع الاهلى يا كابتن ؟؟؟ طبعا هتقوله ابدا ... هو مين الاهلى ده ...... ده انا حتى مبروحش عندى اهلى يبقى هشجعهم !!!!!! على اعتبار انك استخدمت ذكائك الاجتماعى لعدم اذية مشاعر الاغلبية ........
لما تكون بتاكل و جعان و تلاقى ابنك مجرجرك من بنطلونك علشان تشغله لعبة على الجهاز و تقوم معاة و تسمع كلامه ..... على اعتبار انك الوحيد المسئول عن تلبية طلباته و احتياجاته ......
لما تكون نايم فى بيتكم و تلاجى واحد مشغل صاروخ و لا شينيور و لا حتى واحدة طلبت معاها انها تستعمل ماكينه الخياطة و تسمع السيفونية المحترمه ....... عادى جدا .. ساعتها تدرك اهمية الهدوء و تعرف انه نعمه ممكن ربنا يسلبها منك فى اى وقت ........
لما تقوم الصبح و تلاقى مفيش طقم تروح بيه الشغل و الانأح من كده متلاقيش ولا شراب نضيف فى البيت ....... و ممكن تلاقى فرده شراب واحده الموجوده بس ... و تكلم الهانم تقولك ... اه معلش نسيت و الله العيال ..... انت سايب الدادة فى البيت هو انا ليه ميت ايد هعمل ايه يعنى ... البس اللى كان عليك و خلاص..... عادى جدا ..... تلبس اللى كان عليك و تلبس فرده شراب و تربط رجلك التانيه بشاش كانك متعور و تروح الشغل عادى و بكده تبقى عملت بروفه .....لا قدر الله لو اتعورت ... هتروح الشغل و لا لأ..
لما يطلعك خاوزق فى العربية ياخد ميزانية الشهر و تمشى منفض طول الشهر علشان مبتحبش تستلف .... عادى جدا ... تجربة جميله علشان تعيش الحياة بجميع ابعادها .......
لما تتناقش مع مديرك فى الشغل على اى موضوع عادى برة الشغل و تلاقيه واخد موقف دفاعى و شوية شويه هيخش تحت المكتب و هحدفك بالاقلام و الدوسيهات و ممكن ينشك بالدباسه فى وشك او يقرصك بخلاعه الدبابيس علشان يفرض رايه عليك ..... عادى جدا علشان تتعرف طرق جديدة للتعبير عن الاراء
لما تعطل عربيتك و تتضطر تركب اتوبيس علشان تروح الشغل و تطلع ترمح وراة بالميل و تتشعبط على الباب و يبقى نصك مدلدل برة .... احمد ربنا اصلا مفيش حد عند نعمه الصحه اصلا انه يجرى ورا الاتوبيس ........ و اهى فرصة تختبر لياقتك ...
نصيحه حفاظا على سلامتك النفسية .... اذا لم تستطيع ان تقاوم .... فحاول ان تستمتع ..........
و اذا لم تستطيع قراءة هذا المقال ........ فحاول ان تستمتع به .......